നിങ്ങളുടെ കൈകളില്‍ ചോരയാണ് സ്റ്റര്‍മാര്‍; ഗസ്സയെ പട്ടിണിക്കിടുന്നത് നിര്‍ത്തൂ; ഫലസ്തീന് മരണമില്ല; ഭീകര രാഷ്ട്രമായ ഇസ്രായേല്‍ തുലയട്ടെ; ലണ്ടനില്‍ ഇസ്രയേലിനെ ശപിച്ചും ഫലസ്തീനെ സ്തുതിച്ചും മുദ്രാവാക്യം മുഴക്കി റാലി നടത്തിയത് ആയിരങ്ങള്‍
ലണ്ടന്‍: വൈറ്റ്‌ഹോളില്‍ നടക്കാനിരിക്കുന്ന റാലിക്ക് മുന്നോടിയായി ആയിരക്കണക്കിന് പാലസ്തീന്‍ അനുകൂലികള്‍ സെന്‍ട്രല്‍ ലണ്ടനില്‍ പ്രകടനം നടത്തി. 'സമുദ്രം മുതല്‍ നദിവരെ; പാലസ്തീന്‍ നീണാള്‍ വാഴും', 'ഇസ്രയേല്‍ ഒരു തീവ്രവാദ രാഷ്ട്രമാണ്' തുടങ്ങിയ മുദ്രവാക്യങ്ങള്‍ മുഴക്കി പതിനായിരത്തോളം പേരായിരുന്നു പ്രകടനത്തില്‍ പങ്കെടുത്തത്. ഇവരില്‍ പലരും പാലസ്തീന്‍ പതാകകളും എന്തിയിരുന്നു. ഗ്രീന്‍ പാര്‍ക്കില്‍ നിന്നായിരുന്നു പ്രകടനം ആരംഭിച്ചത്. 'സ്റ്റാര്‍മറുടെ കൈകളില്‍ രക്തമുണ്ട്' 'ഗാസയെ പട്ടിണിക്കിടരുത്' എന്നിങ്ങനെ എഴുതിയ പ്ലക്കാര്‍ഡുകളും അവരില്‍ ചിലര്‍ ഉയര്‍ത്തിപ്പിടിച്ചിരുന്നു.
ചിലര്‍ ബ്രിട്ടീഷ് പ്രതിരോധ സെക്രട്ടറിക്ക് എതിരെയും മുദ്രാവാക്യങ്ങള്‍ മുഴക്കുന്നുണ്ടായിരുന്നു. 'ജോണ്‍ ഹീലേ, നിങ്ങള്‍ക്ക് ഒളിക്കാനാവില്ല', 'നിങ്ങള്‍ക്കെതിരെയും വംശഹത്യ ചാര്‍ജ്ജ് ചെയ്യും' എന്നു തുടങ്ങിയ മുദ്രാവാക്യങ്ങളായിരുന്നു പ്രതിരോധ സെക്രട്ടറിക്കെതിരെ അവര്‍ മുഴക്കിയത്. സെന്‍ട്രല്‍ ലണ്ടനിലെ പിക്കാഡിലിയില്‍ നിന്നും പുറപ്പെട്ട മറ്റൊരു പ്രകടനവും ഉണ്ടായിരുന്നു. പാലസ്തീന്‍ കൊയാലിഷന്‍ സംഘടിപ്പിച്ച പ്രകടനം ഉച്ചക്ക് പന്ത്രണ്ടേ മുക്കാലോടെയാണ് ആരംഭിച്ചത്. ഹൈഡ് പാര്‍ക്ക് കോര്‍ണറില്‍ നിന്നും ഡൗണിംഗ് സ്ട്രീറ്റിലേക്കായിരുന്നു പ്രകടനം.
പ്രകടനത്തിന് മേല്‍ കര്‍ശന നിയന്ത്രണമാണ് പോലീസ് ചെലുത്തിയത്. വൈകിട്ട് 5 മണിയോടെ സ്ഥലം വിടാന്‍ പോലീസ് പ്രകടനക്കാര്‍ക്ക് ഉത്തരവ് നല്‍കിയിരുന്നു. ഒരാളെ ക്രമസമാധാന ഭഞ്ജനത്തിന് പോലീസ് അറസ്റ്റ് ചെയ്തു. പബ്ലിക് ഓര്‍ഡര്‍ ആക്റ്റ് നിയമപ്രകാരം കുറ്റം ചെയ്തുവെന്ന സംശയത്തില്‍ മറ്റ് നാല് പേരെ കസ്റ്റഡിയില്‍ എടുത്തിട്ടുണ്ട്. പ്രകടനത്തെ അഭിസംബോധന ചെയ്ത ഒരു ലേബര്‍ എം പി പറഞ്ഞത് പേരിന് മാത്രമായുള്ള വെടിനിര്‍ത്തല്‍ ഒരിക്കലും ഒരു വെടി നിര്‍ത്തല്‍ അല്ല എന്നായിരുന്നു. അക്രമങ്ങള്‍ അഴിച്ചു വിടുന്നത് തടയാന്‍ യു കെ ഇടപെടണമെന്നും കാല്‍ഫാം ആന്‍ഡ് ബ്രിക്സ്റ്റണ്‍ എം പി റിബിയെറോ ആഡി ആവശ്യപ്പെട്ടു.
രാഷ്ട്രീയ നേതാക്കള്‍, ഈ വെടിനിര്‍ത്തലിന്റെ പേരില്‍ സ്വയം അഭിനന്ദിക്കുമ്പോഴും, യഥാര്‍ത്ഥത്തില്‍ ഗാസയില്‍ വംശഹത്യ തുടരുകയാണെന്നും വൈറ്റ്‌ഹോളില്‍ വെച്ച് പ്രകടനത്തെ അഭിമുഖീകരിച്ച് സംസാരിച്ച റിബിയെറോ ആഡി ആരോപിച്ചു. വിദേശ പങ്കാളികളുടെ സുരക്ഷയ്ക്കായി മാത്രമാണ് വെടി നിര്‍ത്തല്‍ ഉണ്ടാക്കിയിരിക്കുന്നതെന്നും അദ്ദേഹം ആരോപിച്ചു. യു കെയുടെ പങ്കില്‍ മാറ്റം വന്നിട്ടില്ല. നയങ്ങള്‍ വഴി ഇവിടെ അമ്രകത്തെ പ്രോത്സാഹിപ്പിക്കുമ്പോള്‍ ഒരിക്കലും വിദേശങ്ങളില്‍ സമാധാനം വേണമെന്ന് ആവശ്യപ്പെടാന്‍ അവില്ലെന്നും അദ്ദേഹം ചൂണ്ടിക്കാട്ടി.
ബ്രിട്ടന്‍ ഇപ്പോഴും ഇസ്രയേലിലേക്ക് ആയുധങ്ങള്‍ കയറ്റുമതി ചെയ്യുന്നതിനുള്ള ലൈസന്‍സ് നല്‍കുന്നുണ്ട്. അതിനെ പരാമര്‍ശിച്ചായിരുന്നു എം പി അത് പറഞ്ഞത്. മാത്രമല്ല, ഇസ്രയേലുമായുള്ള പ്രതിരോധ സഖ്യത്തെ ഇപ്പോഴും ബ്രിട്ടന്‍ അംഗീകരിക്കുന്നുമുണ്ട്. അന്താരാഷ്ട്ര നിയമങ്ങള്‍ അനുസരിച്ച് വംശഹത്യ തുടരുന്ന ഒരു രാജ്യത്തിന്റെ സൈന്യത്തെ ബ്രിട്ടന്‍ ഇപ്പോഴും പിന്താങ്ങുകയാണെന്നാണ് എം പി ആരോപിക്കുന്നത്. 1978 മുതല്‍ എല്ലാ നവംബര്‍ 29 നും ഐക്യരാഷ്ട്ര സഭ സംഘടിപ്പിക്കുന്ന പാലസ്തീന്‍ ജനതയോടുള്ള ഐക്യദാര്‍ഢ്യ പ്രഖ്യാപന ദിനത്തിന്റെ ഭാഗമായിട്ടായിരുന്നു ഇന്നലെ നടന്ന റാലി.