'മോദിയും അമിത്ഷായും കുറ്റകരമായ പ്രതികാര രാഷ്ട്രീയം തുടരുന്നു; നാഷണല്‍ ഹെറാള്‍ഡ് കേസ് പൂര്‍ണമായും വ്യാജ കേസ്; സോണിയക്കും രാഹുലിനുമെതിരായ എഫ്.ഐ.ആറില്‍ കോണ്‍ഗ്രസ്
നാഷണല്‍ ഹെറാള്‍ഡ് കേസ് പൂര്‍ണമായും വ്യാജ കേസ്
ന്യൂഡല്‍ഹി: നാഷണല്‍ ഹെറാള്‍ഡ് കേസില്‍ സോണിയ ഗാന്ധിക്കും രാഹുല്‍ ഗാന്ധിക്കുമെതിരെ ഡല്‍ഹി പൊലീസ് എഫ്.ഐ.ആര്‍ ഫയല്‍ ചെയ്തതിനെതിരെ ആഞ്ഞടിച്ചു കോണ്‍ഗ്രസ്. പാര്‍ട്ടിയുടെ ഉന്നത നേതൃത്വത്തിനെതിരെ മോദിയും അമിത് ഷായും ചേര്‍ന്ന് ഉപദ്രവം, ഭീഷണിപ്പെടുത്തല്‍ എന്നിവയുടെ 'പ്രതികാര രാഷ്ട്രീയം' തുടരുകയാണെന്ന് കോണ്‍ഗ്രസ് ആരോപിച്ചു. 'ഭീഷണിപ്പെടുത്തുന്നവര്‍ സ്വയം അരക്ഷിതരും ഭയമുള്ളവരുമാണ്. നാഷണല്‍ ഹെറാള്‍ഡ് കേസ് പൂര്‍ണമായും വ്യാജ കേസാണ്. സത്യം ഒടുവില്‍ വിജയിക്കുമെന്നും' പാര്‍ട്ടി ജനറല്‍ സെക്രട്ടറി ജയ്‌റാം രമേശ് പറഞ്ഞു. കോണ്‍ഗ്രസ് പാര്‍ട്ടി നേരത്തെ തന്നെ ഈ അന്വേഷണത്തെ 'വറും പ്രതികാര തന്ത്രങ്ങള്‍' എന്നാരോപിക്കുകയും ഇ. ഡിയെ ബി.ജെ.പിയുടെ 'സഖ്യ പങ്കാളി' എന്ന് വിശേഷിപ്പിക്കുകയും ചെയ്തിരുന്നു.
പാര്‍ട്ടി കുടുംബം വ്യക്തിപരമായ നേട്ടങ്ങള്‍ക്കായി അവരുടെ സ്ഥാനം ദുരുപയോഗം ചെയ്തുവെന്ന് ആരോപിക്കുന്ന ഉന്നതതല കേസില്‍, എന്‍ഫോഴ്സ്മെന്റ് ഡയറക്ടറേറ്റിന്റെ പരാതിയിലാണ് എഫ്.ഐ.ആര്‍ രജിസ്റ്റര്‍ ചെയ്തത്. കള്ളപ്പണം വെളുപ്പിക്കല്‍ ആരോപിച്ച് ഒക്ടോബര്‍ 3ന് ഡല്‍ഹി പൊലീസിലെ സാമ്പത്തിക കുറ്റകൃത്യ വിഭാഗം ഗാന്ധി കുടുംബത്തിനും മറ്റു ഏഴ് പേര്‍ക്കുമെതിരെ പരാതി നല്‍കിയതായി ഔദ്യോഗിക വൃത്തങ്ങള്‍ പറയുന്നു.
നാഷനല്‍ ഹെറാള്‍ഡ് കേസില്‍ എന്‍ഫോഴ്സ്മെന്റ് ഡയറക്ടറേറ്റ് സമര്‍പ്പിച്ച കുറ്റപത്രത്തിന്റെ അടിസ്ഥാനത്തില്‍ ഡല്‍ഹി കോടതി ശനിയാഴ്ച ഉത്തരവ് പുറപ്പെടുവിക്കുന്നത് മാറ്റിവെച്ചു. പ്രത്യേക ജഡ്ജി വിശാല്‍ ഗോഗ്‌നെ ഉത്തരവ് പ്രഖ്യാപിക്കുന്നത് ഡിസംബര്‍ 16 ലേക്കാണ് മാറ്റിയത്.
ഐ.പി.സിയിലെ 120 ബി (ക്രിമിനല്‍ ഗൂഢാലോചന), 403 (സത്യസന്ധമല്ലാത്ത സ്വത്ത് ദുരുപയോഗം), 406 (ക്രിമിനല്‍ വിശ്വാസ ലംഘനത്തിനുള്ള ശിക്ഷ), 420 (വഞ്ചന) എന്നീ വകുപ്പുകള്‍ പ്രകാരമാണ് പൊലീസ് എഫ്.ഐ.ആറില്‍ കേസെടുത്തിരിക്കുന്നത്. ഗാന്ധി കുടുംബം, കോണ്‍ഗ്രസ് നേതാക്കളായ സുമന്‍ ദുബെ, സാം പിത്രോഡ, യങ് ഇന്ത്യ, ഡോട്ടെക്‌സ് മെര്‍ച്ചന്‍ഡൈസ് ലിമിറ്റഡ് തുടങ്ങിയ സ്ഥാപനങ്ങള്‍, ഡോട്ടെക്‌സ് പ്രൊമോട്ടര്‍ സുനില്‍ ഭണ്ഡാരി, അസോസിയേറ്റഡ് ജേണല്‍സ് ലിമിറ്റഡ് (എ.ജെ.എല്‍) തുടങ്ങിയ സ്ഥാപനങ്ങള്‍ തുടങ്ങിയ പേരുകളാണ് എഫ്.ഐ.ആറില്‍ ഉള്‍പ്പെടുത്തിയിരിക്കുന്നത്.