അമേരിക്കയുമായി മികച്ച വ്യാപാരക്കരാര്‍ ഉണ്ടാക്കും; ഇന്ത്യയെ തോക്കിന്‍മുനയില്‍ നിര്‍ത്താന്‍ ആർക്കും സാധിക്കില്ല; ആദ്യം നമ്മുടെ രാജ്യം എന്നതാണ് സമീപനം; പ്രതികരണവുമായി പീയൂഷ് ഗോയല്‍
ഡൽഹി: ഇന്ത്യയെ തോക്കിന്‍മുനയില്‍ നിര്‍ത്താന്‍ ആർക്കും സാധിക്കില്ലെന്നും ആദ്യം ഇന്ത്യ എന്നതാണ് സമീപനമെന്നും കേന്ദ്ര വാണിജ്യ മന്ത്രി പീയൂഷ് ഗോയല്‍ വ്യക്തമാക്കി. ഇന്ത്യയും യുഎസും തമ്മില്‍ മികച്ച വ്യാപാരക്കരാര്‍ ഉണ്ടാക്കുമെന്നും 2030 ഓടെ യുഎസുമായുള്ള വ്യാപാരം ഇരട്ടിയാക്കും എന്നും അത് 50000 കോടി ഡോളര്‍ ആയി ഉയര്‍ത്തുമെന്നും പീയൂഷ് ഗോയല്‍ വ്യക്തമാക്കി. ഇന്ത്യക്കെതിരെ യുഎസ് ചുമത്തിയ ഉയര്‍ന്ന തീരുവ അടുത്ത 90 ദിവസത്തേക്ക് മരവിപ്പിച്ച സാഹചര്യത്തിലാണ് പീയൂഷ് ഗോയലിന്റെ പ്രതികരണം.
യുഎസുമായി വ്യാപാരക്കരാര്‍ ഉണ്ടാക്കുമ്പോഴും ഇന്ത്യയുടെ ദേശീയ താല്‍പര്യങ്ങള്‍ സംരക്ഷിക്കുമെന്നും സമ്മര്‍ദ്ദത്തിനടിമപ്പെട്ട് ഒരു കരാറും ഉണ്ടാക്കില്ലെന്നും പീയൂഷ് ഗോയല്‍ വ്യക്തമാക്കി. എന്തായാലും ഇന്ത്യയെ തോക്കിന്‍മുനയില്‍ നിര്‍ത്തി കരാര്‍ ഒപ്പിടീക്കാന്‍ കഴിയില്ലെന്നും പീയൂഷ് കൂട്ടിച്ചേർത്തു.
വ്യാപാരക്കരാര്‍ സമയബന്ധിതമായി പൂര്‍ത്തിയാക്കണമെന്ന് യുഎസ് പറയുന്നത് നല്ലതാണ്. രാജ്യത്തിന്റെയും ഇവിടുത്തെ ജനങ്ങളുടെയും താല്‍പര്യങ്ങള്‍ സംരക്ഷിക്കാന്‍ കഴിയാത്തിടത്തോളം തിരക്ക് പിടിക്കുന്നതില്‍ അര്‍ത്ഥമില്ലെന്നും അദ്ദേഹം വ്യക്തമാക്കി.