'സന്ദീപ് വാര്യരെ ആര്‍ക്കും വിട്ടുകൊടുക്കില്ല': അനുനയവുമായി ആര്‍എസ്എസും ബിജെപിയും; ആര്‍എസ്എസ് വിശേഷ് സമ്പര്‍ക്ക പ്രമുഖ് ജയകുമാറും ബിജെപി നേതാവ് പി ആര്‍ ശിവശങ്കറും സന്ദീപിന്റെ വീട്ടിലെത്തി; ഒരുവിഷമം ഉണ്ടായെങ്കില്‍ തങ്ങള്‍ അതുതീര്‍ത്തോളാമെന്ന് ശിവശങ്കരന്‍
സന്ദീപ് വാര്യരെ ആര്‍ക്കും വിട്ടുകൊടുക്കില്ല
പാലക്കാട്: ബിജെപി സംസ്ഥാന നേതൃത്വത്തോട് ഇടഞ്ഞുനില്‍ക്കുന്ന സന്ദീപ് ജി വാര്യരെ അനുനയിപ്പിക്കാന്‍ ആര്‍എസ്എസിന്റെയും ബിജെപിയുടെയും ശ്രമം. പാലക്കാട്ടെ പ്രചാരണത്തില്‍ നിന്ന് വിട്ടുനില്‍ക്കുന്ന സന്ദീപിനെ ചേര്‍ത്ത് നിര്‍ത്താനാണ് തീരുമാനം. ആര്‍എസ്എസ് വിശേഷ് സമ്പര്‍ക്ക പ്രമുഖ് എ ജയകുമാര്‍ സന്ദീപ് വാര്യരുമായി കൂടിക്കാഴ്ച നടത്തി.
നേരത്തെ ബിജെപി സംസ്ഥാന സമിതിയംഗം പി.ആര്‍ ശിവശങ്കറും സന്ദീപ് വാര്യരെ വീട്ടിലെത്തി സന്ദര്‍ശിച്ചിരുന്നു. വ്യക്തിപരമായ കൂടിക്കാഴ്ചയെന്നാണ് ശിവശങ്കര്‍ വ്യക്തമാക്കിയത്. 'സന്ദീപിന് ഒരുവിഷമം ഉണ്ടെങ്കില്‍ ഞങ്ങള്‍ അതുതീര്‍ത്തോളാം. ഒരാളെയും പാര്‍ട്ടിയില്‍ നിന്ന് വിടില്ലെന്നും' അദ്ദേഹം പറഞ്ഞു. കൂടിക്കാഴ്ച പാര്‍ട്ടിപരമല്ലെന്നും വ്യക്തിപരമാണെന്നും ശിവശങ്കരന്‍ മാധ്യമങ്ങളോട് പറഞ്ഞു.
വ്യക്തിപരമായ കൂടിക്കാഴ്ചയ്ക്കായാണ് സന്ദീപ് വാര്യരുടെ വീട്ടിലെത്തിയത്. അദ്ദേഹത്തിനുണ്ടായ വിഷമം പങ്കുവെക്കാന്‍ ഒരു സുഹൃത്തെന്ന നിലയിലാണ് വന്നത്. ഇപ്പോള്‍ സംസാരിക്കുന്നതിന്റെ വിശദാംശങ്ങള്‍ പാര്‍ട്ടി അനുവാദം തന്നല്ലാതെ പുറത്തുപറയില്ല. സന്ദീപിനുണ്ടായ വിഷമം പാര്‍ട്ടിക്കുള്ളില്‍ പറഞ്ഞു തീര്‍ക്കും. ഈ പാര്‍ട്ടിയില്‍ നിന്ന് ആരെങ്കിലും പുറത്തുപോകുമെന്നും മറ്റൊരു പാര്‍ട്ടിയില്‍ ചേരുമെന്നും ആരും പ്രതീക്ഷിക്കണ്ടെന്നും ശിവശങ്കരന്‍ മാധ്യമങ്ങളോട് പറഞ്ഞു.
സമവായമല്ല പരിഹാരമായിരുന്നു തനിക്ക് വേണ്ടിയിരുന്നതെന്നും അതിന്റെ സമയം കഴിഞ്ഞെന്നും സന്ദീപ് വാര്യര്‍ നേരത്തെ പ്രതികരിച്ചിരുന്നു. തനിക്ക് നിരവധി അപമാനങ്ങള്‍ നേരിടേണ്ടിവന്നെന്നും ആത്മാഭിമാനത്തിന് മുറിവേറ്റെന്നും അദ്ദേഹം പറഞ്ഞു. ഒറ്റ ഫോണ്‍ കോളില്‍ തീര്‍ക്കാമായിരുന്ന പ്രശ്നം വഷളാക്കി. തനിക്ക് നിരവധി അപമാനങ്ങള്‍ നേരിടേണ്ടി വന്നുവെന്നും ആത്മാഭിമാനത്തിന് മുറിവേറ്റെന്നും അദ്ദേഹം പറഞ്ഞു. പാര്‍ട്ടി നടപടി ഭയപ്പെടുന്നില്ല. ഒരു തരത്തിലും ഭയപ്പെടാന്‍ ഉദ്ദേശിക്കുന്നില്ല. ബിജെപി പ്രവര്‍ത്തകനായി തുടരുമെന്നും സന്ദീപ് വാരിയര്‍ പറഞ്ഞു.
ബിജെപി നേതൃത്വത്തിനെതിരെ പ്രത്യേകിച്ച് പാലക്കാട്ടെ സ്ഥാനാര്‍ഥി സി.കൃഷ്ണകുമാറിനെ ഉന്നമിട്ട് കുറിച്ച ഫെയ്‌സ്ബുക്ക് പോസ്റ്റിന് പിന്നാലെ മാധ്യമങ്ങളെ കണ്ടപ്പോഴാണ് സന്ദീപ് വാര്യര്‍ തുറന്നടിച്ചത്. പാലക്കാട്ടെ ബിജെപിയില്‍ നിരന്തര അവഗണന നേരിട്ടു. അപമാനിതനായതിനാല്‍ പാലക്കാട്ട് പ്രചാരണത്തിനിറങ്ങില്ലെന്നും സി.കൃഷ്ണകുമാര്‍ സ്ഥിരം സ്ഥാനാര്‍ഥിയാണെന്നും അദ്ദേഹം പറഞ്ഞു
ലോക്‌സഭാ തിരഞ്ഞെടുപ്പ് സമയത്തെ ഒഴിവാക്കലുകള്‍ ഉള്‍പ്പെടെ ഒരുപാട് പരിപാടികളില്‍നിന്ന് എന്നെ മാറ്റിനിര്‍ത്തി. പ്രധാനമന്ത്രിയോ മറ്റ് കേന്ദ്രമന്ത്രിമാരോ വരുന്ന പരിപാടികള്‍ എന്നെ അറിയിച്ചില്ല. അഖിലേന്ത്യാ പ്രസിഡന്റ് വന്ന പരിപാടിയും എന്നെ അറിയിച്ചില്ല. ജില്ലയുടെ പ്രധാനപ്പെട്ട വാട്‌സ്ആപ്പ് ഗ്രൂപ്പില്‍പോലും ഇടംനല്‍കിയില്ലെന്നും അദ്ദേഹം മാധ്യമങ്ങളോട് പറഞ്ഞു.
സംഘടനയോട് ആത്മാര്‍ഥതയുള്ള ഒരാള്‍ക്കും തിരഞ്ഞെടുപ്പ് പ്രവര്‍ത്തനങ്ങളില്‍ നിന്ന് മാറിനില്‍ക്കാനാകില്ല എന്നത് 2021-ലും ഓര്‍മവേണമായിരുന്നു- കൃഷ്ണകുമാറിന്റെ പ്രസ്താവനയോട് അദ്ദേഹം പ്രതികരിച്ചു. ഞാന്‍ നേരിട്ട വിഷമം പാര്‍ട്ടിയിലെ മുതിര്‍ന്ന ആളുകളെ അറിയിച്ചിരുന്നു. അവര്‍ വരും എന്നെ ആശ്വസിപ്പിക്കും എന്ന് പ്രതീക്ഷിച്ചെങ്കിലും അതുണ്ടായില്ല. ഇന്നാണ് സംസ്ഥാന ജനറല്‍ സെക്രട്ടറി സുധീര്‍ വരുന്നത്. ആശ്വാസവാക്കല്ല, പ്രവര്‍ത്തിക്കണം എന്ന് മാത്രമാണ് അവര്‍ എന്നോട് പറയുന്നത്.എന്നെ സംസ്ഥാന പ്രസിഡന്റ് വിളിച്ചിരുന്നു. പ്രചാരണത്തിന് ഇറങ്ങണം എന്നാണ് എന്നോട് അദ്ദേഹം പറഞ്ഞത്.
അഞ്ചോ ആറോ ദിവസമായി. പ്രചരണത്തിന് വരണമെന്നതിനപ്പുറം ഏതെങ്കിലും ക്രിയാത്മകമായ നടപടി ഉണ്ടായില്ല. കൃഷ്ണകുമാറിനേക്കാള്‍ പ്രായം കുറഞ്ഞയാള്‍ എന്ന നിലയ്ക്ക് അദ്ദേഹത്തിന്റെ സാമീപ്യം ആഗ്രഹിച്ച നിമിഷങ്ങള്‍ ജീവിതത്തിലുണ്ടായിരുന്നു. ഇനി ഓടിയെത്തണമെന്നില്ല. പ്രതികരിക്കാന്‍ കുറേ ദിവസങ്ങളായി സമ്മര്‍ദമുണ്ടായിരുന്നു. അപ്പോഴൊക്കെ ഞാന്‍ മൗനം പാലിച്ചു. എന്നാല്‍ ആ മൗനത്തിന് വലിയ വില നല്‍കേണ്ടിവരുമെന്ന് എനിക്ക് തോന്നി. അസത്യമായ വാര്‍ത്തകള്‍ പ്രചരിക്കുന്നത് ശ്രദ്ധയില്‍പെട്ടതിന്റെ അടിസ്ഥാനത്തിലാണ് പ്രതികരിക്കാം എന്ന് തീരുമാനിച്ചതെന്ന് അദ്ദേഹം വ്യക്തമാക്കി.
എന്റെ അമ്മ അഞ്ചാറ് വര്‍ഷം കിടപ്പിലായിരുന്നു. ആ സമയത്ത് സംഘത്തിന്റെ കാര്യാലയം നിര്‍മിക്കാനായി അമ്മ സ്ഥലം നല്‍കാന്‍ തയാറായി. എന്നിട്ടും സംസ്ഥാനത്തെ സി. കൃഷ്ണകുമാര്‍ അടക്കമുള്ള പ്രധാനപ്പെട്ട നേതാക്കള്‍ ഇവിടെ വന്നില്ല. പാര്‍ട്ടിയുടേതായി ഒരു റീത്ത് പോലും വെച്ചില്ല-അദ്ദേഹം പറഞ്ഞു
സി.പി.എമ്മിലേക്ക് സ്വാഗതം ചെയ്തെന്ന വാര്‍ത്ത കണ്ടിട്ടില്ലെന്നും വാര്‍ത്ത കണ്ടിട്ട് പ്രതികരിക്കാമെന്നും സന്ദീപ്. എം.ബി.രാജേഷും ബാലേട്ടനുമൊക്കെ സുഹൃത്തുക്കളാണെന്നും സന്ദീപ് വാര്യര്‍ പറഞ്ഞു. നടപടി ഒരു തരത്തിലും ഭയപ്പെടുന്നില്ല . നടപടി എടുക്കാന്‍മാത്രം പാര്‍ട്ടിയില്‍ വലിയ ആളല്ല ഞാന്‍. സമവായമല്ല പരിഹാരമാണ് വേണ്ടത്. അതിന്റെ സമയം കഴിഞ്ഞെന്നും ഞാന്‍ എന്റെ കുട്ടിക്കൊപ്പം സമയം ചെലവഴിച്ച് വീട്ടിലിരിക്കും. പളനിക്ക് പോകുമെന്ന് പറഞ്ഞത് ആലങ്കാരികമായി മാത്രമാണെന്നും സന്ദീപ് വാര്യര്‍ വ്യക്തമാക്കി.
അതേസമയം, കേരളത്തിലെ ബിജെപിയില്‍നിന്ന് ഒരാള്‍ പോയിട്ട് എന്ത് ചെയ്യാനെന്ന് കെ.സുരേന്ദ്രന്‍. സന്ദീപിന്റെ നിലപാട് പാര്‍ട്ടിയെ ബാധിക്കില്ല, തിരഞ്ഞെടുപ്പ് സമയത്തല്ല പരാതി പറയേണ്ടത്. നാളെ മാധ്യമങ്ങള്‍ സന്ദീപിനെ ഉപേക്ഷിക്കുമെന്നും സുരേന്ദ്രന്‍ പ്രതികരിച്ചു.
അതിനിടെ സന്ദീപിന് സ്വാഗതം ചെയ്ത് സിപിഎം രംഗത്തെത്തി. ഇടതുപക്ഷ ജനാധിപത്യ മുന്നണിയുടെ രാഷ്ട്രീയകാര്യങ്ങള്‍ സംബന്ധിച്ച് കൃത്യമായ നിലപാട് സ്വീകരിക്കുന്ന എല്ലാവരെയും സ്വാഗതം ചെയ്യും എന്നായിരുന്നു പാര്‍ട്ടി സെക്രട്ടറി എം.വി ഗോവിന്ദന്റെ മറുപടി.
പാര്‍ട്ടിയുമായി ഇടഞ്ഞുനില്‍ക്കുന്ന സന്ദീപ് വാര്യരെ സിപിഎമ്മിലേക്ക് സ്വാഗതം ചെയ്യുമോ എന്ന ചോദ്യത്തോട് പ്രതികരിക്കുകയായിരുന്നു അദ്ദേഹം. വ്യക്തികളല്ല നയമാണ് പ്രശ്നം, ഇടതുപക്ഷത്തിന് അനുകൂലമായ നയം സ്വീകരിച്ചാല്‍ സന്ദീപിനെ സ്വീകരിക്കും. മുന്‍പും സമാനമായ കാഴ്ചപ്പാടുള്ള വരെ സിപിഎം സ്വീകരിച്ചിട്ടുണ്ടെന്നും എം.വി ഗോവിന്ദന്‍ വ്യക്തമാക്കിയിരുന്നു.മാനസികമായി പ്രയാസങ്ങള്‍ നേരിട്ടിട്ടുണ്ടെന്നും ആത്മാഭിമാനം പരമ പ്രധാനമാണെന്നും കുറിച്ച് സന്ദീപ് പങ്കുവെച്ച ഫേസ്ബുക്ക് പോസ്റ്റാണ് ചര്‍ച്ചകള്‍ക്ക് തുടക്കം കുറിച്ചത്.