'കേരളത്തില്‍ കൊടുക്കുന്ന റേഷന്‍ അരി മുഴുവന്‍ മോദിയുടേത്; പിണറായിയുടേതായി ഒരുമണി അരി പോലും ഇല്ല; ജനങ്ങളുടെ അവകാശമായതിനാലാണ് ഇതുവരെ പറയാതിരുന്നത്'; ഇനി വിളിച്ചു പറയേണ്ടി വരുമെന്ന് കേന്ദ്രമന്ത്രി ജോര്‍ജ് കുര്യന്‍
തിരുവനന്തപുരം: കേരളത്തില്‍ വിതരണം ചെയ്യുന്ന മുഴുവന്‍ റേഷന്‍ അരിയും കേന്ദ്രത്തിന്റെതാണെന്ന് കേന്ദ്രമന്ത്രി ജോര്‍ജ് കുര്യന്‍. പിണാറായി വിജയന്റെ ഒരുമണി അരി അതിലില്ല. മുഴുവന്‍ അരിയും മോദിയുടെത്. ജനങ്ങളുടെ അവകാശമായതിനാലാണ് ഇതുവരെ പറയാതിരുന്നത്. ഇനിയിപ്പോള്‍ ഇത് വിളിച്ചു പറയാന്‍ ബി.ജെ.പി പ്രവര്‍ത്തകരോട് പറയേണ്ടി വരുമെന്നും ജോര്‍ജ് കുര്യന്‍ പറഞ്ഞു.
കേരളത്തിലെ എല്ലാ വികസന പ്രവര്‍ത്തനങ്ങളിലും ക്ഷേമ പ്രവര്‍ത്തനങ്ങളിലും കേന്ദ്രസര്‍ക്കാരും പങ്കാളികളാണ്. ഉത്സവാന്തരീക്ഷങ്ങളിലെങ്കിലും അനാവശ്യ വിവാദങ്ങള്‍ ഉണ്ടാക്കരുത്. ഇത് നേതാക്കളോടുള്ള അഭ്യര്‍ത്ഥനയാണെന്നും ജോര്‍ജ് കുര്യന്‍ പറഞ്ഞു.
ഓണക്കാലത്ത് ടൈഡ് ഓവര്‍ വിഹിതത്തിന്റെ വിലയായ കിലോഗ്രാമിന് 8.30 രൂപയ്ക്ക് അരി നല്‍കണമെന്ന് കേരളം ആവശ്യപ്പെട്ടിട്ടും ഒരു മണി അരി പോലും അധികമായി നല്‍കാന്‍ കേന്ദ്രം തയാറായില്ലെന്നു മുഖ്യമന്ത്രി പിണറായി വിജയന്‍ പറഞ്ഞതിന് പിന്നാലെയാണ് കേന്ദ്രമന്ത്രിയുടെ പ്രതികരണം.
''സംസ്ഥാനത്ത് നല്‍കുന്ന അരി മുഴുവന്‍ തങ്ങളുടെതാണെന്നാണ് സംസ്ഥാന സര്‍ക്കാര്‍ പറയുന്നത്. ഇതില്‍ ഒരു മണിപോലും പിണറായി വിജയന്റെതായി ഇല്ല. എല്ലാ ഉത്സവ അവസരങ്ങളിലും കേന്ദ്രത്തിന് ഇത് പറയാമല്ലോ. ജനങ്ങളുടെ അവകാശാമായതുകൊണ്ടാണ് കേന്ദ്രസര്‍ക്കാര്‍ പറയാതിരിക്കുന്നത്. ഈ അവസരത്തില്‍ കേരളത്തിലെ ബിജെപി പ്രവര്‍ത്തകരോട് അഭ്യര്‍ഥിക്കുകയാണ്; ഇത് ദിവസവും പറയുക എന്നതാണ്. കേരളത്തില്‍ നടക്കുന്ന എല്ലാ വികസനപ്രവര്‍ത്തനവും കേന്ദ്രസര്‍ക്കാരിന്റെ പൂര്‍ണമായ പണത്തിലും സഹകരണത്തിലുമാണ്''. കേന്ദ്രം ഒരുതരത്തിലും കേരളത്തെ അവഗണിക്കുന്നില്ലെന്നും ജോര്‍ജ് കുര്യന്‍ പറഞ്ഞു.
സംസ്ഥാന സര്‍ക്കാര്‍ ചെയ്യുന്നതിനെയും കേന്ദ്രസര്‍ക്കാര്‍ ചെയ്യുന്നതിനെയും അംഗീകരിക്കണമെന്നും കുര്യന്‍ പറഞ്ഞു, ഉത്സവാസരത്തിലെങ്കിലും അനാവശ്യവിവാദങ്ങള്‍ ഒഴിവാക്കുകയും ജനങ്ങളുടെ മനസിലെ ശോഭ കെടുത്താതിരിക്കുകയും വേണമെന്ന് കുര്യന്‍ പറഞ്ഞു.
സംസ്ഥാനത്തിന് കേന്ദ്രം നല്‍കുന്ന ഭക്ഷ്യ വസ്തുക്കളുടെ കണക്കുകളും ജോര്‍ജ് കുര്യന്‍ വിശദീകരിച്ചു. 1,18,754 മെട്രിക് ടണ്‍ ഭക്ഷ്യ വസ്തുക്കളാണ് ഒരു മാസം കേന്ദ്രം കേരളത്തിന് നല്‍കുന്നത്. അതില്‍ ഭക്ഷ്യസുരക്ഷാ പദ്ധതിയുടെ അടിസ്ഥാനത്തില്‍ നല്‍കുന്ന 69831 മെട്രിക് ടണ്‍ അരിയും 15629 മെട്രിക് ടണ്‍ ഗോതമ്പുമാണ്. ടൈഡ്ഓവര്‍ പ്രകാരം 33294 മെട്രിക് ടണ്‍ അരി അല്ലാതെയും നല്‍കുന്നു. 8.30 രൂപയ്ക്കാണ് ഈ അരി കേന്ദ്ര നല്‍കുന്നത്. അത് കേരളത്തില്‍ 42 ലക്ഷത്തോളം കുടുംബങ്ങള്‍ക്കാണ് കേന്ദ്രത്തിന്റെ സൗജന്യ അരി ലഭിക്കുന്നത്. ഓണംപോലെയുള്ള അവസരങ്ങള്‍ ആറ് മാസത്തെ അരി അഡ്വാന്‍സായി സംസ്ഥാനത്തിന് എടുത്ത് വിതരണം ചെയ്യാം. കൂടാതെ 22.5 രൂപയ്ക്കും അരി വാങ്ങാം. ഇതെല്ലാം മോദി അരിയാണെന്നും ജോര്‍ജ് കുര്യന്‍ പറഞ്ഞു.