പ്രഫഷനല്‍ സംഘത്തെ നിയോഗിച്ച് സോഷ്യല്‍ മീഡിയ സംഘത്തെ ശക്തമാക്കും; സമൂഹമാധ്യമ പ്രവര്‍ത്തനങ്ങളുടെ മേല്‍നോട്ടത്തിനു മുതിര്‍ന്ന നേതാക്കളുടെ മോണിറ്ററിങ് ടീം വരും; ഇനി കര്‍ശനമായ മാര്‍ഗനിര്‍ദ്ദേശങ്ങളും നിയന്ത്രണ സംവിധാനങ്ങളും; കെപിസിസിയുടെ സോഷ്യല്‍ മീഡിയ സെലിന് നാഥനായി ഹൈബി ഈഡന്‍; ബല്‍റാമിന് പകരം ഈഡന്‍ എത്തുന്നത് ഹൈക്കമാണ്ട് താല്‍പ്പര്യത്തില്‍
തിരുവനന്തപുരം: വിവാദങ്ങള്‍ക്കു പിന്നാലെ കെപിസിസി ഡിജിറ്റല്‍ മീഡിയ സെല്ലിന്റെ തലപ്പത്ത് അഴിച്ചുപണി. സെല്ലിന്റെ ചുമതല എറണാകുളം എംപി ഹൈബി ഈഡനു നല്‍കി. കോണ്‍ഗ്രസ് ദേശീയ നേതൃത്വത്തിന്റേതാണ് തീരുമാനം. പ്രഫഷനല്‍ സംഘത്തെ നിയോഗിച്ച് സോഷ്യല്‍ മീഡിയ സംഘത്തെ ശക്തമാക്കുമെന്ന് ഹൈബി ഈഡന്‍ പറഞ്ഞു. ബീഡി- ബിഹാര്‍ പോസ്റ്റിനു പിന്നാലെ വി.ടി. ബല്‍റാം സെല്ലിന്റെ ചെയര്‍മാന്‍ സ്ഥാനം ഒഴിഞ്ഞെങ്കിലും കെപിസിസി രാജി സ്വീകരിച്ചിരുന്നില്ല. തിരഞ്ഞെടുപ്പ് അടുത്തിരിക്കെ, ദേശീയ നേതൃത്വത്തിന്റെ നേരിട്ടുള്ള നിരീക്ഷണത്തില്‍ ആയിരിക്കും പുതിയ ടീമിന്റെ പ്രവര്‍ത്തനം. സമൂഹമാധ്യമ പ്രവര്‍ത്തനങ്ങളുടെ മേല്‍നോട്ടത്തിനു മുതിര്‍ന്ന നേതാക്കളുടെ മോണിറ്ററിങ് ടീം ഉണ്ടായിരിക്കുമെന്നാണ് വിവരം. കര്‍ശനമായ മാര്‍ഗനിര്‍ദ്ദേശങ്ങളും നിയന്ത്രണ സംവിധാനങ്ങളും കൊണ്ടുവരും.
കെപിസിസി ഡിജിറ്റല്‍ മീഡിയ സെല്ലിന്റെ പേരും മാറ്റി. ഇനി മുതല്‍ സോഷ്യല്‍ മീഡിയ സെല്‍ എന്നായിരിക്കും അറിയപ്പെടുക. ദേശീയ തലത്തിലും മറ്റു സംസ്ഥാന ഘടകങ്ങളിലും സോഷ്യല്‍ മീഡിയ സെല്‍ എന്നാണ് അറിയപ്പെടുന്നത്. കേരളത്തില്‍ മാത്രമായിരുന്നു ഇതുവരെ ഡിജിറ്റല്‍ മീഡിയ സെല്‍ എന്ന് അറിയപ്പെട്ടിരുന്നത്. ഡിജിറ്റല്‍ മീഡിയ സെല്ലിന്റെ പ്രവര്‍ത്തനത്തില്‍ പ്രതിപക്ഷ നേതാവ് വി.ഡി. സതീശന് ഉള്‍പ്പെടെയുള്ളവര്‍ക്ക് അതൃപ്തിയുണ്ടായിരുന്നു. രാഹുല്‍ മാങ്കൂട്ടത്തില്‍ വിഷയത്തില്‍ സതീശന് എതിരെ സൈബര്‍ ആക്രമണം അതിരുവിട്ടതായിരുന്നു ഇതിന് കാരണം. പാര്‍ട്ടി നയം പാലിച്ചുള്ള സോഷ്യല്‍ മീഡിയാ ഇടപെടല്‍ മാത്രമേ ഇനി അനുവദിക്കൂ.
സെപ്തംബര്‍ മാസത്തില്‍ കോണ്‍ഗ്രസ് കേരള ഘടകത്തിന്റെ ബീഡി-ബീഹാര്‍ പോസ്റ്റ് വിവാദമായിരുന്നു. അതിന് പിന്നാലെ വി.ടി. ബല്‍റാം രാജിവെച്ചുവെന്ന വിവരം പുറത്തുവന്നത്. എന്നാല്‍ വി.ടി. ബല്‍റാമിന്റെ രാജി കെ.പി.സി.സി അംഗീകരിച്ചിരുന്നില്ല. ചെയര്‍മാന്‍ സ്ഥാനത്ത് തുടരണമെന്ന് ആവശ്യപ്പെടുകയും ചെയ്തിരുന്നു. ജി.എസ്.ടി പരിഷ്‌കരണത്തെ പരിഹസിച്ച് കോണ്‍ഗ്രസിന്റെ കേരള ഘടകം എക്‌സില്‍ പോസ്റ്റ് ചെയ്ത കുറിപ്പാണ് വിവാദമായത്.
'ബീഡിയും ബിഹാറും തുടങ്ങുന്നത് ബിയില്‍ നിന്നാണ്' എന്ന പോസ്റ്റാണ് വിവാദത്തിന് തിരിക്കൊളുത്തിയത്. ബിഹാറില്‍ രാഹുല്‍ ഗാന്ധിയുടെ വോട്ട് അധികാര്‍ യാത്ര സമാപിച്ചതിന് തൊട്ടുപിന്നാലെയായിരുന്നു വിവാദ പോസ്റ്റ്. പുകയില ഉല്‍പന്നങ്ങളുടെ ജി.എസ്.ടി വെട്ടിക്കുറച്ചതിനെ ഉദ്ദേശിച്ചായിരുന്നു കോണ്‍ഗ്രസിന്റെ പോസ്റ്റ്. ബിഹാറിനെ ഇകഴ്ത്തി കാണിച്ചെ പറഞ്ഞായിരുന്നു വിവാദം ഉണ്ടായത്. ബി.ജെ.പിയും തേജസ്വി യാദവും ഇടതുപക്ഷവും അടക്കമുള്ളവര്‍ പ്രതിഷേധം ഉയര്‍ത്തിയതോടെ പോസ്റ്റ് നീക്കം ചെയ്തു.
പുകയില ഉല്‍പ്പന്നങ്ങളുടെ ജി.എസ്.ടി വെട്ടിക്കുറച്ചതിനാല്‍ ഇനി അത് പാപമായി കണക്കാക്കാന്‍ കഴിയില്ലെന്നും പോസ്റ്റില്‍ പറഞ്ഞിരുന്നു. ബി.ജെ.പി ദേശീയതലത്തില്‍ തന്നെ ഈ പോസ്റ്റ് ചര്‍ച്ചാവിഷയമാക്കി. പോസ്റ്റിനെക്കുറിച്ച് പാര്‍ട്ടിക്കുള്ളിലും ഇന്ത്യാ സഖ്യത്തിലും വന്‍ എതിര്‍പ്പാണ് ഉണ്ടായത്. ബിഹാറിനെ കോണ്‍ഗ്രസ് അവഹേളിച്ചെന്ന് ഉപമുഖ്യമന്ത്രി സാമ്രാട്ട് ചൗധരി വിമര്‍ശിച്ചു.
എ.ഐ.സി.സിയും സംസ്ഥാന നേതൃത്വത്തെ കടുത്ത എതിര്‍പ്പ് അറിയിച്ചു. ഇതെല്ലാം മാറ്റങ്ങള്‍ക്ക് കാരണമായി. രാഹുല്‍ മാങ്കൂട്ടത്തില്‍ വിഷയത്തില്‍ സൈബര്‍ ആക്രമണം വന്‍ വിവാദമായതോടെയാണ് ബെല്‍റാം സ്ഥാനം ഒഴിയാന്‍ തീരുമാനിച്ചത്. രാഹുല്‍ എംഎല്‍എ സ്ഥാനം ഒഴിയാന്‍ സമ്മര്‍ദ്ദം ചെലുത്തിയ വി ഡി സതീശനെതിരെ വ്യാപക സൈബര്‍ ആക്രമണം ഉണ്ടായത് തര്‍ക്കങ്ങള്‍ക്കും വിവാദങ്ങള്‍ക്കും വഴിവെച്ചിരുന്നു.