17 റൺസ് വഴങ്ങി വീഴ്ത്തിയത് മൂന്ന് വിക്കറ്റുകൾ; സയ്യിദ് മുഷ്താഖ് അലി ട്രോഫിയിൽ തിളങ്ങി അർജുൻ തെണ്ടുൽക്കർ; ചണ്ഡിഗഢിനെതിരെ ഗോവയ്ക്ക് ജയം

ഗോവ: ഇന്ത്യൻ പ്രീമിയർ ലീഗിന് (ഐ.പി.എൽ) മാസങ്ങൾ മാത്രം ബാക്കിനിൽക്കെ, സയ്യിദ് മുഷ്താഖ് അലി ട്രോഫിയിൽ ഗോവയ്ക്ക് വേണ്ടി മികച്ച പ്രകടനം കാഴ്ചവെച്ച് അർജുൻ തെണ്ടുൽക്കർ. ചണ്ഡിഗഢിനെതിരായ മത്സരത്തിൽ 4 ഓവറിൽ വെറും 17 റൺസ് മാത്രം വഴങ്ങി മൂന്ന് നിർണായക വിക്കറ്റുകൾ വീഴ്ത്തിയാണ് അർജുൻ തന്റെ ബൗളിംഗ് മികവ് തെളിയിച്ചത്.

ആദ്യ ഓവറിൽ തന്നെ ചണ്ഡിഗഢ് ബാറ്റർ ശിവം ബാംബ്രിയെ ക്ലീൻ ബൗൾഡാക്കി അർജുൻ വിക്കറ്റ് വേട്ടയ്ക്ക് തുടക്കമിട്ടു. തുടർന്ന് അർജുൻ ആസാദ്, ജഗ്ജിത് സിംഗ് എന്നിവരെയും പുറത്താക്കി. ജഗ്ജിത് സിംഗിനെ കൃത്യമായൊരു യോർക്കറിലൂടെയാണ് അർജുൻ മടക്കിയത്. ഈ പ്രകടനം ഗോവയ്ക്ക് മത്സരത്തിൽ നിർണായക മേൽക്കൈ നൽകി. മത്സരത്തിൽ ആദ്യം ബാറ്റ് ചെയ്ത ഗോവ ലളിത് യാദവിന്റെ (82 റൺസ്) ബാറ്റിംഗ് കരുത്തിൽ 173 റൺസ് നേടിയിരുന്നു.

174 റൺസ് വിജയലക്ഷ്യം പിന്തുടർന്ന ചണ്ഡിഗഢിനെ 19 ഓവറിൽ 121 റൺസിന് ഓൾ ഔട്ടാക്കിയാണ് ഗോവ വിജയം ആഘോഷിച്ചത്. അർജുൻ തെണ്ടുൽക്കറിന് പുറമെ, വി. കൗശിക്, ദർശൻ മിശാൽ എന്നിവരും ഗോവയ്ക്കായി മൂന്ന് വിക്കറ്റുകൾ വീതം വീഴ്ത്തി മികച്ച പിന്തുണ നൽകി. ചണ്ഡിഗഢ് നിരയിൽ രാജ് ബാവ (29 റൺസ്), ജഗ്ജിത് സിംഗ് (20 റൺസ്) എന്നിവർ മാത്രമാണ് ഭേദപ്പെട്ട പ്രകടനം കാഴ്ചവെച്ചത്. മത്സരത്തിൽ ഗോവയുടെ അവസാന ക്യാച്ചും അർജുൻ തെണ്ടുൽക്കറാണ് സ്വന്തമാക്കിയത്.

ഐ.പി.എല്ലിന് മുന്നോടിയായുള്ള താരലേലത്തിൽ മുംബൈ ഇന്ത്യൻസ് അർജുൻ തെണ്ടുൽക്കറെ ഒഴിവാക്കിയിരുന്നു. ലേലത്തിൽ അർജുനെ ലഖ്‌നോ സൂപ്പർ ജയന്റ്‌സ് സ്വന്തമാക്കിയിരുന്നു.