പിടിമുറുക്കി ബിസിസിഐ; ഇനി പഴയതുപോലെ എളുപ്പമാകില്ല കാര്യങ്ങള്‍; പരമ്പരയ്ക്ക് കുടുംബം താരങ്ങളുടെ ഒപ്പം രണ്ടാഴ്ച മാത്രം; പരിശീലകര്‍ക്കും നിയന്ത്രണം; മുഖ്യ പരിശീലകന്റെ മാനേജരെ ടീം ഹോട്ടലില്‍ താമസിപ്പിക്കില്ല: നിയന്ത്രണങ്ങള്‍ കടുപ്പിക്കാന്‍ ബിസിസിഐ
2024-25 ലെ ഇന്ത്യയുടെ മോശം ടെസ്റ്റ് കാമ്പെയ്നിന്റെ പശ്ചാത്തലത്തില്‍, ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ് (ബിസിസിഐ) ചില കടുത്ത നിയമങ്ങള്‍ അവതരിപ്പിക്കാന്‍ നോക്കുന്നതായി റിപ്പോര്‍ട്ട്. ഇതുവരെ, കളിക്കാരുടെ കുടുംബങ്ങള്‍, പ്രത്യേകിച്ച് അവരുടെ ഭാര്യമാരൊക്കെ താരങ്ങളെ പര്യടന സമയത്ത് കൂടെ അനുഗമിച്ചിരുന്നു. ഇപ്പോഴിതാ ഒരു റിപ്പോര്‍ട്ട് അനുസരിച്ച്, വിദേശ പര്യടനങ്ങളിലെ കളിക്കാരുടെ പ്രകടനം അവര്‍ കുടുംബത്തോടൊപ്പം ദീര്‍ഘനേരം താമസിച്ചാല്‍ പ്രതികൂലമായി ബാധിക്കുമെന്ന് ബിസിസിഐ കരുതുന്നു. അതിനാല്‍, കളിക്കാരുമൊത്തുള്ള കുടുംബങ്ങളുടെ സമയം പരിമിതപ്പെടുത്തിക്കൊണ്ട് 2019-ന് മുമ്പ് നിലനിന്നിരുന്ന ഒരു നിയമം വീണ്ടും അവതരിപ്പിക്കാന്‍ ബോര്‍ഡ് ആഗ്രഹിക്കുന്നു.
റിപ്പോര്‍ട്ട് അനുസരിച്ച്, 45 ദിവസത്തെ പര്യടനത്തില്‍ കുടുംബങ്ങളെ, പ്രത്യേകിച്ച് ഭാര്യമാരെ, കളിക്കാരോടൊപ്പം രണ്ടാഴ്ചത്തേക്ക് മാത്രമേ താമസിക്കാന്‍ ബിസിസിഐ അനുവദിക്കൂ. മാത്രമല്ല, ഓരോ കളിക്കാരനും ടീമിലെ മറ്റ് അംഗങ്ങള്‍ക്കൊപ്പം ടീം ബസില്‍ യാത്ര ചെയ്യേണ്ടതുണ്ട്. ഒറ്റയ്ക്കുള്ള യാത്രയും ബോര്‍ഡ് നിരുത്സാഹപ്പെടുത്തും.
മുഖ്യപരിശീലകന്‍ ഗൗതം ഗംഭീറിനും പരിശീലകന്‍ ഗൗരവ് അറോറയ്ക്കുമെതിരെ ബിസിസിഐ കടുത്ത വിമര്‍ശനം ഉന്നയിച്ചിട്ടുണ്ട്. ഗംഭീറിന്റെ മാനേജരെ ടീം ഹോട്ടലില്‍ താമസിക്കാന്‍ അനുവദിക്കില്ല, സ്റ്റേഡിയങ്ങളിലെ വിഐപി ബോക്സില്‍ ഇരുത്താനും അനുവദിക്കില്ല. ടീം ബസിലോ അതിനു പിന്നിലുള്ള ബസിലോ ഗംഭീറിനെ അനുഗമിക്കാന്‍ മാനേജരെ അനുവദിക്കില്ല.
വിമാനയാത്രയ്ക്കിടെ 150 കിലോഗ്രാമില്‍ കൂടുതലുള്ള കളിക്കാരുടെ ലഗേജിന് പണം നല്‍കുന്നതില്‍ നിന്ന് ബിസിസിഐ വിട്ടുനില്‍ക്കുമെന്നും റിപ്പോര്‍ട്ടില്‍ പറയുന്നു. ഈ ചെലവ് സ്വയം വഹിക്കാന്‍ കളിക്കാരോട് ആവശ്യപ്പെടും. ഇന്ത്യയുടെ ടെസ്റ്റ്, ഏകദിന ക്യാപ്റ്റന്‍ രോഹിത് ശര്‍മ്മ, മുഖ്യ പരിശീലകന്‍ ഗൗതം ഗംഭീര്‍, സെലക്ഷന്‍ കമ്മിറ്റി ചീഫ് അജിത് അഗാര്‍ക്കര്‍ എന്നിവര്‍ ബിസിസിഐയുടെ പുതിയ ചുമതലയുള്ള സെക്രട്ടറിയും ട്രഷററും ഉള്‍പ്പെടെയുള്ള ഉന്നത മേധാവികളുമായി കൂടിക്കാഴ്ച നടത്തി.