'ഞാനായിരുന്നെങ്കില്‍ മാന്‍ ഓഫ് ദ് മാച്ച് യശസ്വി ജയ്‌സ്വാളിന് നല്‍കുമായിരുന്നു; കോഹ്ലിക്ക് ഞങ്ങളെയല്ല, ഞങ്ങള്‍ക്ക് കോഹ്ലിയെയാണ് വേണ്ടത്'; പെര്‍ത്ത് ടെസ്റ്റിലെ മിന്നും ജയത്തിന് പിന്നാലെ ജസ്പ്രീത് ബുമ്ര
കോഹ്ലിയെയും ജയ്‌സ്വാളിനെയും പ്രശംസിച്ച് ബുമ്ര
പെര്‍ത്ത്: ബോര്‍ഡര്‍ ഗാവസ്‌കര്‍ ട്രോഫിയിലെ ആദ്യ മത്സരത്തിലെ ചരിത്ര ജയത്തിന് പിന്നാലെ മുന്‍ നായകന്‍ വിരാട് കോഹ്ലിയെയും യുവതാരും യശസ്വി ജയ്‌സ്വാളിനെയും പ്രശംസിച്ച് നായകന്‍ ജസ്പ്രീത് ബുമ്ര. കോഹ്ലിക്ക് ടീമിന്റെ പിന്തുണ ആവശ്യമില്ലെന്നും കോഹ്ലിയുടെ പിന്തുണ ടീമിനാണ് ആവശ്യമെന്നും ബുമ്ര പറഞ്ഞു. മത്സരത്തില്‍ ആദ്യ ഇന്നിങ്സില്‍ 150 റണ്‍സിന് ഇന്ത്യ പുറത്തായെങ്കിലും രണ്ടാം ഇന്നിങ്സില്‍ വന്‍തിരിച്ചുവരവാണ് നടത്തിയത്. ഓസീസിനെതിരെ ഇന്ത്യ 295 റണ്‍സിന്റെ തകര്‍പ്പന്‍ ജയം നേടിയപ്പോള്‍ കോഹ്ലിയുടെ 30 ആം ടെസ്റ്റ് സെഞ്ച്വറിയും നിര്‍ണായകമായിരുന്നു.
'വിരാട് കോഹ്ലിക്ക് ഞങ്ങളെ ആവശ്യമില്ല, എന്നാല്‍ ഞങ്ങള്‍ക്ക് അദ്ദേഹത്തെ ആവശ്യമാണ്. പരിചയസമ്പന്നനായ പ്ലെയറാണ് കോഹ്ലി, ഓസ്ട്രേലിയയില്‍ കോഹ്ലിയുടെ നാലാമത്തെയോ അഞ്ചാമത്തെയോ പര്യടനമാണ്. അതിനാല്‍, മറ്റാരേക്കാളും അദ്ദേഹത്തിന് തന്റെ കളിയെ കുറിച്ച് അറിയാം,' മത്സരത്തിന് ശേഷമുള്ള പത്രസമ്മേളനത്തില്‍ ബുമ്ര പറഞ്ഞു.
മത്സരത്തിലെ ആദ്യ ഇന്നിങ്സില്‍ ഇന്ത്യ കുറഞ്ഞ സ്‌കോറില്‍ പുറത്തായെങ്കിലും ഡ്രസ്സിങ് റൂമില്‍ ഇത് ബാധിച്ചില്ല. ആര്‍ക്കും വിഷമം തോന്നിയില്ല. അതായിരുന്നു ഏറ്റവും വലിയ പോസിറ്റീവ് കാര്യം ബുമ്ര പറഞ്ഞു. ഡിസംബര്‍ 6 ന് അഡ്ലെയ്ഡില് ഓസ്‌ട്രേലിയക്കെതിരായ രണ്ടാം ടെസ്റ്റ് ആരംഭിക്കുകയാണ്, ആദ്യ മത്സരത്തിലെ ജയം ആത്മവിശ്വാസം നല്‍കുന്നുണ്ടെങ്കിലും രണ്ടാം ടെസ്റ്റില്‍ എല്ലാം പുതുതായി തുടങ്ങണം. അഡ്‌ലെയ്ഡിലും കൂടുതല്‍ പാഠങ്ങളുണ്ട്,' ബുമ്ര പറഞ്ഞു.
പെര്‍ത്ത് ടെസ്റ്റില്‍ എട്ട് വിക്കറ്റ് വീഴ്ത്തി ഇന്ത്യയെ മുന്നില്‍ നിന്ന് നയിച്ച ക്യാപ്റ്റന്‍ ജസ്പ്രീത് ബുമ്രയാണ് കളിയിലെ താരമായി തെരഞ്ഞെടുക്കപ്പെട്ടത്. ആദ്യ ഇന്നിംഗ്‌സില്‍ അഞ്ചും രണ്ടാം ഇന്നിംഗ്‌സില്‍ മൂന്നും വിക്കറ്റെടുത്താണ് ബുമ്ര മാന്‍ ഓഫ് ദ് മാച്ചായത്. എന്നാല്‍ താനാണ് മാന്‍ ഓഫ് ദ് മാച്ച് തെരഞ്ഞെടുത്തിരുന്നതെങ്കില്‍ അത് യശസ്വി ജയ്‌സ്വാളിന് നല്‍കുമായിരുന്നു എന്ന് വിജയത്തിനുശേഷം നടത്തിയ വാര്‍ത്താസമ്മേളനത്തില്‍ ബുമ്ര പറഞ്ഞു.
ഞാനാണ് മാന്‍ ഓഫ് ദ് മാച്ച് നല്‍കുന്നതെങ്കില്‍ അത് ഓപ്പണര്‍ യശസ്വി ജയ്‌സ്വാളിന് നല്‍കുമായിരുന്നു. കാരണം, അവന്റെ ടെസ്റ്റ് കരിയറിലെ ഇതുവരെയുള്ളതില്‍ ഏറ്റവും മികച്ച ഇന്നിംഗ്‌സാണ് പെര്‍ത്തില്‍ കളിച്ചതെന്നും ബുമ്ര പറഞ്ഞു. പെര്‍ത്ത് ടെസ്റ്റില്‍ രണ്ടാം ഇന്നിംഗ്‌സില്‍ സെഞ്ചുറി നേടിയ വിരാട് കോലിയെയും ബുമ്ര പ്രശംസിച്ചു. വിരാട് കോലി ഒരിക്കലും ഫോം ഔട്ടാണെന്ന് കരുതിയിരുന്നില്ലെന്ന് ബുമ്ര പറഞ്ഞു. നെറ്റ്‌സില്‍ അദ്ദേഹം മനോഹരമായാണ് ബാറ്റ് ചെയ്യാറുള്ളത്. ഇന്ത്യന്‍ പിച്ചുകളില്‍ ചിലപ്പോള്‍ മികവ് കാട്ടാനായിട്ടുണ്ടാവില്ല. എങ്കിലും വിരാട് കോലിക്ക് ഞങ്ങളെയല്ല, ഞങ്ങള്‍ക്കാണ് വിരാട് കോലിയെ ആവശ്യമുള്ളതെന്നും ബുമ്ര പറഞ്ഞു.
വിരാട് അസാമാന്യ കളിക്കാരനാണ്. അദ്ദേഹത്തിന്റെ ബാറ്റിംഗും പരിചയസമ്പത്തും കണക്കിലെടുക്കുമ്പോള്‍ ഇന്ത്യക്കാണ് കോലിയെ വേണ്ടത്. ടീമിലെ ഏറ്റവും പ്രധാന കളിക്കാരനാണ് കോലി. പെര്‍ത്ത് വിജയം വ്യക്തിപരമായും എനിക്കേറെ സ്‌പെഷ്യലാണ്. കാരണം, ഈ മത്സരം കാണാന്‍ എന്റെ മകനിവിടെയുണ്ട്. ചെറിയ കുട്ടിയാണെങ്കിലും അവന്‍ വലുതാവുമ്പോള്‍ എനിക്ക് ഒട്ടേറെ കഥകള്‍ പറഞ്ഞുകൊടുക്കാനുണ്ടാകും. ടി20 ലോകകപ്പില്‍ കിരീടം നേടിയതും ക്യാപ്റ്റനായി പെര്‍ത്തില്‍ നേടിയ ജയവുമെല്ലാം അതിലുണ്ടാകും.
അടുത്ത ടെസ്റ്റില്‍ രോഹിത് ശര്‍മ തിരിച്ചെത്തുമ്പോള്‍ ക്യാപ്റ്റന്‍ സ്ഥാനം കൈവിടേണ്ടി വരുന്നതിനെക്കുറിച്ചും ബുമ്ര മനസുതുറന്നു. രോഹിത് ആണ് ഞങ്ങളുടെ ക്യാപ്റ്റന്‍. നായകനെന്ന നിലയില്‍ ഒട്ടേറെ നേട്ടങ്ങള്‍ സ്വന്തമാക്കിയിട്ടുള്ള താരമാണ് അദ്ദേഹം. ഞാന്‍ ആദ്യ ടെസ്റ്റിനായി മാത്രം അദ്ദേഹത്തിന് പകരം വന്ന നായകനാണ്. പെര്‍ത്ത് ടെസ്റ്റിലെ വിജയത്തില്‍ മതിമറക്കാനില്ലെന്നും അഡ്ലെയ്ഡില് എല്ലാം ഒന്നില്‍ നിന്ന് തുടങ്ങേണ്ടതുണ്ടെന്നും ബുമ്ര പറഞ്ഞു.