'ഇടവേളകളില് മാത്രം കാണുന്ന താരമായി വിരാട് മാറി'; വരുന്നു, റണ്സടിക്കുന്നു, ലണ്ടനിലേക്ക് പോകുന്നു; താരം ഇനി ആഭ്യന്തര ക്രിക്കറ്റ് കളിക്കേണ്ടതില്ലെന്നും മുഹമ്മദ് കൈഫ്
ഡൽഹി: വിരാട് കോലിക്ക് തന്റെ ഫോം തെളിയിക്കാൻ ആഭ്യന്തര ക്രിക്കറ്റ് കളിക്കേണ്ട ആവശ്യമില്ലെന്ന് മുൻ ഇന്ത്യൻ ക്രിക്കറ്റ് താരം മുഹമ്മദ് കൈഫ്. ന്യൂസിലൻഡിനെതിരായ ഏകദിന പരമ്പരയിൽ കോലി മികച്ച പ്രകടനം തുടരുന്ന സാഹചര്യത്തിലാണ് കൈഫിന്റെ ഈ പ്രതികരണം. പരമ്പരയിൽ മൂന്ന് മത്സരങ്ങളിൽ നിന്ന് 240 റൺസാണ് കോലി നേടിയത്.
"ഇടവേളകളിൽ മാത്രം കാണുന്ന ഒരു താരമായി കോലി മാറിയിരിക്കുന്നു. എന്നാൽ അദ്ദേഹം വരുന്നു, സ്ഥിരതയോടെ റൺസ് നേടുന്നു, ലണ്ടണിലേക്ക് മടങ്ങുന്നു (ആഭ്യന്തര മത്സരങ്ങളിൽ നിന്ന് വിട്ടുനിൽക്കുന്നതിനെ സൂചിപ്പിക്കാൻ). നിരന്തരം ക്രിക്കറ്റ് കളിക്കാത്ത സാഹചര്യങ്ങളിൽ പോലും ഈ സ്ഥിരത നിലനിർത്തുന്നത് അത്ര എളുപ്പമുള്ള കാര്യമല്ല," കൈഫ് തന്റെ യൂട്യൂബ് ചാനലിലൂടെ അഭിപ്രായപ്പെട്ടു. കോലിയുടെ കളിയോടുള്ള അഭിനിവേശം, ശാരീരിക ക്ഷമത, രാജ്യത്തിന് വേണ്ടി കളിക്കുന്നതിലുള്ള അഭിമാനം, കളിയേക്കുറിച്ചുള്ള അറിവ്, തയ്യാറെടുപ്പ് എന്നിവയെല്ലാം പകരം വെക്കാനില്ലാത്തതാണെന്നും അദ്ദേഹം കൂട്ടിച്ചേർത്തു.
"ഇനി കോലി ആഭ്യന്തര ക്രിക്കറ്റ് കളിക്കേണ്ടതിന്റെ ആവശ്യകതയുണ്ടെന്ന് തോന്നുന്നില്ല. മത്സരപരിശീലനം എല്ലാവർക്കും ലഭിക്കുന്ന ഒന്നാണ്, എന്നാൽ അദ്ദേഹത്തിന് ക്രിക്കറ്റിനോടുള്ള അഭിനിവേശം മറ്റൊരിടത്തുനിന്നും വാങ്ങാൻ കഴിയുന്നതല്ല. കഴിഞ്ഞ മത്സരത്തിൽ പോലും കോലിയായിരുന്നു ഇന്ത്യയുടെ പ്രതീക്ഷ. ഇപ്പോഴും ഒരു ടീമിനെ ഒറ്റയ്ക്ക് നിലനിർത്താൻ അദ്ദേഹത്തിന് കഴിയും," കൈഫ് അടിവരയിട്ടു പറഞ്ഞു.
ചാമ്പ്യൻസ് ട്രോഫിക്ക് ശേഷം ഇന്ത്യൻ ടീമിലേക്ക് മടങ്ങിയെത്തിയ കോലി ഓസ്ട്രേലിയൻ പര്യടനത്തിലെ ആദ്യ രണ്ട് മത്സരങ്ങളിൽ റൺസൊന്നുമെടുക്കാതെ പുറത്തായിരുന്നു. എന്നാൽ സിഡ്നി ഏകദിനത്തിൽ അർദ്ധ സെഞ്ചുറി നേടിയതിന് ശേഷം അദ്ദേഹത്തിന്റെ ബാറ്റ് പിന്നീട് വിശ്രമിച്ചിട്ടില്ല. കഴിഞ്ഞ ഏഴ് ഇന്നിങ്സുകളിൽ നിന്ന് കോലി 616 റൺസാണ് വാരിക്കൂട്ടിയത്. ഈ കാലയളവിൽ 108 എന്ന ഉയർന്ന സ്ട്രൈക്ക് റേറ്റിലും 123 എന്ന മികച്ച ശരാശരിയിലുമാണ് താരം ബാറ്റ് വീശിയത്. മൂന്ന് സെഞ്ചുറികളും മൂന്ന് അർദ്ധ സെഞ്ചുറികളും ഇതിൽ ഉൾപ്പെടുന്നു. ന്യൂസിലൻഡിനെതിരായ രണ്ടാം ഏകദിനത്തിൽ മാത്രമാണ് കോലിക്ക് തിളങ്ങാൻ സാധിക്കാതിരുന്നത്.