നിർണായക മത്സരത്തിൽ തകർപ്പൻ ജയവുമായി ഹെയ്തി; നിക്കരാഗ്വയെ പരാജയപ്പെടുത്തിയത് എതിരില്ലാത്ത രണ്ട് ഗോളുകൾക്ക്; ലോകകപ്പ് യോഗ്യത നേടുന്നത് 52 വർഷങ്ങൾക്ക് ശേഷം

വില്ലെംസ്റ്റാഡ്: ഫുട്ബോൾ ലോകകപ്പിന്റെ ചരിത്രത്തിൽ ഇടംനേടി കരീബിയൻ രാജ്യമായ ഹെയ്തി. 2026-ൽ അമേരിക്ക, കാനഡ, മെക്സിക്കോ എന്നിവിടങ്ങളിൽ നടക്കുന്ന ഫിഫ ലോകകപ്പിന് ഹെയ്തി യോഗ്യത നേടി. 52 വർഷത്തെ നീണ്ട ഇടവേളയ്ക്ക് ശേഷമാണ് ഹെയ്തിയുടെ ഈ ചരിത്രപരമായ മടങ്ങിവരവ്. കോൺകാകാഫ് (വടക്കേ അമേരിക്ക, മധ്യ അമേരിക്ക, കരീബിയൻ ഫുട്ബോൾ കോൺഫെഡറേഷൻ) യോഗ്യതാ റൗണ്ടിലെ ഗ്രൂപ്പ് സിയിലെ നിർണായക മത്സരത്തിൽ നിക്കരാഗ്വയെ എതിരില്ലാത്ത രണ്ട് ഗോളുകൾക്ക് തകർത്താണ് അവർ ലോകകപ്പ് ടിക്കറ്റ് ഉറപ്പിച്ചത്.

മത്സരത്തിൽ ഉടനീളം ആധിപത്യം പുലർത്തിയ ഹെയ്തിക്ക് വേണ്ടി ലൂയിഷ്യസ് ഡീഡ്‌സൺ, റൂബൻ പ്രൊവിഡൻസ് എന്നിവരാണ് വലകുലുക്കിയത്. മത്സരത്തിന്റെ 9-ാം മിനിറ്റിൽ ഡീഡ്‌സൺ ആദ്യ ഗോൾ നേടി. തുടർന്ന് ആദ്യ പകുതി അവസാനിക്കുന്നതിന് തൊട്ടുമുമ്പ് (45+1 മിനിറ്റിൽ) പ്രൊവിഡൻസ് രണ്ടാം ഗോളും നേടി വിജയം ഉറപ്പിച്ചു. പ്രധാന എതിരാളികളായ ഹോണ്ടുറാസുമായി പോയിന്റ് നിലയിൽ കടുത്ത മത്സരം നടന്ന ഗ്രൂപ്പിൽ, ഹോണ്ടുറാസ് കോസ്റ്റാറിക്കയുമായി ഗോൾരഹിത സമനിലയിൽ പിരിഞ്ഞതും ഹെയ്തിക്ക് തുണയായി.

1974-ൽ പശ്ചിമ ജർമ്മനിയിൽ നടന്ന ലോകകപ്പിലായിരുന്നു ഹെയ്തിയുടെ ഇതിന് മുൻപുള്ള ഏക പങ്കാളിത്തം. രാജ്യത്തെ രാഷ്ട്രീയ അസ്ഥിരത കാരണം ഹെയ്തിക്ക് അവരുടെ 'ഹോം മത്സരങ്ങൾ' കളിക്കേണ്ടി വന്നത് അയൽരാജ്യമായ കുറകാവോയിലെ വില്ലെംസ്റ്റാഡ് നഗരത്തിലാണ്. പ്രതിസന്ധികൾക്കിടയിലും ചരിത്രനേട്ടം കൈവരിച്ച ഹെയ്തിയുടെ വിജയം ലോകമെമ്പാടുമുള്ള ഫുട്ബോൾ ആരാധകർ ഏറ്റെടുത്തു. ഹെയ്തിക്ക് പുറമെ കുറകാവോ, പനാമ എന്നീ രാജ്യങ്ങളും കോൺകാകാഫ് മേഖലയിൽ നിന്ന് 2026 ലോകകപ്പിന് യോഗ്യത നേടിയിട്ടുണ്ട്. ലോകകപ്പിന് യോഗ്യത നേടുന്ന ഏറ്റവും ചെറിയ രാജ്യമായി കുറകാവോ മാറിയെന്ന പ്രത്യേകതയുമുണ്ട്.