പ്രഥമ ഖോ ഖോ ലോകകപ്പിന് ജനുവരി 13ന് തുടക്കം; പങ്കെടുക്കുന്നത് പുരുഷ-വനിതാ വിഭാഗങ്ങളിലായി 37 ടീമുകള്‍; ആദ്യ മത്സരം ആതിഥേയരായ ഇന്ത്യയും നേപ്പാളും തമ്മിൽ
ദില്ലി: പ്രഥമ ഖോ ഖോ ലോകകപ്പിന് ജനുവരി 13ന് ദില്ലിയിലെ ഇന്ദിരാഗാന്ധി സ്റ്റേഡിയത്തില്‍ തുടക്കം. ഉദ്ഘാടന പതിപ്പിൽ 13 മുതല്‍ 19 വരെയാണ് ടൂര്‍ണമെന്റ നടക്കുക. പുരുഷ-വനിതാ വിഭാഗങ്ങളിലായി 37 ടീമുകള്‍ ലോകകപ്പിൽ പങ്കെടുക്കും. പുരുഷ വിഭാഗത്തില്‍ 20 ടീമുകളും വനിതാ വിഭാഗത്തില്‍ 18 ടീമുകളുമാണ് കളിക്കുന്നത്. ഖോ ഖോയുടെ ജനപ്രീതി ആഗോളതലത്തില്‍ വളര്‍ത്തുകയെന്ന ലക്ഷ്യത്തോടെ നടത്തുന്ന ടൂർണമെന്റ ജനശ്രദ്ധ ആകര്‍ഷിക്കുന്നമെന്നാണ് പ്രതീക്ഷ. ഖോ ഖോ ലോകകപ്പ് 2025 ന്റെ ഉദ്ഘാടന ചടങ്ങ് ജനുവരി 13ന് നടക്കും. ആതിഥേയരായ ഇന്ത്യയും നേപ്പാളും തമ്മിലാണ് ആദ്യ മത്സരം. എല്ലാ മത്സരങ്ങളും ഒരേ വേദിയിലാണ് നടക്കുക.
പുരുഷ വിഭാഗത്തില്‍ എ, ബി, സി, ഡി എന്നീ നാല് ഗ്രൂപ്പുകളിലായി 12 ടീമുകളാണുള്ളത്. ഓരോ ഗ്രൂപ്പിലും നാല് ടീമുകള്‍. ഓരോ ഗ്രൂപ്പിൽ നിന്നും ആദ്യ രണ്ട് ടീമുകലാണ് നോക്കൗട്ട് ഘട്ടത്തിലേക്ക് യോഗ്യത നേടുന്നത്. നേപ്പാള്‍, പെറു, ബ്രസീല്‍, ഭൂട്ടാന്‍ എന്നീ രാജ്യങ്ങൾ ഉൾപ്പെടുന്ന ഗ്രൂപ്പ് എ യിലാണ് ആതിഥേയരായ ഇന്ത്യയുള്ളത്. ദക്ഷിണാഫ്രിക്ക, ഘാന, അര്‍ജന്റീന, നെതര്‍ലാന്‍ഡ്സ്, ഇറാന്‍ എന്നീ ടീമുകൾ ഗ്രൂപ്പ് ബിയിലാണ്. ഗ്രൂപ്പ് സിയിൽ ബംഗ്ലാദേശ്, ശ്രീലങ്ക, ദക്ഷിണ കൊറിയ, യുഎസ്എ, പോളണ്ട് എന്നീ രാജ്യങ്ങളും, ഇംഗ്ലണ്ട്, ജര്‍മ്മനി, മലേഷ്യ, ഓസ്ട്രേലിയ, കെനിയ ഗ്രൂപ്പ് ഡിയിലുമാണ്.
വനിതാ ടൂര്‍ണമെന്റില്‍ നാല് ഗ്രൂപ്പുകളാണുള്ളത്. നാല് ഗ്രൂപ്പുകളിലെയും ആദ്യ രണ്ട് ടീമുകള്‍ ടൂര്‍ണമെന്റിന്റെ നോക്കൗട്ട് ഘട്ടത്തില്‍ കളിക്കും. ജനുവരി 13ന് ഇംഗ്ലണ്ടും ഓസ്ട്രേലിയയും തമ്മിലാണ് ഉദ്ഘാടന മത്സരം. ഗ്രൂപ്പ് എയിലെ ദക്ഷിണ കൊറിയക്ക് എതിരെയാണ് ഇന്ത്യന്‍ വനിതകളുടെ ആദ്യ മത്സരം. ഇറാന്‍, മലേഷ്യ എന്നീ രാജ്യങ്ങളാണ് ഗ്രൂപ്പ് എയിലുള്ള മറ്റ് ടീമുകൾ. ഇംഗ്ലണ്ട്, ഓസ്ട്രേലിയ, കെനിയ, ഉഗാണ്ട, നെതര്‍ലാന്‍ഡ്സ് എന്നീ രാജ്യങ്ങൾ ഗ്രൂപ്പ് ബി യിലാണ്. നേപ്പാള്‍, ഭൂട്ടാന്‍, ശ്രീലങ്ക, ജര്‍മ്മനി, ബംഗ്ലാദേശ് ഗ്രൂപ്പ് സിയിലും, ദക്ഷിണാഫ്രിക്ക, ന്യൂസിലാന്‍ഡ്, പോളണ്ട്, ഇന്തോനേഷ്യ ഗ്രൂപ്പ് ഡിയിലുമാണ്.
ഗ്രൂപ്പ് ഘട്ട മത്സരങ്ങൾ ജനുവരി 16 ന് അവസാനിക്കും. നോക്കൗട്ട് ഘട്ടം ജനുവരി 17 ന് ആരംഭിക്കുകയും ചെയ്യും. പുരുഷ-വനിതാ ടീമുകളുടെ ഫൈനല്‍ പോരാട്ടം ജനുവരി 19 ഞായറാഴ്ച നടക്കും. രാവിലെ 10:30 ന് ആരംഭിക്കുന്ന മത്സരങ്ങള്‍ രാത്രി 9:30 വരെ നീണ്ടുനില്‍ക്കും. ഔദ്യോഗിക ബ്രോഡ്കാസ്റ്ററായ സ്റ്റാര്‍ സ്പോര്‍ട്സ് നെറ്റ്വര്‍ക്കില്‍ തത്സമയം സംപ്രേക്ഷണം ചെയ്യും. മൊബൈലില്‍ ഇവന്റ് കാണാന്‍ താല്‍പ്പര്യമുള്ളവര്‍ക്ക് ഡിസ്‌നി ഹോട്ട്സ്റ്റാറിലും കാണാം.