ലോകകപ്പ് ഫൈനല്‍ നറുക്കെടുപ്പ് വാഷിംഗ്ടണില്‍ നടക്കും; പ്രഖ്യാപിച്ച് ട്രംപ്
വാഷിംഗ്ടണ്‍: 2026-ലെ ഫിഫ ലോകകപ്പിന്റെ ഫൈനല്‍ നറുക്കെടുപ്പ് വാഷിംഗ്ടണില്‍ നടക്കുമെന്ന് മുന്‍ അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് പ്രഖ്യാപിച്ചു. ഓവല്‍ ഓഫീസില്‍ വെച്ച് ഫിഫ പ്രസിഡന്റ് ജിയാനി ഇന്‍ഫാന്റിനോയെ സന്ദര്‍ശിച്ചപ്പോഴാണ് അദ്ദേഹം ഇക്കാര്യം അറിയിച്ചത്.
ഫിഫയുമായുള്ള ട്രംപിന്റെ വ്യക്തിപരമായ ബന്ധം കൂടുതല്‍ ദൃഢമാക്കുന്ന നീക്കമാണിത്. ഡിസംബര്‍ 5-ന് കെന്നഡി സെന്ററിലാണ് നറുക്കെടുപ്പ് നടക്കുക. 48 രാജ്യങ്ങളില്‍ നിന്നുള്ള പ്രതിനിധികള്‍ പരിപാടിയില്‍ പങ്കെടുക്കും. 2026-ലെ ഫുട്‌ബോള്‍ ലോകകപ്പ് ആദ്യമായാണ് മൂന്ന് രാജ്യങ്ങള്‍ (യു.എസ്., കാനഡ, മെക്‌സിക്കോ) ആതിഥേയത്വം വഹിക്കുന്നത്. കൂടാതെ, ഇത് ആദ്യമായി 48 ടീമുകള്‍ മത്സരിക്കുന്ന ലോകകപ്പും ആയിരിക്കും.
ലോകകപ്പിന്റെ ആതിഥേയത്വം നേടിയതോടെ, തനിക്ക് ഒരു ആഗോള പരിപാടിയുടെ ശ്രദ്ധാകേന്ദ്രമാകാന്‍ സാധിക്കുമെന്ന് ട്രംപ് വിശ്വസിക്കുന്നു. ഇന്‍ഫാന്റിനോയുമായി ട്രംപ് അടുത്ത ബന്ധം പുലര്‍ത്തുന്നുണ്ട്. ഇന്‍ഫാന്റിനോ ട്രംപിനെ ഓവല്‍ ഓഫീസില്‍ നിരവധി തവണ സന്ദര്‍ശിച്ചിട്ടുണ്ട്. അടുത്തിടെ നടന്ന ക്ലബ് ലോകകപ്പ് ഫൈനലില്‍ ട്രംപ് പങ്കെടുക്കുകയും ഇന്‍ഫാന്റിനോയെ അഭിസംബോധന ചെയ്യുകയും ചെയ്തിരുന്നു.
വാഷിംഗ്ടണ്‍ ഡി.സി.യെ സുരക്ഷിതവും മനോഹരവുമാക്കാനുള്ള തങ്ങളുടെ ശ്രമങ്ങള്‍ ഊന്നിപ്പറയാനും ഈ പ്രഖ്യാപനം ട്രംപിനും വൈസ് പ്രസിഡന്റ് ജെ.ഡി. വാന്‍സിനും ഒരു അവസരം നല്‍കി.
'ഇത് വളരെ സുരക്ഷിതമായിരിക്കും, ജിയാനി. നിങ്ങളുടെ ഭാര്യയുമായി നിങ്ങള്‍ക്ക് തെരുവിലൂടെ നടക്കാം. നിങ്ങള്‍ക്ക് അത്താഴത്തിന് ഒരുമിച്ച പോകാം,' ട്രംപ് ഇന്‍ഫാന്റിനോയോട് പറഞ്ഞു.