മധ്യപ്രദേശിലെ ഹോഷംഗാബാദ് ഇനിമുതൽ അറിയപ്പെടുക നർമ്മദാപുരം എന്ന പേരിൽ; മുഖ്യമന്ത്രി ശിവ്‌രാജ് സിംഗ് ചൗഹാന്റെ പ്രഖ്യാപനം ജനങ്ങളുടെ അഭ്യർത്ഥന മാനിച്ച്; സുപ്രധാന വിഷയങ്ങളിൽ നിന്ന് ജനങ്ങളുടെ ശ്രദ്ധ തിരിക്കാനുള്ള ബിജെപിയുടെ തന്ത്രമെന്ന് കോൺഗ്രസും
ഭോപ്പാൽ: മധ്യപ്രദേശിലെ ഹോഷംഗാബാദ് എന്ന സ്ഥലത്തിന്റെ പേര് മാറ്റി. ഹോഷംഗാബാദ് ഇനിമുതൽ നർമദാപുരം എന്ന പേരിലാണ് അറിയപ്പെടുക. മുഖ്യമന്ത്രി ശിവ്‌രാജ് സിംഗ് ചൗഹാനാണ് ഇക്കാര്യം പ്രഖ്യാപിച്ചത്. നർമദ ജയന്തി പരിപാടിയോടനുബന്ധിച്ച് ച‌ടങ്ങിനിടെയാണ് അദ്ദേഹം ഹോഷംഗാബാദിന്റെ പേര് മാറ്റിയതായി പ്രഖ്യാപിച്ചത്. ഇത് സംബന്ധിച്ച് കേന്ദ്ര സർക്കാരിന് പ്രൊപ്പോസൽ നൽകുമെന്നും മുഖ്യമന്ത്രി പറഞ്ഞു.
നർമദയുടെ തീരത്ത് നടന്ന ഒരു സമ്മേളനത്തിൽ സംസാരിക്കവെ ചൗഹാൻ ജനങ്ങളോട് സ്ഥലപ്പേര് മാറ്റണോ എന്ന് ചോദിക്കുകയായിരുന്നു. സർക്കാർ ഹോഷാംഗാബാദിന്റെ പേര് മാറ്റണോ? "പുതിയ പേര് എന്തായിരിക്കണം?" ചൗഹാൻ ചോദിച്ചു, ആളുകൾ ഒറ്റക്കെട്ടായി "നർമദാപുരം" എന്ന് മറുപടി നൽകുകയായിരുന്നു. ഇതോടെ, ഉടൻ തന്നെ പേര് മാറ്റാനുള്ള നിർദ്ദേശം സംസ്ഥാനം കേന്ദ്ര സർക്കാരിന് നൽകുകയാണെന്ന് മുഖ്യമന്ത്രി പ്രഖ്യാപിച്ചു.
പേര് മാറ്റിയതിൽ സന്തോഷം പങ്കുവച്ച് പ്രോ ടേം സ്പീക്കർ രാമേശ്വർ ശർമയും രംഗത്തെത്തി. ഇതൊരു ചരിത്ര മുഹൂർത്തമാണ്. പ്രദേശം ആക്രമിച്ച ഹോഷാംഗ് ഷാ എന്ന അക്രമകാരിയിൽ നിന്ന് മാ നർമദയുടെ പേരിൽ നഗരത്തെ നാമകിരണം ചെയ്തതിൽ സന്തോഷമുണ്ടെന്ന് രാമേശ്വർ ശർമ പറഞ്ഞു. "ഇതൊരു ചരിത്ര നിമിഷമാണ്. മധ്യപ്രദേശിന്റെ ജീവിതമാർഗമാണ് നർമദ. ആക്രമണകാരിയായ ഹോഷാങ് ഷായുടെ പേരിലാണ് ഹോഷാംഗാബാദിന് ഇതുവരെ പേര് നൽകിയിരുന്നത്, പക്ഷേ ഇനി ഈ നദീതടം അമ്മ നർമദയുടെ പേരിൽ അറിയപ്പെടും. ഇത് സന്തോഷകരമായ കാര്യമാണ്. പൊതു വികാരങ്ങളെ മാനിച്ചുകൊണ്ട് ഈ പ്രഖ്യാപനം നടത്തിയതിന് മുഖ്യമന്ത്രിയോട് ഞാൻ നന്ദി പറയുന്നു, "അദ്ദേഹം പറഞ്ഞു. തീരുമാനത്തിന് സംസ്ഥാന ബിജെപി പ്രസിഡന്റ് വി ഡി ശർമ്മയും മറ്റ് നിരവധി നേതാക്കളും മുഖ്യമന്ത്രിയോട് നന്ദി പറഞ്ഞു.
അതേസമയം,, പണപ്പെരുപ്പം, ഇന്ധനവില ഉയരുന്നത് തുടങ്ങിയ സുപ്രധാന വിഷയങ്ങളിൽ നിന്ന് ജനങ്ങളുടെ ശ്രദ്ധ തിരിക്കാനുള്ള ഭരണകക്ഷിയായ ബിജെപിയുടെ തന്ത്രമാണിതെന്ന് സംസ്ഥാന കോൺഗ്രസ് വക്താവ് ഭൂപേന്ദ്ര ഗുപ്ത ആരോപിച്ചു. മുഗളരുമായി ബന്ധപ്പെട്ട പേരുകൾ മാത്രമാണ് ബിജെപി മാറ്റിയത്, അതേസമയം, ബ്രിട്ടീഷ് ഭരണാധികാരികളുമായി ബന്ധപ്പെട്ട പേരുകൾ ഇവർ മാറ്റുന്നില്ലെന്നും അദ്ദേഹം ചൂണ്ടിക്കാട്ടി. എന്തുകൊണ്ടാണ് മിന്റോ ഹാൾ (പഴയ വിധ് സഭാ കെട്ടിടം) എന്ന പേര് മാറ്റാത്തത്? ഇത് ശ്രദ്ധ തിരിക്കാനാണ്. പകരം വികസനത്തിൽ ശ്രദ്ധ കേന്ദ്രീകരിക്കുകയും ജനങ്ങൾക്ക് ആശ്വാസം നൽകുകയും വേണം, "അദ്ദേഹം പറഞ്ഞു.
