കൊല്ലം: വീട്ടിൽ അതിക്രമിച്ച് കയറി ഗൃഹനാഥയെ കടന്നുപിടിച്ച കേസിൽ നല്ലനടപ്പിന് ശിക്ഷ ലഭിച്ച യുവാവ് പിടിയിൽ. കൊല്ലം ഈസ്റ്റ് വെസ്റ്റ് നഗർ 47 ൽ ചെക്കുംമൂട്ടിൽ വീട്ടിൽ റോളണ്ടാണ് (വക്കച്ചൻ, 38) പിടിയിലായത്. യുവതി വീട്ടിൽ തനിച്ചാണെന്ന് മനസിലാക്കിയ പ്രതി വീടിന്റെ പടിയിലിരുന്ന യുവതിയെ കടന്നുപിടിക്കുകയായിരുന്നു. യുവതി വീട്ടിലേക്ക് ഓടിക്കയറി രക്ഷപ്പെടാൻ ശ്രമിച്ചെങ്കിലും പിന്തുടർന്നെത്തി അപമാനിച്ചു.

അയൽവാസികൾ എത്തിയപ്പോഴേക്കും പ്രതി ഓടി രക്ഷപ്പെട്ടു. പരിസരത്തെ സി.സി ടി.വി ദൃശ്യങ്ങളിൽ നിന്നാണ് പ്രതിയെ തിരിച്ചറിഞ്ഞത്. കൊല്ലം വെസ്റ്റ് സ്‌റ്റേഷനിൽ കൊലപാതക ശ്രമം അടക്കമുള്ള കേസുകളിൽ പ്രതിയാണ്. നല്ലനടപ്പിന് സബ് ഡിവിഷണൽ മജിസ്ട്രേറ്റ് ശിക്ഷിച്ചെങ്കിലും ഇയാൾ കോടതിയിലെത്താതെ മുങ്ങിനടക്കുകയായിരുന്നു. കൊല്ലം വെസ്റ്റ് ഇൻസ്പെക്ടർ ബി. ഷെഫീക്കിന്റെ നേതൃത്വത്തിൽ എസ്‌ഐമാരായ കെ.ജി. ശ്യാംകുമാർ, ഹസൻകുഞ്ഞ്, എസ്.സി.പി.ഒമാരായ അബു താഹീർ, രമാദേവി, ഷക്കീല എന്നവരടങ്ങിയ സംഘമാണ് തങ്കശേരിയിൽ നിന്ന് ഇയാളെ പിടികൂടിയത്.