'പിന്നിൽ നിന്നും കഠാരയിറക്കി കീഴ്പ്പെടുത്തി കഴിവ്കെട്ട യോദ്ധാവെന്ന് മുദ്രകുത്താം; പദവികൾ നൽകാതെ പുറത്ത് നിർത്താം, ആത്മാഭിമാനം കളങ്കപ്പെടുത്തി കീഴ്പ്പെടില്ല'; മലപ്പുറം ഡിസിസി അധ്യക്ഷ സ്ഥാനത്തു നിന്നും നീക്കം ചെയ്തതിൽ വിമർശനവുമായി ആര്യാടൻ ഷൗക്കത്ത്; ലീഗ് സർമ്മദത്തിന് കോൺഗ്രസ് വഴങ്ങിയെന്ന് പൊതുവികാരം

മലപ്പുറം: തെരഞ്ഞെടുപ്പു കഴിഞ്ഞതോടെ മലപ്പുറം ഡിസിസിയിൽ വീണ്ടും തർക്കങ്ങൾക്ക് തുടക്കം. ഡിസിസി പ്രസിഡന്റ് സ്ഥാനത്തുനിന്ന് നീക്കം ചെയ്തതിൽ കോൺഗ്രസ് നേതൃത്വത്തിനെതിരെ പരോക്ഷ വിമർശനവുമായി ആര്യാടൻ ഷൗക്കത്ത് രംഗത്തുവന്നു. മുസ്ലിംലീഗ് സമ്മർദ്ദത്തിന് വഴങ്ങിയാണ് കോൺഗ്രസ് ഡിസിസി അധ്യക്ഷ സ്ഥാനത്തു നിന്നും ആര്യാടൻ ഷൗക്കത്തിന് നീക്കിയതെന്ന വികാരം അദ്ദേഹത്തെ അനുകൂലിക്കുന്നവർക്കിടയിൽ ശക്തമാണ്. ഈ സാഹചര്യത്തിലാണ് പരോക്ഷ വിമർശനവുമായി ഷൗക്കത്ത് രംഗത്തുവന്നത്.

പദവികളുടെ പടി വാതിലടച്ച് പുറത്ത് നിർത്താം, എന്നാൽ ആത്മാഭിമാനം കളങ്കപ്പെടുത്തി ആരുടെ മുന്നിലും കീഴ്പ്പെടാനില്ലെന്നും ഷൗക്കത്ത് ഫേസ്‌ബുക്കിൽ കുറിച്ചു. 2016-ലെ തിരഞ്ഞെടുപ്പിൽ നിലമ്പൂരിൽ തന്നെ പിന്നിൽ നിന്ന് കുത്തി പരാജയപ്പെടുത്തിയെന്നും പോസ്റ്റിൽ പരോക്ഷമായി ഷൗക്കത്ത് ആരോപിക്കുന്നുണ്ട്.

'പിന്നിൽ നിന്നും കഠാരയിറക്കി കീഴ്പ്പെടുത്തി കഴിവ്കെട്ട യോദ്ധാവെന്ന് മുദ്രകുത്താം. പദവികളുടെ പടി വാതിലടച്ച് പുറത്ത് നിർത്താം. പദവികൾക്ക് വേണ്ടി മതേതര മൂല്യങ്ങൾ പണയം വെച്ച് മതാത്മക രാഷ്ടീയത്തിന്റെ ഉപജാപങ്ങൾക്ക് മുന്നിൽ മുട്ടിലിഴയുന്നവർ അറിയുക. ഇനിയും ഒരുപാട് തോറ്റാലും ശരി, നാടിന്റെ മോചനം സാധ്യമാക്കിയ ദേശീയ കുലത്തിന്റെ ആത്മഭിമാനം കളങ്കപ്പെടുത്തി ആരുടെ മുന്നിലും കീഴ്പ്പെടാനില്ല. ഇനിയും നടക്കാനേറെയുണ്ട്. ഒട്ടേറെ സൂര്യോദയങ്ങൾ കാണാനുണ്ട്' ആര്യാടൻ ഷൗക്കത്ത് ഫേസ്‌ബുക്കിൽ കുറിച്ചു.

തിരഞ്ഞെടുപ്പ് ഘട്ടത്തിൽ ആര്യാടൻ ഷൗക്കത്തിന് നൽകിയ മലപ്പുറം ഡിസിസി പ്രസിഡന്റ് സ്ഥാനത്തേക്ക് കഴിഞ്ഞ ദിവസം വീണ്ടും വി.വി.പ്രകാശിനെ നിയോഗിച്ചിരുന്നു. ഷൗക്കത്തിന് നൽകിയ താൽക്കാലിക പദവി തിരിച്ചെടുത്തതോടെ കടുത്ത അമർഷമാണ് പാർട്ടിക്കുള്ളിൽ ഉണ്ടായിരിക്കുന്നത്. നേരത്തേ സീറ്റുതർക്കത്തിന്റെ ഭാഗമായാണ്, ഒരു നീക്കുപോക്കെന്ന നിലയിൽ ഷൗക്കത്തിന് ഡി.സി.സി. പ്രസിഡന്റ് സ്ഥാനം നൽകിയത്. അഞ്ചു ജില്ലകളിലെ ഡി.സി.സി. പ്രസിഡന്റുമാരെ തിരഞ്ഞെടുപ്പു കാലത്ത് തത്സ്ഥാനത്തുനിന്ന് നീക്കിയിരുന്നെങ്കിലും മലപ്പുറത്തെ മാറ്റം ഒരു പ്രത്യേക സാഹചര്യത്തിലായിരുന്നു.

നിലമ്പൂർ സീറ്റിനുവേണ്ടി വി.വി. പ്രകാശും ആര്യാടൻ ഷൗക്കത്തും തമ്മിലുണ്ടായിരുന്ന തർക്കം സംസ്ഥാനതലത്തിൽ തന്നെ കോൺഗ്രസ്സിന് വലിയ തലവേദനയായിരുന്നു. ഇതിനെത്തുടർന്ന് സ്ഥാനാർത്ഥിനിർണയം നീണ്ടുപോവുകയുംചെയ്തു. കഴിഞ്ഞതവണ ഷൗക്കത്തിനുവേണ്ടി ഒഴിഞ്ഞുകൊടുത്തതിനാൽ ഇത്തവണ മാറിനിൽക്കാൻ തയ്യാറല്ലെന്ന് വി.വി പ്രകാശും നഷ്ടപ്പെട്ട സീറ്റ് തിരിച്ചുപിടിക്കുമെന്ന് ഷൗക്കത്തും നിലപാടെടുത്തതോടെയാണ് നേതൃത്വം കുഴങ്ങിയത്.

ഷൗക്കത്തിന് പട്ടാമ്പി സീറ്റ് വാഗ്ദാനംചെയ്തെങ്കിലും അദ്ദേഹം സ്വീകരിച്ചില്ല. അതോടെയാണ് ഡി.സി.സി. പ്രസിഡന്റായി നിയമിച്ചത്. താത്കാലിക ഡി.സി.സി. പ്രസിഡന്റ് സ്ഥാനത്തിനുവേണ്ടി പട്ടാമ്പി സീറ്റ് തിരസ്‌കരിച്ചത് രാഷ്ട്രീയ മണ്ടത്തരമായിപ്പോയെന്ന ചിന്തയാണ് ഷൗക്കത്തിനും അദ്ദേഹത്തെ അനുകൂലിക്കുന്നവർക്കും.

കെപിസിസി. പ്രസിഡന്റിന്റെ അറിയിപ്പ് വന്നയുടൻ, ഡി.സി.സി. പ്രസിഡന്റിന്റെ ചുമതല നിർവഹിക്കാൻ 20 ദിവസം അവസരം തന്നതിന് നന്ദി രേഖപ്പെടുത്തി ഷൗക്കത്തിന്റെ ഫേസ്‌ബുക്ക് പോസ്റ്റുണ്ടായിരുന്നു. നിലമ്പൂരിൽ യു.ഡി.എഫ്. വിജയിച്ചാൽ വീണ്ടും ഡി.സി.സി. പ്രസിഡന്റ് സ്ഥാനത്തേക്ക് ഷൗക്കത്തിനുതന്നെ നറുക്കുവീണേക്കാം. എന്നാൽ സീറ്റ് നഷ്ടപ്പെട്ടാൽ ഷൗക്കത്തിന് എന്തുസ്ഥാനം കൊടുക്കണമെന്ന കാര്യത്തിൽ തർക്കം ഉടലെടുത്തേക്കും. ഷൗക്കത്ത് ഡിസിസി അധ്യക്ഷനാകുന്നതിൽ എതിർപ്പുള്ളത് മുസ്ലിംലീഗുകാർക്കാണ്. അദ്ദേഹവുമായി ഒരുമിച്ചു പോകാൻ സാധിക്കില്ലെന്നാണ് ലീഗിലെ ചില നേതാക്കൾ പറയുന്നത്.