കൊച്ചി: നിവിൻ പോളി നായകനാകുന്ന പുതിയ ചിത്രം അഖിൽ സത്യൻ സംവിധാനം ചെയ്യും. നിവിൻ പോളി പ്രധാന വേഷത്തിലെത്തിയ 'സർവ്വം മായ' ആഗോള ബോക്സ് ഓഫീസിൽ 150 കോടി രൂപ നേട്ടത്തിലേക്ക് അടുക്കുന്നതിനിടെയാണ് ഈ പ്രഖ്യാപനം. മുപ്പതുകളിൽ കടന്ന ഒരാളുടെ പ്രണയവും ഹാസ്യവുമാണ് പുതിയ ചിത്രത്തിൻ്റെ പ്രമേയമെന്ന് സംവിധായകൻ അഖിൽ സത്യൻ വ്യക്തമാക്കി.

'യേ ജവാനി ഹേ ദീവാനി' പോലുള്ള ബോളിവുഡ് റൊമാന്റിക് കോമഡി ചിത്രങ്ങളുടെ മാതൃകയിലായിരിക്കും ഈ സിനിമ എന്നും അദ്ദേഹം കൂട്ടിച്ചേർത്തു. അജു വർഗീസ്, അൽത്താഫ് സലിം എന്നിവർ നിർണായക വേഷങ്ങളിൽ എത്തുന്നുണ്ട്. നടി ഉർവശിയും ചിത്രത്തിൽ ഒരു പ്രധാന കഥാപാത്രത്തെ അവതരിപ്പിക്കും.

അതേസമയം, റിലീസ് ചെയ്ത് 27-ാം ദിവസത്തിലേക്ക് കടക്കുമ്പോഴാണ് 'സർവ്വം മായ' 150 കോടി ക്ലബിലേക്ക് അടുക്കുന്നത്. അജു വർഗീസ്, റിയ ഷിബു, പ്രീതി മുകുന്ദൻ, ജനാർദ്ദനൻ, വിനീത്, രഘുനാഥ് പലേരി, മധു വാര്യർ, മേതിൽ ദേവിക, പ്രിയ വാര്യർ തുടങ്ങിയവരാണ് ചിത്രത്തിലെ മറ്റ് താരങ്ങൾ. ജനുവരി 30 മുതൽ 'സർവ്വം മായ' ജിയോ ഹോട്ട്‌സ്റ്റാറിൽ സ്ട്രീമിംഗ് ആരംഭിക്കും.

നിലവിൽ, ഗിരീഷ് എ.ഡി. സംവിധാനം ചെയ്യുന്ന 'ബേത്‌ലഹേം കുടുംബ യൂണിറ്റ്' എന്ന ചിത്രത്തിൽ നിവിൻ പോളി അഭിനയിച്ചുവരികയാണ്. മമിത ബൈജു നായികയാകുന്ന ഈ റൊമാന്റിക് കോമഡി ചിത്രത്തിൽ സംഗീത് പ്രതാപ്, ബിന്ദു പണിക്കർ, വിനയ് ഫോർട്ട്, റോഷൻ ഷാനവാസ്, ശ്യാം മോഹൻ, ഷമീർ ഖാൻ, സ്രിന്ധ തുടങ്ങിയവരും പ്രധാന വേഷങ്ങളിലുണ്ട്. ഭാവന സ്റ്റുഡിയോസിന്റെ ബാനറിൽ ദിലീഷ് പോത്തൻ, ഫഹദ് ഫാസിൽ, ശ്യാം പുഷ്‌കരൻ എന്നിവർ ചേർന്നാണ് ചിത്രം നിർമ്മിക്കുന്നത്. ഗിരീഷ് എ.ഡിയും കിരൺ ജോസിയും ചേർന്നാണ് തിരക്കഥ രചിച്ചിരിക്കുന്നത്. ഓണം റിലീസായി ചിത്രം തിയറ്ററുകളിലെത്തും.

നിവിൻ പോളിഅഖിൽ സത്യൻസർവ്വം മായ

സ്വന്തം ലേഖകൻ