തിരക്കഥ ലോകേഷ് കനകരാജ്, സംവിധാനം ബാക്കിയരാജ് കണ്ണൻ; രാഘവ ലോറൻസ് നായകനാകുന്ന 'ബെൻസ്'; സിനിമയുടെ ഷെഡ്യൂൾ പൂർത്തിയാക്കി നിവിൻ പോളി
ചെന്നൈ: ആരാധകർ വലിയ ആകാംഷയോടെ കാത്തിരിക്കുന്ന തമിഴ് ചിത്രമാണ് 'ബെൻസ്'. ലോകേഷ് കനകരാജ് തിരക്കഥയെഴുതി ബാക്കിയരാജ് കണ്ണൻ സംവിധാനം ചെയ്യുന്ന ചിത്രത്തിൽ മലയാളികളുടെ പ്രിയ അത്തരം നിവിൻ പോളിയും ഒരു പ്രധാന വേഷത്തിലെത്തുന്നു. ഇപ്പോഴിതാ ചിത്രത്തിന്റെ ഏറ്റവും പുതിയ അപ്‌ഡേറ്റുകളാണ് പുറത്ത് വരുന്നത്. ചിത്രത്തിലെ ഷെഡ്യൂൾ നടൻ നിവിൻ പോളി പൂർത്തിയാക്കി. ഇതിന്റെ ഭാഗമായി അദ്ദേഹം ലൊക്കേഷനിൽ നിന്നുള്ള ചിത്രങ്ങൾ തന്റെ ഔദ്യോഗിക സോഷ്യൽ മീഡിയ പേജിലൂടെ പുറത്തുവിട്ടു.
ഇരുളിൽ നിന്നും നടന്നു വരുന്ന രീതിയിലുള്ള ചിത്രങ്ങളാണ് താരം പങ്കുവെച്ചിരിക്കുന്നത്. ലോകേഷ് സിനിമാറ്റിക് യൂണിവേഴ്സിന്റെ (LCU) ഭാഗമായ ഈ ചിത്രത്തിൽ രാഘവ ലോറൻസാണ് നായകൻ. ചിത്രങ്ങൾ ഇപ്പോൾ സോഷ്യൽ മീഡിയയിൽ ശ്രദ്ധ നേടുകയാണ്. സായ് അഭ്യങ്കർ ആണ് ബെന്‍സിന്റെ സംഗീത സംവിധാനം. ഛായാഗ്രഹണം ഗൗതം ജോര്‍ജ്.
ഫിലോമിന്‍ രാജ് ചിത്രത്തിന്റെ എഡിറ്റിങ്ങും ജാക്കി കലാസംവിധാനവും നിര്‍വഹിക്കുന്നു. സംഘട്ടനസംവിധാനം നിർവഹിക്കുന്നത് അനല്‍ അരശ് ആണ്.പാഷന്‍ സ്റ്റുഡിയോസിന്റെ ബാനറില്‍ സുധന്‍ സുന്ദരം, ലോകേഷ് കനകരാജിന്റെ ജി സ്‌ക്വാഡ്, ജഗദീഷ് പളനിസ്വാമിയുടെ ദി റൂട്ട് എന്നിവര്‍ ചേര്‍ന്നാണ് ചിത്രം നിര്‍മിക്കുന്നത്.
