ഷെയ്ൻ നിഗം പോലീസ് യൂണിഫോമിൽ വീണ്ടും എത്തുന്ന 'ദൃഢം'; ക്രൈം ഇന്വെസ്റ്റിഗേഷന് ത്രില്ലറിന്റെ റിലീസ് പോസ്റ്റർ പുറത്ത്; നവാഗതനായ മാർട്ടിൻ ജോസഫ് ഒരുക്കുന്ന ചിത്രം മാർച്ചിൽ തിയറ്ററുകളിലെത്തും
കൊച്ചി: ഷെയ്ൻ നിഗം പോലീസ് വേഷത്തിൽ വീണ്ടും വെള്ളിത്തിരയിലെത്തുന്ന 'ദൃഢം' എന്ന ചിത്രത്തിന്റെ റിലീസ് അനൗൺസ്മെന്റ് പോസ്റ്റർ പുറത്ത്. ചിത്രം മാർച്ചിൽ റിലീസിനെത്തുമെന്ന് അണിയറപ്രവർത്തകർ അറിയിച്ചു. എസ്.ഐ. വിജയ് രാധാകൃഷ്ണൻ എന്ന കഥാപാത്രത്തെയാണ് ഷെയ്ൻ ചിത്രത്തിൽ അവതരിപ്പിക്കുന്നത്. ഒരു ക്രൈം ഇൻവെസ്റ്റിഗേഷൻ ത്രില്ലറായ 'ദൃഢം' നവാഗതനായ മാർട്ടിൻ ജോസഫാണ് സംവിധാനം ചെയ്യുന്നത്.
'കൊറോണ പേപ്പേഴ്സിനും' 'വേല'യ്ക്കും ശേഷം ഷെയ്ൻ നിഗം ഒരു പോലീസ് കഥാപാത്രമായി എത്തുന്നു എന്ന പ്രത്യേകതയും ചിത്രത്തിനുണ്ട്. കുഴിനിലം എന്ന പ്രദേശത്തെ ദുരൂഹമായ സംഭവങ്ങളും തുടർന്നുള്ള കേസന്വേഷണവുമാണ് ചിത്രത്തിന്റെ ഇതിവൃത്തം. #ACopWithEverythingToProve എന്ന ഹാഷ്ടാഗോടുകൂടി പുറത്തിറങ്ങിയ ആദ്യ വീഡിയോയും പുതിയ റിലീസ് പോസ്റ്ററും സാമൂഹിക മാധ്യമങ്ങളിൽ ശ്രദ്ധ നേടിയിരുന്നു.
ഷോബി തിലകൻ, കോട്ടയം രമേഷ്, ദിനേശ് പ്രഭാകർ, നന്ദൻ ഉണ്ണി, വിനോദ് ബോസ്, കൃഷ്ണപ്രഭ, സാനിയ ഫാത്തിമ, അഭിറാം രാധാകൃഷ്ണൻ, പ്രശാന്ത് മുരളി, മാത്യു വർഗ്ഗീസ്, ജോജി കെ ജോൺ, ബിട്ടോ ഡേവിസ്, അഭിഷേക് രവീന്ദ്രൻ എന്നിവരാണ് ചിത്രത്തിലെ മറ്റ് പ്രധാന താരങ്ങൾ. ഇ ഫോർ എക്സ്പെരിമെന്റ്സ്, ജീത്തു ജോസഫ് (ബെഡ് ടൈം സ്റ്റോറീസ്) എന്നിവർ ചേർന്നാണ് ചിത്രം പ്രേക്ഷകർക്കുമുന്നിൽ അവതരിപ്പിക്കുന്നത്. മുകേഷ് ആർ മെഹ്തയും സി.വി. സാരഥിയും ചേർന്നാണ് നിർമാണം. ജോമോൻ ജോൺ, ലിന്റോ ദേവസ്യ എന്നിവർ ചേർന്നാണ് കഥ, തിരക്കഥ, സംഭാഷണം ഒരുക്കിയിരിക്കുന്നത്.
കറ്റീന ജീത്തുവാണ് എക്സിക്യൂട്ടീവ് പ്രൊഡ്യൂസർ. പി.എം. ഉണ്ണികൃഷ്ണൻ ഛായാഗ്രഹണവും വിനായക് എഡിറ്റിംഗും നിർവഹിക്കുന്നു. രാഹുൽ ജോസഫ്, സെത് എം. ജേക്കബ് എന്നിവർ സൗണ്ട് ഡിസൈനും ജിതിൻ ജോസഫ് സൗണ്ട് മിക്സിംഗും കൈകാര്യം ചെയ്യുന്നു. സുനിൽ ദാസ് പ്രൊഡക്ഷൻ ഡിസൈനർ, അധിര രഘുനാഥൻ അസിസ്റ്റന്റ് ഡയറക്ടർ, ക്യാത്തി ജീത്തു, അനൂപ് കെ.എസ്. അസ്സോസിയേറ്റ് ഡയറക്ടർമാർ.
അരവിന്ദ് ബാബു ചീഫ് അസ്സോസിയേറ്റ് സിനിമാറ്റോഗ്രാഫർ, രതീഷ് വിജയൻ മേക്കപ്പ്, മഹേഷ് മാത്യു ആക്ഷൻ ഡയറക്ടർ, ദീപക് പരമേശ്വരൻ പ്രൊഡക്ഷൻ കൺട്രോളർ, ടോണി മാഗ്മിത്ത് വിഎഫ്എക്സ് ഡയറക്ടർ, ലിജു പ്രഭാകർ ഡിഐ കളറിസ്റ്റ്, ലേഖ മോഹൻ കോസ്റ്റ്യൂം ഡിസൈനർ, അമരേഷ് കുമാർ ചീഫ് അസ്സോസിയേറ്റ് ഡയറക്ടർ, നന്ദു ഗോപാലകൃഷ്ണൻ സ്റ്റിൽസ് എന്നിവരാണ് മറ്റ് അണിയറപ്രവർത്തകർ.
