'ഇവിടുന്നാ എല്ലാത്തിന്റെയും തുടക്കം'; ദൃശ്യ വിസ്മയമൊരുക്കി ഋഷഭ് ഷെട്ടി; കാന്താരയുടെ ട്രെയിലർ പുറത്ത്
തിരുവനന്തപുരം: തെന്നിന്ത്യൻ സിനിമാ പ്രേക്ഷകർ ഏറെ പ്രതീക്ഷയോടെ കാത്തിരിക്കുന്ന 'കാന്താര ചാപ്റ്റർ 1' ചിത്രത്തിന്റെ ട്രെയിലർ പുറത്തിറങ്ങി. ആദ്യ ഭാഗത്തെ വെല്ലുന്ന ദൃശ്യാനുഭവം നൽകുമെന്നുറപ്പുനൽകുന്ന ട്രെയിലർ ഇതിനോടകം പ്രേക്ഷകശ്രദ്ധ നേടിക്കഴിഞ്ഞു. ഋഷഭ് ഷെട്ടി തന്നെയാണ് ചിത്രത്തിൽ പ്രധാന കഥാപാത്രമായ ബെർമെ ആയി എത്തുന്നത്.
2022-ൽ പുറത്തിറങ്ങി കന്നഡ സിനിമാ ചരിത്രത്തിൽ റെക്കോർഡുകൾ തകർത്ത 'കാന്താര'യുടെ പ്രീക്വൽ ആയാണ് 'കാന്താര ചാപ്റ്റർ 1' ഒരുങ്ങുന്നത്. ഏകദേശം 310 കോടി രൂപയോളം കന്നഡയിൽ നിന്നുമാത്രം നേടിയ ചിത്രം, പിന്നീട് വിവിധ ഭാഷകളിലേക്ക് മൊഴിമാറ്റം ചെയ്യപ്പെട്ട് വൻ വിജയമായി മാറിയിരുന്നു. മലയാളി താരം ജയറാമും ചിത്രത്തിൽ ഒരു പ്രധാന വേഷം ചെയ്യുന്നുണ്ട്.
ചിത്രത്തിൽ കനകവതി എന്ന കഥാപാത്രത്തെ രുക്മിണി വസന്ത് അവതരിപ്പിക്കുന്നു. ഋഷഭ് ഷെട്ടി തന്നെയാണ് ചിത്രത്തിന് തിരക്കഥയെഴുതി സംവിധാനം ചെയ്തിരിക്കുന്നത്. ഹോംബാലെ ഫിലിംസ് ആണ് നിർമ്മാതാക്കൾ. 150 കോടി രൂപയോളം മുതൽമുടക്കിലാണ് ഈ ബ്രഹ്മാണ്ഡ ചിത്രം ഒരുങ്ങുന്നതെന്നാണ് റിപ്പോർട്ടുകൾ. 'കാന്താര'യുടെ സംഭവങ്ങൾക്ക് മുൻപുള്ള കഥയാകും 'ചാപ്റ്റർ 1' പറയുക. ഒക്ടോബർ 2-ന് ചിത്രം തിയേറ്ററുകളിലെത്തും.
