സംവിധാനത്തിന് മുന്‍പ് തന്നെ തിരിച്ചടി; ക്രിഷ് 4 സിനിമയുടെ സുപ്രധാന വിവരങ്ങള്‍ ചോര്‍ന്നതായി റിപ്പോര്‍ട്ട്; കഥയും കഥാപാത്രങ്ങളുമാണ് ചോര്‍ന്നത്‌
ബോളിവുഡിലെ പ്രശസ്ത സൂപ്പർഹീറോ ഫ്രാഞ്ചൈസിയായ ‘ക്രിഷ്’ പുതിയ ഭാഗവുമായി തിരിച്ചു വരാനൊരുങ്ങുന്നു. ഹൃത്വിക് റോഷനെ കേന്ദ്രകഥാപാത്രമാക്കി ഒരുക്കുന്ന ‘ക്രിഷ് 4’ എന്ന ചിത്രത്തിന്റെ ഒരുക്കങ്ങൾ പുരോഗമിക്കുകയാണ്. ആദ്യമായി സംവിധായകനാവാൻ ഹൃത്വിക് തയ്യാറെടുക്കുന്ന ഈ ചിത്രത്തിന്റെ ഷൂട്ടിംഗ് 2026ല്‍ ആരംഭിക്കുമെന്ന് പിതാവും സംവിധായകനുമായ രാകേഷ് റോഷന്‍ സ്ഥിരീകരിച്ചു.
ഇതിനിടയിൽ, ചിത്രത്തെക്കുറിച്ചുള്ള നിരവധി വിവരങ്ങൾ സോഷ്യൽ മീഡിയയിൽ ചോർന്നിരിക്കുകയാണ്. പ്രധാന കഥാപാത്രമായി ഹൃത്വിക് തന്നെയാണ് തുടർന്നും എത്തുന്നത്. എന്നാൽ, ഈ ഭാഗത്തിൽ നായികയായി നോറ ഫത്തേഹിയെ കാണാനാകും എന്നാണ് പുതിയ റിപ്പോർട്ടുകൾ സൂചിപ്പിക്കുന്നത്. മുമ്പത്തെ ഭാഗങ്ങളിൽ അഭിനയിച്ച പ്രിയങ്ക ചോപ്ര ഒഴിവാകുന്നു. അതേസമയം, ആദ്യ ചിത്രമായ കോയി മില്‍ ഗയയില്‍ നായികയായി എത്തിയ പ്രീതി സിന്റ വീണ്ടും ഈ ചിത്രത്തിലൂടെ പ്രത്യക്ഷപ്പെടും.
ചിത്രത്തിന്റെ കഥയും ഏറെ ആവേശം ഉയർത്തുന്ന തരത്തിലാണ്. “കാല്‍” എന്ന വില്ലനെ തോൽപ്പിച്ച ശേഷം ക്രിഷിന് ടൈം ട്രാവൽ ചെയ്യാനുള്ള കഴിവ് ലഭിക്കുന്നു. ഇതിലൂടെ ഒരു വലിയ ദുരന്തത്തിൽ നിന്നു മനുഷ്യരാശിയെ രക്ഷിക്കുന്നതും, ചരിത്രവും ഭാവിയും മാറ്റിമറിക്കുന്നതും ചിത്രത്തിന്റെ ഇതിവൃത്തമായി മുന്നോട്ടുപോകും. ക്രിഷ് പലകാലഘട്ടങ്ങളിലൂടെയും സഞ്ചരിക്കുന്നു എന്നതാണ് സിനിമയുടെ പ്രധാന ആകർഷണം.
കൂടാതെ, വിവേക് ഓബ്‌റോയ് ചിത്രത്തിൽ കാമിയോ വേഷത്തിലായിരിക്കും എത്തുക. നസിറുദ്ദീൻ ഷാ, രേഖ തുടങ്ങിയ പ്രമുഖരും വേഷമിടുമെന്ന് ഐഎംഡിബി വെബ്‌സൈറ്റ് വെളിപ്പെടുത്തിയിട്ടുണ്ട്.
2003ൽ പുറത്തിറങ്ങിയ കോയി മിൽ ഗയ എന്ന സിനിമയിലാണ് ഈ സയൻസ് ഫിക്ഷൻ കഥയ്ക്ക് തുടക്കമാകുന്നത്. പിന്നീട് 2006ലെ ക്രിഷ് സിനിമയിലൂടെ സൂപ്പർഹീറോ ഫ്രാഞ്ചൈസിയായി മാറി. 2013ലെ ക്രിഷ് 3ൽ ഹൃത്വിക് ഇരട്ട വേഷങ്ങൾ കൈകാര്യം ചെയ്തു. പുതിയ ചിത്രത്തിൽ കൂടുതൽ ആവേശകരമായ ട്രാക്കുകളും, സാങ്കേതികവിദ്യയും കാഴ്‌ചകളായി പ്രതീക്ഷിക്കാം.
‘ക്രിഷ് 4’യെ കുറിച്ചുള്ള വിവരം പ്രേക്ഷകരെ ആവേശത്തിലാഴ്ത്തുമ്പോൾ, ഈ ചിത്രത്തിന്റെ ഔദ്യോഗിക പ്രഖ്യാപനത്തിനായി ആരാധകർ കാത്തിരിക്കുകയാണ്.
