സൂപ്പർതാരം വിജയ് നായകനായെത്തിയ 'ഖുഷി' എന്ന ചിത്രം 25 വർഷങ്ങൾക്കു ശേഷം വീണ്ടും തിയേറ്ററുകളിലേക്ക്. 2000-ൽ പുറത്തിറങ്ങിയ എസ്.ജെ. സൂര്യ സംവിധാനം ചെയ്ത ഈ റൊമാൻ്റിക് കോമഡി ചിത്രം നാളെ (14-06-2024) മുതൽ പ്രദർശനത്തിനെത്തും. ശക്തി ഫിലിം ഫാക്റ്ററിയാണ് ചിത്രത്തിൻ്റെ റീ റിലീസ് വിതരണം ചെയ്യുന്നത്.

2004-ൽ റിലീസ് ചെയ്ത് വൻ വിജയമായിരുന്ന വിജയിയുടെ 'ഗില്ലി'യുടെ റീ റിലീസ് വിതരണം ചെയ്തതും ഇതേ ടീമായിരുന്നു. 'ഗില്ലി'യുടെ റീ റിലീസ് ബോക്സ് ഓഫീസ് കളക്ഷനിൽ വലിയ നേട്ടമുണ്ടാക്കിയ ചിത്രങ്ങളുടെ പട്ടികയിൽ ഇടം പിടിച്ചിരുന്നു. 'ഖുഷി'യും സമാനമായ വിജയം നേടുമെന്ന് അണിയറപ്രവർത്തകർ പ്രതീക്ഷിക്കുന്നു.

ശിവ, ജെന്നി എന്നീ കോളേജ് വിദ്യാർത്ഥികളായാണ് ചിത്രത്തിൽ വിജയും ജ്യോതികയും അഭിനയിച്ചത്. ഇവരുടെ പ്രണയവും പോരാട്ടവുമാണ് സിനിമയുടെ പ്രധാന ഇതിവൃത്തം. 2000-ങ്ങളുടെ തുടക്കത്തിലെ മികച്ച റൊമാൻ്റിക് കോമഡി ചിത്രങ്ങളിലൊന്നായി 'ഖുഷി' കണക്കാക്കപ്പെടുന്നു. ദേവ ചിട്ടപ്പെടുത്തിയ ചിത്രത്തിലെ ഗാനങ്ങൾ അക്കാലയളവിൽ ഏറെ ശ്രദ്ധിക്കപ്പെട്ടിരുന്നു.

വിജയകുമാർ, ശിൽപ ഷെട്ടി, മുംതാസ്, നിഴൽഗൾ രവി തുടങ്ങി നിരവധി താരങ്ങൾ ചിത്രത്തിൽ അണിനിരന്നിരുന്നു. ജീവയാണ് ഛായാഗ്രഹണം നിർവഹിച്ചത്. ബി. ലെനിൻ, വി.ടി. വിജയൻ എന്നിവർ ചേർന്നാണ് എഡിറ്റിംഗ് നിർവഹിച്ചത്. എ.എം. രത്നം ആയിരുന്നു ചിത്രത്തിൻ്റെ നിർമ്മാതാവ്. 'ഗില്ലി' നേടിയ ബോക്സ് ഓഫീസ് വിജയത്തെ 'ഖുഷി'ക്കും ആവർത്തിക്കാനാകുമോ എന്ന് ഉറ്റുനോക്കുകയാണ് സിനിമാ ലോകം.

വിജയ്ഖുഷി

സ്വന്തം ലേഖകൻ