കല്യാണസൗഗന്ധികത്തിലെ ആ വില്ലൻ വേഷത്തിലൂടെ പ്രേക്ഷകമനസ്സിൽ ഇടം നേടിയ മുഖം; ഉർവശിയുടെയും, കൽപ്പനയുടെയും സഹോദരന്; നിരവധി ചിത്രങ്ങളിലൂടെ പകർന്നാടിയ നടൻ ഇനി ഓർമ്മ; കമൽ റോയ് വിടവാങ്ങുമ്പോൾ
ചെന്നൈ: പ്രശസ്ത നടിമാരായ ഉർവശി, കൽപ്പന, കലാരഞ്ജിനി എന്നിവരുടെ സഹോദരനും നടനുമായ കമൽ റോയ് അന്തരിച്ചു. ചെന്നൈയിൽ വെച്ചായിരുന്നു അന്ത്യം. മലയാള സിനിമയിലെ ശ്രദ്ധേയ സാന്നിധ്യമായിരുന്ന അദ്ദേഹം നിരവധി ചിത്രങ്ങളിൽ അഭിനയിച്ചിട്ടുണ്ട്.
'സായൂജ്യം', 'കോളിളക്കം', 'മഞ്ഞ്', 'കിങ്ങിണി', 'കല്യാണസൗഗന്ധികം', 'വാചാലം', 'ശോഭനം', 'ദ് കിങ് മേക്കർ', 'ലീഡർ' തുടങ്ങിയവയാണ് കമൽ റോയ് അഭിനയിച്ച പ്രധാന ചിത്രങ്ങൾ. 'യുവജനോത്സവം' എന്ന സിനിമയിലെ 'ഇന്നും എന്റെ കണ്ണുനീരിൽ' എന്ന ഗാനരംഗത്തിലെ അദ്ദേഹത്തിന്റെ സാന്നിധ്യം ഏറെ ശ്രദ്ധിക്കപ്പെട്ടു. 'കല്യാണസൗഗന്ധികം' സിനിമയിലെ വില്ലൻ വേഷവും പ്രേക്ഷകശ്രദ്ധ നേടിയിരുന്നു.
പരേതനായ നടൻ നന്ദു അദ്ദേഹത്തിന്റെ മറ്റൊരു സഹോദരനാണ്. ചവറ വി.പി. നായരുടെയും വിജയലക്ഷ്മിയുടെയും മകനാണ്. ഭാര്യയും ഒരു മകനുമുണ്ട്. കമൽ റോയിയുടെ വിയോഗം മലയാള ചലച്ചിത്ര ലോകത്തിന് വലിയൊരു നഷ്ടമാണ്.
കമൽ റോയിയുടെ വിയോഗത്തോടെ മലയാള സിനിമയ്ക്ക് നഷ്ടമായത് ഒരു കാലഘട്ടത്തിന്റെ ഓർമ്മകളെ കൂടിയാണ്. ലളിതമായ പെരുമാറ്റം കൊണ്ടും തന്മയത്വമുള്ള അഭിനയം കൊണ്ടും സഹപ്രവർത്തകർക്കിടയിൽ അദ്ദേഹം പ്രിയങ്കരനായിരുന്നു. സിനിമയിൽ സജീവമായിരുന്ന കാലത്തും അല്ലാത്തപ്പോഴും തന്റെ സഹോദരിമാരുടെ വിജയങ്ങളിൽ അഭിമാനിച്ചിരുന്ന ഒരു വലിയ ജ്യേഷ്ഠനായിരുന്നു അദ്ദേഹം.
