കൊച്ചി: നീരജ് മാധവും അൽത്താഫ് സലീമും പ്രധാന വേഷങ്ങളിലെത്തുന്ന സയൻസ് ഫിക്ഷൻ കോമഡി ചിത്രം 'പ്ലൂട്ടോ'യുടെ ചിത്രീകരണം പൂർത്തിയായി. 'എങ്കിലും ചന്ദ്രികേ' എന്ന ചിത്രത്തിന് ശേഷം ആദിത്യൻ ചന്ദ്രശേഖർ സംവിധാനം ചെയ്യുന്ന രണ്ടാമത്തെ ചിത്രമാണിത്. ഓർക്കിഡ് ഫിലിംസ് ഇന്റർനാഷണലിന്റെ ബാനറിൽ രെജു കുമാർ, രശ്മി രെജു എന്നിവർ ചേർന്നാണ് 'പ്ലൂട്ടോ' നിർമ്മിക്കുന്നത്. മലയാള സിനിമയിൽ അപൂർവമായി കൈകാര്യം ചെയ്യുന്ന 'ഏലിയൻ കോമഡി' വിഭാഗത്തിൽ ഒരു വഴിത്തിരിവാകും ഈ ചിത്രം എന്നാണ് പ്രതീക്ഷിക്കുന്നത്.

ചിത്രത്തിൽ അൽത്താഫ് സലിം ഒരു ഏലിയൻ കഥാപാത്രത്തെയാണ് അവതരിപ്പിക്കുന്നത്. മനുഷ്യലോകത്തേക്ക് എത്തുന്ന ഈ അന്യഗ്രഹജീവിയെ ചുറ്റിപ്പറ്റിയുള്ള അബദ്ധങ്ങളും തമാശകളുമാണ് ചിത്രത്തിന്റെ പ്രധാന പ്രമേയം. നീരജ് മാധവ്, അൽത്താഫ് സലിം എന്നിവരെ കൂടാതെ അജു വർഗ്ഗീസ്, ആർഷാ ബൈജു, ദിനേശ് പ്രഭാകർ, വിനീത് തട്ടിൽ, സുബിൻ ടാർസൻ, നിഹാൽ, സഹീർ മുഹമ്മദ്, തുഷാര പിള്ള, സച്ചിൻ ജോസഫ്, നിമ്ന ഫത്തൂമി തുടങ്ങിയ വലിയ താരനിര ചിത്രത്തിലുണ്ട്. ഛായാഗ്രഹണം: വിഷ്ണു ശർമ്മ, കഥ, തിരക്കഥ: നിയാസ് മുഹമ്മദ്, സംഗീതം: അർക്കാഡോ, എഡിറ്റർ: സനത് ശിവരാജ്, വിഎഫ്എക്സ്: ഫ്ലയിങ് പ്ലൂട്ടോ.

നീരജ് മാധവ്അൽത്താഫ് സലിംആദിത്യൻ ചന്ദ്രശേഖർ

സ്വന്തം ലേഖകൻ