'എക്സ്ട്രാ ഫിറ്റിങ് നീക്കം ചെയ്തതല്ല, കഠിനാധ്വാനത്തിന്റെ ഫലം'; ഹാഷിമോട്ടോ തൈറോയിഡൈറ്റിസിന്റെ ചികിത്സയിലായിരുന്നു; ബോഡി ഷൈമിങ്‌ കമന്റുകൾ കണ്ടപ്പോൾ ചിരിയാണ് വന്നത്; മറുപടി പറയാത്തത് ചില യൂട്യൂബർമാരുടെ വീട്ടിലെ കഞ്ഞിക്ക് വകയാകുന്നത് എന്റെ കണ്ടെന്റുകളാണെന്ന് അറിയാവുന്നത് കൊണ്ട്; പരിഹാസങ്ങൾക്ക് മറുപടിയുമായി അന്നാ രാജൻ
കൊച്ചി: ബോഡി ഷൈമിങ്‌ കമന്റുകൾക്ക് മറുപടി നൽകി നടി അന്ന രേഷ്മ രാജൻ. 'എക്സ്ട്രാ ഫിറ്റിങ്' ഊരിയതല്ല, മറിച്ച് കഠിനാധ്വാനത്തിലൂടെയാണ് ശരീരഭാരം കുറച്ചതെന്ന് അന്ന സാമൂഹമാധ്യമങ്ങളിലൂടെ വ്യക്തമാക്കി. ഹാഷിമോട്ടോ തൈറോയിഡൈറ്റിസ് എന്ന രോഗത്തിന്റെ ചികിത്സയിലായിരുന്നു താനെന്നും, അതുകൊണ്ടുണ്ടായ ശരീരമാറ്റങ്ങളെക്കുറിച്ചും നടി വെളിപ്പെടുത്തി.
'ഇത് എക്സ്ട്രാ ഫിറ്റിങ് നീക്കം ചെയ്തത് കൊണ്ടല്ല, കഠിനാധ്വാനം ചെയ്തതിന്റെ ഫലമാണ്,' അന്ന രേഷ്മ രാജൻ പറഞ്ഞു. 'ശരീരഭാരം കുറഞ്ഞതിൽ ഇപ്പോൾ വളരെ സന്തോഷമുണ്ട്. ശരീരം വളരെയധികം ആരോഗ്യമുള്ളതായി തോന്നുന്നു. ഹാഷിമോട്ടോ തൈറോയിഡൈറ്റിസ് എന്ന രോഗത്തിന്റെ ചികിത്സയിലാണ് ഞാൻ. തടി കുറച്ചപ്പോൾ മുമ്പത്തേക്കാൾ ചെറുപ്പമായതുപോലെ തോന്നുന്നു, ഇപ്പോൾ ഏറെ ആത്മവിശ്വാസം തോന്നുന്നു എന്ന് അഭിമാനത്തോടെ പറയാൻ കഴിയും. ഇപ്പോഴും ഞാൻ ലക്ഷ്യത്തിലെത്തിയിട്ടില്ല, ഇനിയും ഒരുപാട് ദൂരം പോകാനുണ്ട്.'
'ഇതാണ് ഞാൻ ആഗ്രഹിച്ചിരുന്ന യഥാർഥ ഞാൻ. ഒടുവിൽ, ഞാൻ അത് നേടി. എല്ലാ യൂട്യൂബർമാരോടും, എന്നെക്കുറിച്ച് കണ്ടന്റ് ഉണ്ടാക്കുന്നവരോടും ഒരു കാര്യം പറയാനാഗ്രഹിക്കുന്നു. ഞാൻ ഇത്രയും കാലം നിശബ്ദത പാലിച്ചത് എനിക്ക് ഉത്തരമില്ലാത്തതുകൊണ്ടല്ല, മറിച്ച് എന്നെക്കുറിച്ചുള്ള കണ്ടന്റുകളാണ് നിങ്ങളുടെ വീട്ടിലെ കഞ്ഞിക്ക് വകയാകുന്നത് എന്ന് എനിക്കറിയാവുന്നതുകൊണ്ടാണ്. അതിനാൽ ദയവായി, തുടരുക. പക്ഷേ നിങ്ങളുടെ സന്തോഷത്തിനായി മറ്റുള്ളവരെ വേദനിപ്പിക്കരുത്. നിങ്ങളെ സന്തോഷിപ്പിക്കുന്ന കാര്യങ്ങൾ ചെയ്യുക പക്ഷേ അത് ദയയുള്ളതായിരിക്കട്ടെ,' അന്ന രേഷ്മ രാജന്റെ വാക്കുകൾ.
തന്റെ ശരീരമാറ്റങ്ങളെക്കുറിച്ച് സോഷ്യൽ മീഡിയയിൽ വന്ന കമന്റുകൾക്ക് മറുപടി നൽകുകയായിരുന്നു അന്ന. പലരും 'എക്സ്ട്രാ ഫിറ്റിങ്' ഉപയോഗിക്കുന്നുവെന്ന് പ്രചരിപ്പിച്ചുവെന്നും, അത്തരം കമന്റുകൾ കണ്ടപ്പോൾ ചിരിയാണ് വന്നതെന്നും താരം കൂട്ടിച്ചേർത്തു. 'ലിച്ചി' എന്ന വിളിപ്പേരിൽ പ്രശസ്തയായ നടിയാണ് അന്ന രാജൻ. 'അങ്കമാലി ഡയറീസ്' എന്ന ചിത്രത്തിലൂടെയാണ് അവർ സിനിമയിലെത്തിയത്. ഈ സിനിമയിലെ കഥാപാത്രത്തിന്റെ പേരാണ് ലിച്ചി എന്നത്. ഉദ്ഘാടന വേദികളിലെ വസ്ത്രധാരണത്തിന്റെ പേരിൽ അവർ സാമൂഹിക മാധ്യമങ്ങളിൽ നിരന്തരമായി വിമർശനങ്ങൾ നേരിടാറുണ്ട്. ഈ കമന്റുകൾ പലപ്പോഴും ബോഡി ഷെയ്മിങ് എന്ന നിലയിലേക്കും മാറാറുണ്ട്. ഇതിനെല്ലാമുള്ള ശക്തമായ മറുപടിയാണ് ഇപ്പോൾ അന്ന നൽകിയിരിക്കുന്നത്.
