ദൈവത്തിൽ ഞാൻ ഒട്ടും വിശ്വസിക്കുന്നില്ല; അന്ന് അച്ഛൻ അങ്ങനെ പറഞ്ഞപ്പോൾ ദേഷ്യം തോന്നി; തുറന്ന് പറഞ്ഞ് ബാഹുബലി സംവിധായകൻ എസ് എസ് രാജമൗലി

ഹൈദരാബാദ്: 'ബാഹുബലി', 'ആർ.ആർ.ആർ.' തുടങ്ങിയ വിസ്മയചിത്രങ്ങൾ ഒരുക്കിയ സംവിധായകൻ എസ്.എസ്. രാജമൗലി തനിക്ക് ദൈവത്തിൽ വിശ്വാസമില്ലെന്ന് തുറന്നുപറഞ്ഞു. ഹൈദരാബാദിൽ നടന്ന തൻ്റെ പുതിയ ചിത്രമായ 'വാരണാസി'യുടെ ലോഞ്ച് ചടങ്ങിലാണ് അദ്ദേഹം ഇക്കാര്യം വ്യക്തമാക്കിയത്. ഈ പ്രസ്താവന സമൂഹമാധ്യമങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.

തൻ്റെ പിതാവ് ഹനുമാൻ സ്വാമി കാര്യങ്ങൾ പിന്നിൽ നിന്ന് ശ്രദ്ധിച്ചുകൊള്ളും എന്ന് പറഞ്ഞതിനെക്കുറിച്ച് ഓർക്കുമ്പോൾ തനിക്ക് ദേഷ്യം വരുന്നുണ്ടെന്ന് രാജമൗലി പറഞ്ഞു. "ഞാൻ ദൈവത്തിൽ വിശ്വസിക്കുന്നില്ല. ഇതിനെക്കുറിച്ച് ആലോചിക്കുമ്പോൾ എനിക്ക് ദേഷ്യം വരുന്നു," അദ്ദേഹം കൂട്ടിച്ചേർത്തു. ഭാര്യക്ക് ഹനുമാൻ സ്വാമിയോടുള്ള ഇഷ്ടത്തെക്കുറിച്ചും അവരുടെ സംസാരത്തെക്കുറിച്ചും പരാമർശിച്ച അദ്ദേഹം, ഇത്തരം കാര്യങ്ങളിൽ വിശ്വസിക്കാൻ നിർദ്ദേശിച്ചപ്പോൾ തനിക്ക് വല്ലാതെ ദേഷ്യം വന്നതായും വ്യക്തമാക്കി.

ഹിന്ദു പുരാണങ്ങളെ തൻ്റെ സിനിമകളിൽ സമന്വയിപ്പിക്കുന്നതിൽ പ്രാവീണ്യം നേടിയ രാജമൗലിയുടെ വാക്കുകൾ പലർക്കും ആശയക്കുഴപ്പമുണ്ടാക്കിയിട്ടുണ്ട്. 'ബാഹുബലി' പോലുള്ള സിനിമകൾ പുരാണങ്ങളിൽ നിന്ന് പ്രചോദനം ഉൾക്കൊണ്ടതാണെന്നും, 'വാരണാസി' എന്ന പേര് തിരഞ്ഞെടുത്ത് പുരാണ കഥാപാത്രങ്ങളെ അവതരിപ്പിക്കുമ്പോൾ ദൈവവിശ്വാസമില്ലെന്ന് പറയുന്നതിലെ വൈരുധ്യം പലരും ചൂണ്ടിക്കാണിക്കുന്നു. ഇത് ജനങ്ങൾക്ക് വിഷമമുണ്ടാക്കുമെന്നും, ഇത്രയും നിലവാരമുള്ള ഒരാളിൽ നിന്ന് ഇത് പ്രതീക്ഷിക്കുന്നില്ലെന്നും പലരും അഭിപ്രായപ്പെട്ടു.