'ഓരോ സംവിധായകര്‍ക്കും പുതിയതെന്തോ പറയാനുണ്ടാകും; പുതുമയാര്‍ന്ന കഥ ആദ്യ കേള്‍വിയില്‍ തന്നെ എനിക്ക് ഇഷ്ടപ്പെട്ടു; അത് സിനിമയായി പരിണമിച്ചു; ഇനി നിങ്ങള്‍ക്കാണ് ഇഷ്ടപ്പെടേണ്ടത്': കുറിപ്പുമായി മമ്മൂട്ടി
മെഗാസ്റ്റാര്‍ മമ്മൂട്ടിയുടെ പുതിയ ചിത്രം ബസൂക്ക റിലീസിനായി മണിക്കൂറുകള്‍ മാത്രം ബാക്കിനില്‍ക്കെ, സിനിമാപ്രേമികളില്‍ വലിയ ആവേശമാണ്. ട്രെയ്‌ലറും ഗാനങ്ങളും ഇതിനോടകം തന്നെ സമൂഹമാധ്യമങ്ങളില്‍ ഹിറ്റായി മാറിയതിനു പിന്നാലെ, മമ്മൂട്ടിയുടെ ഒരു കുറിപ്പും ശ്രദ്ധേയമാകുകയാണ്. വളരെ പുതുമ തോന്നിയ കഥ തനിക്ക് ആദ്യ കേള്‍വിയില്‍ തന്നെ ഇഷ്ടമായെന്നും ഇനി പ്രേക്ഷകര്‍ക്കാണ് സിനിമ ഇഷ്ടപ്പെടേണ്ടതെന്നും മമ്മൂട്ടി തന്റെ സോഷ്യല്‍ മീഡിയയില്‍ കുറിച്ചു.
സിനിമയുടെ അണിയറപ്രവര്‍ത്തകര്‍ കഴിഞ്ഞ കുറച്ച് ദിവസങ്ങളായി ബസൂക്കയുടെ ട്രെയിലറും ഗാനങ്ങളും പങ്കുവെച്ചിരുന്നു. പ്രേക്ഷകരില്‍ നിന്നും ഇതിനോടു ലഭിച്ച പ്രതികരണങ്ങള്‍ ഏറെ മികച്ചതാണെന്നും, സിനിമയില്‍ ഒരു ഫ്രെഷ്നെസ്സ് പ്രേക്ഷകര്‍ക്ക് തീര്‍ച്ചയായും അനുഭവപ്പെടുമെന്നുമാണ് അഭിപ്രായം.
പോസ്റ്റിന്റെ പൂര്‍ണ്ണരൂപം:
പ്രിയമുള്ളവരെ…
വീണ്ടും ഒരു നവാഗത സംവിധായകനൊടോപ്പം ഞാൻ എത്തുകയാണ്, 'ഡിനോ ഡെന്നിസ്'. അദ്ദേഹം തന്നെയാണ് കഥയും, തിരക്കഥയും. ഏപ്രിൽ 10ന് (നാളെ) 'ബസൂക്ക' തിയേറ്ററുകളിൽ എത്തും. ഗെയിമിംഗ് പ്രമേയമായതും വളരെ പുതുമ തോന്നിയതും ആയ കഥ ആദ്യ കേൾവിയിൽ തന്നെ എനിക്ക് ഇഷ്ടപ്പെട്ടു. അത് സിനിമയായി പരിണമിച്ചു.
ഇനി നിങ്ങൾക്കാണ് ഇഷ്ടപ്പെടേണ്ടത്. എപ്പോഴും പറയാറുള്ളത് പോലെ പുതിയ ഓരോ സംവിധായകർക്കും പുതിയതെന്തോ പറയാനുണ്ടാകും.
അതിനൊപ്പം ഞാനും നിങ്ങളും നമ്മളും.
സ്നേഹപൂർവ്വം
മമ്മൂട്ടി
മലയാളത്തിലെ എക്കാലത്തെയും മികച്ച രചയിതാക്കളിലൊരാളായ കലൂർ ഡെന്നിസിൻ്റെ മകനാണ് ഈ ചിത്രത്തിന്റെ സംവിധായകനായ ഡീനോ ഡെന്നിസ് എന്നതും ബസൂക്കയുടെ പ്രത്യേകതയാണ്. മമ്മൂട്ടിക്കൊപ്പം പ്രശസ്ത തമിഴ് സംവിധായകനും നടനുമായ ഗൗതം വാസുദേവ് മേനോൻ നിർണ്ണായക കഥാപാത്രത്തെ അവതരിപ്പിക്കുന്നുണ്ട്. ബെഞ്ചമിൻ ജോഷ്വാ എന്ന കഥാപാത്രമായാണ് ഗൗതം മേനോൻ ഈ ചിത്രത്തിൽ വേഷമിട്ടിരിക്കുന്നത്. ചിത്രത്തിൽ സിദ്ധാർത്ഥ് ഭരതൻ, ഹക്കീം ഷാജഹാൻ, ഭാമ അരുൺ, ഡീൻ ഡെന്നിസ്, ദിവ്യ പിള്ള, സ്ഫടികം ജോർജ് എന്നിവരാണ് മറ്റ് പ്രധാന താരങ്ങൾ. കാപ്പ, അന്വേഷിപ്പിൻ കണ്ടെത്തും എന്നിവക്ക് ശേഷം സരിഗമയും തീയേറ്റർ ഓഫ് ഡ്രീംസും ചേർന്ന് നിർമ്മിക്കുന്ന ചിത്രം കൂടിയാണ് ബസൂക്ക.
