'ഒന്നുകിൽ ഇത് വലിയ ഹിറ്റാകും, അല്ലെങ്കിൽ വലിയ ഫ്ലോപ്പാകും'; ആദ്യമൊക്കെ ആളുകൾക്ക് ഉൾക്കൊള്ളാൻ പ്രയാസമായിരുന്നു; 'ആക്ഷൻ ഹീറോ ബിജു'വിനെക്കുറിച്ച് നിവിൻ പോളി പറയുന്നതിങ്ങനെ

കൊച്ചി: മലയാള സിനിമയിലെ പോലീസ് സ്റ്റോറികളുടെ ശൈലി തന്നെ മാറ്റിയെഴുതിയ ചിത്രമാണ് എബ്രിഡ് ഷൈൻ - നിവിൻ പോളി കൂട്ടുകെട്ടിലിറങ്ങിയ 'ആക്ഷൻ ഹീറോ ബിജു'. എന്നാൽ ചിത്രം റിലീസായ ആദ്യ സമയങ്ങളിൽ പ്രേക്ഷകരിൽ നിന്ന് നെഗറ്റീവ് പ്രതികരണങ്ങളാണ് ലഭിച്ചിരുന്നതെന്ന് നിവിൻ പോളി വെളിപ്പെടുത്തുന്നു. തന്റെ പുതിയ ചിത്രമായ 'സർവ്വം മായ'യുടെ പ്രൊമോഷന്റെ ഭാഗമായി നൽകിയ അഭിമുഖത്തിലാണ് താരം ഈ കാര്യങ്ങൾ പങ്കുവെച്ചത്.

സാധാരണ ഒരു പോലീസ് സിനിമ എന്ന് കേൾക്കുമ്പോൾ പ്രേക്ഷകർ പ്രതീക്ഷിക്കുന്നത് വലിയ ആക്ഷൻ രംഗങ്ങളും പറന്നുനടന്നുള്ള തല്ലുമാണ്. എന്നാൽ 'ആക്ഷൻ ഹീറോ ബിജു' ഒരു പോലീസ് സ്റ്റേഷനിലെ ദൈനംദിന സംഭവങ്ങളെ റിയലിസ്റ്റിക്കായി കാണിക്കാനാണ് ശ്രമിച്ചത്. ഈ വേറിട്ട പരീക്ഷണം ആദ്യ ഘട്ടത്തിൽ ആളുകൾക്ക് ഉൾക്കൊള്ളാൻ പ്രയാസമായിരുന്നു. സിനിമയുടെ ചിത്രീകരണ സമയത്ത് തന്നെ സംവിധായകൻ എബ്രിഡ് ഷൈൻ തന്നോട് പറഞ്ഞിരുന്നു, "എടാ, ഇത് ഒന്നുകിൽ വലിയ ഹിറ്റാകും അല്ലെങ്കിൽ വലിയ ഫ്ലോപ്പാകും" എന്ന്.

എങ്കിലും വ്യത്യസ്തമായ ഒന്ന് ചെയ്യണമെന്ന വാശിയോടെയാണ് ചിത്രം പൂർത്തിയാക്കിയത്. ആദ്യ ദിവസങ്ങളിലെ തണുത്ത പ്രതികരണത്തിന് ശേഷം സിനിമ പതുക്കെ ആളുകൾ ഏറ്റെടുത്തു. ഇന്ന് മലയാളത്തിലെ ഏറ്റവും മികച്ച പോലീസ് സിനിമകളിൽ ഒന്നായി അത് കണക്കാക്കപ്പെടുന്നു. 'ബിജു'വിന് ശേഷം വന്ന പല പോലീസ് സിനിമകളും ആ റിയലിസ്റ്റിക് പാറ്റേൺ പിന്തുടരാൻ തുടങ്ങിയെന്നും നിവിൻ പറഞ്ഞു.

ചിത്രത്തിന്റെ രണ്ടാം ഭാഗത്തിനായുള്ള കാത്തിരിപ്പിലാണ് ആരാധകർ. രണ്ടാം ഭാഗത്തിന്റെ പ്രീ-പ്രൊഡക്ഷൻ ജോലികൾ നടക്കുന്നുണ്ടെന്നും നിവിൻ തന്നെയായിരിക്കും ബിജു പൗലോസായി വീണ്ടും എത്തുകയെന്നും റിപ്പോർട്ടുകളുണ്ട്. ഇതിനിടെ ചിത്രത്തിന്റെ പകർപ്പവകാശവുമായി ബന്ധപ്പെട്ട് ചില നിയമപ്രശ്നങ്ങൾ ഉണ്ടായെങ്കിലും കോടതി നടപടികൾ സ്റ്റേ ചെയ്തതോടെ ആരാധകർ ആശ്വാസത്തിലാണ്.