അടുത്തിടെ കണ്ടതിൽ 'കിടു' പടങ്ങൾ ഇവയെന്ന് പ്രിയ താരങ്ങൾ; ലാൽ സാറിന്റെ ആ പ്രകടനം കണ്ട് അന്തംവിട്ടുപോയി, റിപ്പീറ്റ് അടിച്ചു കണ്ടു; മനസ്സുതുറന്ന് നിവിനും അജുവും

കൊച്ചി: മലയാളികളുടെ പ്രിയതാരം നിവിൻ പോളിയും അജു വർഗീസും വീണ്ടും ഒന്നിക്കുന്ന 'സർവ്വം മായ' എന്ന ചിത്രത്തിന്റെ റിലീസിനായി കാത്തിരിക്കുകയാണ് ആരാധകർ. ക്രിസ്മസിന് തീയറ്ററുകളിൽ എത്തുന്ന ഈ ഹൊറർ കോമഡി ചിത്രത്തിന്റെ പ്രൊമോഷൻ തിരക്കിലാണ് താരങ്ങളിപ്പോൾ. ഈ വേളയിൽ അവതാരക പേളി മാണിക്ക് നൽകിയ അഭിമുഖത്തിൽ നിവിൻ പോളിയും അജു വർഗീസും പങ്കുവെച്ച വിശേഷങ്ങളാണ് ഇപ്പോൾ സിനിമാ ലോകത്ത് ചർച്ചയാകുന്നത്.

അടുത്തിടെ കണ്ടതിൽ വെച്ച് നിവിനെ അമ്പരപ്പിച്ച സിനിമ ഏതെന്ന ചോദ്യത്തിന് അപ്രതീക്ഷിത മറുപടിയാണ് താരം നൽകിയത്. സിനിമകൾ കാണുന്നത് വളരെ കുറവാണെന്ന മുഖവുരയോടെ നിവിൻ പറഞ്ഞ പേര് 'ലോക' എന്നതായിരുന്നു. അടുത്തിടെ കണ്ടതിൽ തനിക്ക് ഏറെ പ്രിയപ്പെട്ട ചിത്രം ഇതാണെന്ന് നിവിൻ തുറന്നു പറഞ്ഞു. കൂടെയുണ്ടായിരുന്ന അജു വർഗീസ് തനിക്ക് ഇഷ്ടപ്പെട്ടത് 'എക്കോ' (Echo) എന്ന ചിത്രമാണെന്ന് മറുപടി നൽകി.

എന്നാൽ ഇതിനുപിന്നാലെ മോഹൻലാൽ നായകനായ 'തുടരും' എന്ന ചിത്രത്തെക്കുറിച്ച് താരങ്ങൾ വാചാലരായി. 'തുടരും' എന്ന സിനിമ ഒരു ഗംഭീര അനുഭവമായിരുന്നു എന്നാണ് നിവിൻ വിശേഷിപ്പിച്ചത്. "തുടരും നല്ലതായിരുന്നു, പൊളിയായിരുന്നു. ലാൽ സാറിനെ അങ്ങനെ കണ്ടപ്പോൾ ഭയങ്കരമായി ഇഷ്ടപ്പെട്ടു. വൈകാരികമായി ആ കഥാപാത്രത്തോട് വലിയ അടുപ്പം തോന്നി. വളരെ നന്നായി നിർമ്മിച്ച സിനിമയാണത്," നിവിൻ പറഞ്ഞു. ചിത്രത്തിലെ വില്ലൻ കഥാപാത്രത്തെയും നിവിൻ പുകഴ്ത്തി. 'തുടരും' എന്ന ചിത്രത്തിലെ ഒരു പോലീസ് സ്റ്റേഷൻ ഫൈറ്റ് സീക്വൻസിൽ മോഹൻലാൽ നടത്തുന്ന മാസ്മരികമായ 'ജമ്പ്' തനിക്ക് ഏറെ പ്രിയപ്പെട്ടതാണെന്നും അത് പലതവണ ഒടിടിയിൽ റിപ്പീറ്റ് അടിച്ചു കണ്ടുവെന്നും അജു വർഗീസും കൂട്ടിച്ചേർത്തു.

അഖിൽ സത്യൻ സംവിധാനം ചെയ്യുന്ന 'സർവ്വം മായ' എന്ന ചിത്രത്തിലാണ് നിവിനും അജുവും ഇപ്പോൾ വേഷമിടുന്നത്. ജനാർദ്ദനൻ, രഘുനാഥ്‌ പലേരി തുടങ്ങിയ വമ്പൻ താരനിര അണിനിരക്കുന്ന ഈ ഹൊറർ ഫാന്റസി ചിത്രം ക്രിസ്മസ് വിരുന്നായി തീയറ്ററുകളിൽ എത്തും. ഫയർഫ്‌ളൈ ഫിലിംസിന്റെ ബാനറിൽ ഒരുങ്ങുന്ന ചിത്രത്തിന് സംഗീതം നൽകുന്നത് ജസ്റ്റിൻ പ്രഭാകരനാണ്.