അവിടെ നിന്ന് തിരിച്ചുവന്നപ്പോൾ നല്ല ക്ഷീണമുണ്ടായിരുന്നു; മൂന്ന് തവണ കാപ്പി കുടിച്ചു; കുറച്ച് ബിസ്ക്കറ്റ് കഴിച്ചു; പിന്നെ നല്ല ആശ്വാസമായിരുന്നു; തുറന്നുപറഞ്ഞ് രേണു സുധി

കൊച്ചി: ബിഗ് ബോസ് മലയാളം സീസണിൽ നിന്ന് സ്വയം പിന്മാറിയതിനെക്കുറിച്ച് നടി രേണു സുധി. ഷോയുടെ ആദ്യ ആഴ്ച പിന്നിട്ടതോടെ തന്നെ ഹൗസിൽ തുടരാൻ മാനസികമായി ബുദ്ധിമുട്ട് നേരിട്ടെന്നും, ഇത് തുടർന്നാണ് സ്വമേധയാ ഷോയിൽ നിന്ന് വാക്കൗട്ട് ചെയ്തതെന്നും രേണു സുധി ഒരു യൂട്യൂബ് ചാനലിന് നൽകിയ അഭിമുഖത്തിൽ വ്യക്തമാക്കി.

"എൻ്റെ മക്കളെ ഓർത്ത് കരയാൻ പോലും എനിക്ക് സാധിച്ചില്ല. അവിടെ നിൽക്കാൻ എനിക്ക് കഴിഞ്ഞില്ല. 35 ദിവസം 35 വർഷം പോലെ തോന്നി. ബിഗ് ബോസ് ഹൗസിൽ 100 ദിവസം തികയ്ക്കുന്നവരെ സമ്മതിക്കണം. അവർ മാനസികമായി അതിന് സജ്ജരായിരിക്കും. എനിക്ക് അങ്ങനെയായിരുന്നില്ല," രേണു പറഞ്ഞു. ഭർത്താവ് കൊല്ലം സുധിയുടെ മരണസമയത്തുണ്ടായ സമാനമായ ട്രോമയാണ് ബിഗ് ബോസ് ഹൗസിൽ വെച്ച് തനിക്ക് അനുഭവപ്പെട്ടതെന്നും അവർ കൂട്ടിച്ചേർത്തു.

ഷോയിൽ നിന്ന് പുറത്തിറങ്ങിയ ശേഷം വീട്ടിലെത്തിയ രേണു, ഇളയ മകന് നൽകാനായി നിറയെ ചോക്ലേറ്റുകളുമായാണ് എത്തിയതെന്നും അറിയിച്ചു. പുറത്ത് മാനസികമായി ശക്തയാണെന്ന് തോന്നുമെങ്കിലും, ഷോയുടെ അകത്ത് ചിലർക്ക് പിടിച്ചുനിൽക്കാൻ സാധിക്കില്ലെന്നും ചിലർ അതിജീവിക്കുമെന്നും അവർ നിരീക്ഷിച്ചു. ബിഗ് ബോസ് കണ്ടവർക്ക് തനിക്ക് മധുരം എത്രത്തോളം ഇഷ്ടമാണെന്ന് മനസ്സിലായി കാണുമെന്നും, വീട്ടിൽ വെച്ച് ഷുഗർ കൂടിയോ എന്ന് ആശങ്കയുണ്ടെന്നും രേണു സുധി സൂചിപ്പിച്ചു.