ഇത്രയും കഴിക്കുമ്പോൾ തന്നെ ഏകദേശം ശരീരത്തിന് ആവശ്യമായ പ്രോട്ടീന്‍ ലഭിക്കും; കട്ടത്തൈര് കിട്ടുവാണേൽ ബെറ്റർ; തന്റെ ഭക്ഷണക്രമത്തെ കുറിച്ച് തുറന്നുപറഞ്ഞ് നടി സാമന്ത
പ്രമുഖ ചലച്ചിത്രതാരം സാമന്ത റൂത്ത് പ്രഭു തൻ്റെ ചിട്ടയായ ജീവിതശൈലിയെക്കുറിച്ചും ഭക്ഷണക്രമത്തെക്കുറിച്ചും കൂടുതൽ വിവരങ്ങൾ പങ്കുവെച്ചതോടെ ഇത് വലിയ ശ്രദ്ധ നേടുന്നു. തൻ്റെ ആരോഗ്യപരമായ അവസ്ഥയെ മികച്ച രീതിയിൽ നേരിടുന്നതിനായി സാമന്ത പിന്തുടരുന്ന ഭക്ഷണക്രമത്തെക്കുറിച്ചും ശരീരഭാരത്തെക്കുറിച്ചും അവർ തുറന്നു സംസാരിച്ചു.
ഒരു പോഡ്‌കാസ്റ്റ് അഭിമുഖത്തിലാണ് സാമന്ത താൻ പ്രതിദിനം 100 ഗ്രാം പ്രോട്ടീൻ കഴിക്കുന്നതായി വെളിപ്പെടുത്തിയത്. 50 കിലോഗ്രാം ഭാരമുള്ള തനിക്ക് ആവശ്യമായ പ്രോട്ടീൻ അളവ് കൃത്യമായി ശരീരത്തിൽ എത്തുന്നുണ്ടെന്നും ഇത് ആരോഗ്യവും ക്ഷേമവും നിലനിർത്താൻ സഹായിക്കുന്നുണ്ടെന്നും അവർ പറഞ്ഞു. സാമന്തയുടെ വെളിപ്പെടുത്തലിനോടനുബന്ധിച്ച്, ഏകദേശം 55-60 കിലോഗ്രാം ഭാരമുള്ള ഒരു ഇന്ത്യൻ സ്ത്രീക്ക് ഒരു ദിവസം 60-80 ഗ്രാം പ്രോട്ടീൻ ആവശ്യമുണ്ടെന്ന് ന്യൂട്രീഷ്യനിസ്റ്റ് റാഷി ചൗധരി വിശദീകരിച്ചു.
ഇത്രയും അളവ് പ്രോട്ടീൻ ലഭിക്കാൻ 200 ഗ്രാം കട്ടത്തൈര്, 150 ഗ്രാം പനീർ, അല്ലെങ്കിൽ ഏകദേശം 600 ഗ്രാം പരിപ്പ് എന്നിവ കഴിക്കാവുന്നതാണെന്നും, ഇവയെല്ലാം ചേർന്ന് 80 ഗ്രാം പ്രോട്ടീൻ ഉറപ്പാക്കാമെന്നും അവർ കൂട്ടിച്ചേർത്തു. പ്രോട്ടീൻ പൗഡർ പോലുള്ളവ ഭക്ഷണത്തിൽ ഉൾപ്പെടുത്തുന്നത് ആവശ്യമായ അളവ് നേടാൻ സഹായിക്കുമെന്നും ന്യൂട്രീഷ്യനിസ്റ്റ് സൂചിപ്പിച്ചു.
സസ്യാഹാര സ്രോതസ്സുകളിൽ പലപ്പോഴും കാർബോഹൈഡ്രേറ്റുകളും കൊഴുപ്പുകളും കൂടുതലായി കാണപ്പെടുന്നതിനാൽ മാക്രോ ന്യൂട്രിയന്റുകൾ ശ്രദ്ധാപൂർവം സമീകൃതമാക്കേണ്ടത് അത്യാവശ്യമാണെന്നും അവർ ഓർമ്മിപ്പിച്ചു. ദുർബലമായ ദഹനവ്യവസ്ഥയുള്ളവർക്ക് കൂടുതൽ പ്രോട്ടീൻ ദഹിപ്പിക്കാൻ ബുദ്ധിമുട്ടുണ്ടാകുമെന്നും ഇത് വയറുവീർപ്പ്, മലബന്ധം തുടങ്ങിയ പ്രശ്നങ്ങളിലേക്ക് നയിക്കുമെന്നും റാഷി ചൗധരി കൂട്ടിച്ചേർത്തു.
