ചെന്നൈ: തമിഴകത്തിന്റെ സൂപ്പർതാരം വിജയ് തനിക്ക് ജ്യേഷ്ഠനെപ്പോലെയാണെന്നും, തന്നെ 'കുട്ടി ദളപതി' എന്ന് വിളിക്കരുതെന്നും നടൻ ശിവകാർത്തികേയൻ. 'മദ്രാസി' എന്ന ചിത്രത്തിന്റെ ട്രെയിലർ ലോഞ്ചിനിടെയാണ് അദ്ദേഹം ഇക്കാര്യങ്ങൾ വ്യക്തമാക്കിയത്.

ചടങ്ങിൽ സംസാരിക്കവെ, വിജയ് ആരാധകരുടെ സംഘടന കെട്ടുറപ്പോടെ പ്രവർത്തിക്കുന്നതിനെക്കുറിച്ചും അദ്ദേഹത്തിന്റെ രാഷ്ട്രീയ പ്രവേശനത്തെക്കുറിച്ചും ശിവകാർത്തികേയൻ സൂചിപ്പിച്ചു. 'ജനനായകൻ' എന്ന ചിത്രത്തിന് ശേഷം വിജയ് രാഷ്ട്രീയ പ്രവേശനം പ്രഖ്യാപിച്ചപ്പോൾ, ആരാധകർ അദ്ദേഹത്തോടൊപ്പം അണിചേർന്ന് രാഷ്ട്രീയ പ്രവർത്തകരായി മാറിയെന്ന് അദ്ദേഹം ഓർമ്മിപ്പിച്ചു.

അതുപോലെ, നടൻ അജിത് കുമാർ ഒരു കാർ റേസിംഗിൽ പങ്കെടുക്കുമ്പോൾ പോലും വലിയ ജനക്കൂട്ടത്തെ ആകർഷിക്കുന്നു. വർഷങ്ങൾക്ക് മുമ്പ് സ്വന്തം ആരാധക കൂട്ടായ്മ പിരിച്ചുവിട്ടിട്ടും ഈ പ്രതിച്ഛായ നിലനിൽക്കുന്നു. ബഹുമുഖ പ്രതിഭയായ കമൽ ഹാസന് വിജയങ്ങളിലും പരാജയങ്ങളിലും അദ്ദേഹത്തോടൊപ്പം നിൽക്കുന്ന ആരാധകരുണ്ട്. സൂപ്പർസ്റ്റാർ രജനീകാന്ത് 50 വർഷമായി തന്റെ താരപദവി നിലനിർത്തുന്നത് ശക്തമായ ആരാധക പിന്തുണ ഉള്ളതുകൊണ്ടാണെന്നും ശിവകാർത്തികേയൻ കൂട്ടിച്ചേർത്തു.

അടുത്തിടെ പുറത്തിറങ്ങിയ 'ഗോട്ട്' എന്ന ചിത്രത്തിൽ വിജയ് ശിവകാർത്തികേയന് ഒരു തോക്ക് കൈമാറുന്ന രംഗം ഏറെ ശ്രദ്ധ നേടിയിരുന്നു. ഇത് വിജയ് തന്റെ പിൻഗാമിയായി ശിവകാർത്തികേയനെ അംഗീകരിക്കുന്നതിന്റെ സൂചനയായി പലരും വ്യാഖ്യാനിച്ചു. ഈ വിഷയത്തിൽ പ്രതികരിച്ച ശിവകാർത്തികേയൻ, തന്നെ 'അടുത്ത ദളപതി', 'കുട്ടി ദളപതി', 'ധിടീർ ദളപതി' എന്നിങ്ങനെ ചിത്രീകരിക്കുന്നതിനെക്കുറിച്ച് ചില വിമർശനങ്ങൾ ഉയർന്നിട്ടുണ്ടെന്നും, എന്നാൽ അത്തരം ഒരു പ്രതിച്ഛായ ഉണ്ടാക്കാൻ താൻ ശ്രമിച്ചിട്ടില്ലെന്നും വ്യക്തമാക്കി.

വിജയ്ശിവകാർത്തികേയൻ

സ്വന്തം ലേഖകൻ