കടൽതീരത്തെ സ്വകാര്യ വില്ലയിൽ വിജയ് ദേവരകൊണ്ടയും രശ്മികയും; സുഹൃത്തുക്കൾക്കൊപ്പം തായ്ലൻഡിൽ ഹണിമൂൺ ആഘോഷം; വൈറലായി വീഡിയോ
ഹൈദരാബാദ്: തെന്നിന്ത്യൻ സിനിമാലോകം ആഘോഷമാക്കിയ വിവാഹത്തിന് പിന്നാലെ വിജയ് ദേവരകൊണ്ടയും രശ്മിക മന്ദാനയും ഹണിമൂൺ ആഘോഷത്തിലാണ്. തായ്ലൻഡിലെ മനോഹരമായ കോ സാമുയി ദ്വീപിലാണ് താരദമ്പതികൾ തങ്ങളുടെ ഒഴിവുസമയങ്ങൾ ആസ്വദിക്കുന്നത്. കടൽത്തീരത്തോടു ചേർന്നുള്ള സ്വകാര്യ എയർബിഎൻബി വില്ലയാണ് ഇവർ താമസത്തിനായി തിരഞ്ഞെടുത്തത്.
പരമ്പരാഗത ആഡംബര റിസോർട്ടുകളേക്കാൾ ഉപരിയായി സ്വകാര്യതയ്ക്കും ശാന്തതയ്ക്കും മുൻഗണന നൽകിയാണ് ഇവർ ഈ ഇടം കണ്ടെത്തിയത്. ദമ്പതികൾക്കൊപ്പം അടുത്ത സുഹൃത്തുക്കളും ഈ യാത്രയിൽ പങ്കുചേരുന്നുണ്ടെന്നതാണ് മറ്റൊരു പ്രത്യേകത. കഴിഞ്ഞ ഫെബ്രുവരി 26-ന് ഉദയ്പൂരിൽ വെച്ചായിരുന്നു വിജയ്-രശ്മിക വിവാഹം. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത ലളിതവും എന്നാൽ സുന്ദരവുമായ ചടങ്ങുകൾക്ക് ശേഷം മാർച്ച് 4-ന് ഹൈദരാബാദിൽ വെച്ച് സിനിമാ മേഖലയിലുള്ളവർക്കായി വൻകിട റിസപ്ഷനും ഒരുക്കിയിരുന്നു.
തങ്ങളുടെ വിവാഹ സന്തോഷം ആരാധകരുമായി വ്യത്യസ്തമായ രീതിയിൽ പങ്കുവെച്ച താരങ്ങൾ ഏറെ പ്രശംസ പിടിച്ചുപറ്റി. കൊച്ചി, ഹൈദരാബാദ്, ഡൽഹി, മുംബൈ, ചെന്നൈ, ബെംഗളൂരു തുടങ്ങിയ നഗരങ്ങളിൽ മധുരപലഹാരങ്ങൾ വിതരണം ചെയ്തും വിവിധ ക്ഷേത്രങ്ങളിൽ അന്നദാനം നടത്തിയും താരങ്ങൾ വാർത്തകളിൽ ഇടം നേടിയിരുന്നു.
