കൊച്ചി: രാഹുൽ സദാശിവൻ സംവിധാനം ചെയ്ത ഭ്രമയുഗം എന്ന ഹൊറർ ചിത്രത്തിലെ മമ്മൂട്ടിയുടെ കൊടുമൺ പോറ്റി എന്ന കഥാപാത്രത്തെ മോഹൻലാൽ അവതരിപ്പിച്ചാൽ എങ്ങനെയിരിക്കും എന്ന സങ്കൽപ്പത്തിൽ നിർമ്മിച്ച എ ഐ ചിത്രങ്ങൾ സമൂഹമാധ്യമങ്ങളിൽ തരംഗമാവുന്നു. അടുത്തിടെ പുറത്തിറങ്ങിയ ചിത്രങ്ങളിൽ കലാപരമായും വാണിജ്യപരമായും മികച്ച വിജയം നേടിയ ഭ്രമയുഗത്തിൽ, കൊടുമൺ പോറ്റിയുടെ വേഷത്തിൽ മമ്മൂട്ടി അക്ഷരാർത്ഥത്തിൽ പ്രേക്ഷകരെ വിസ്മയിപ്പിച്ചിരുന്നു. അദ്ദേഹത്തെ അല്ലാതെ മറ്റൊരു നടനെ ആ ഗംഭീര വേഷത്തിൽ സങ്കൽപ്പിക്കാൻ പോലും സാധിക്കില്ല എന്നായിരുന്നു സിനിമാപ്രേമികളുടെയും നിരൂപകരുടെയും പൊതുവായ അഭിപ്രായം.

ഈ വിശേഷപ്പെട്ട സാഹചര്യത്തിലാണ് മോഹൻലാൽ കൊടുമൺ പോറ്റിയായി പ്രത്യക്ഷപ്പെടുന്ന അതിശയകരമായ എ ഐ ചിത്രങ്ങൾ സാമൂഹിക മാധ്യമങ്ങളിലെ വിവിധ പേജുകളിലൂടെ പ്രചരിക്കുന്നത്. കൊടുമൺ പോറ്റി എന്ന കഥാപാത്രത്തിൻ്റെ ഭാവങ്ങൾക്കപ്പുറം, ചിത്രത്തിലെ 'ചാത്തൻ' എന്ന കഥാപാത്രമായും മോഹൻലാലിനെ ഈ എ ഐ സൃഷ്ടികൾ അവതരിപ്പിക്കുന്നുണ്ട്. ഈ ചിത്രങ്ങൾ മോഹൻലാൽ, മമ്മൂട്ടി ആരാധകർ ഒരുപോലെ ഏറ്റെടുക്കുകയും, ഇരു താരങ്ങളെയും താരതമ്യം ചെയ്ത് വലിയ ചർച്ചകൾക്ക് തുടക്കമിടുകയും ചെയ്തിട്ടുണ്ട്. "ലാലേട്ടൻ ചെയ്താൽ ഇപ്പോൾ നമ്മൾ കണ്ട തരം മെത്തേഡ് ഫോർമാറ്റ് ആവില്ല... മറ്റൊരു രീതിയിൽ ആവും.... ചെയ്യാൻ ഒക്കെ പറ്റും... ഇത്തരം കഥകൾ ഒന്നും അവർ കമ്മിറ്റ് ചെയ്യില്ലല്ലോ.." എന്നും "മോനെ ദിനേശാ നിനക്ക് പോകാൻ അനുവാദം ഇല്ല സവാരി ഗിരി ഗിരി" എന്നുമുള്ള രസകരമായ കമന്റുകളാണ് ചിത്രങ്ങൾക്ക് താഴെ നിറയുന്നത്.

സെലിബ്രിറ്റി താരങ്ങളുടെ വ്യത്യസ്തങ്ങളായ എ ഐ ചിത്രങ്ങൾ സമൂഹമാധ്യമങ്ങളിൽ ഇപ്പോൾ ഒരു ആഗോള പ്രതിഭാസമായി മാറിയിരിക്കുകയാണ്. തമിഴ് സൂപ്പർ താരങ്ങൾ ചായക്കടയിൽ സൗഹൃദം പങ്കിടുന്നതും നടക്കാനിറങ്ങുന്നതും, മലയാളത്തിലെ പ്രമുഖ താരങ്ങൾ കാറ് വാങ്ങാൻ പോകുന്നതും, ദളപതി വിജയിയുടെ ഷൂട്ടിംഗ് ലൊക്കേഷൻ രംഗങ്ങളുമെല്ലാം ഇത്തരത്തിൽ എ ഐ ചിത്രങ്ങളായി മുമ്പ് ശ്രദ്ധ നേടിയിരുന്നു.

രാഹുൽ സദാശിവൻഭ്രമയുഗംമമ്മൂട്ടിമോഹൻലാൽ

സ്വന്തം ലേഖകൻ