'99 ഡേയ്സ് ഓഫ് ഫാന്‍ബോയ് മൊമന്റ്സ്, അപ്ഡേറ്റ് ഓണ്‍ നവംബര്‍ 8'; മോഹന്‍ലാല്‍ ചിത്രം എല്‍ 360 ന് പാക്കപ്പ്
മോഹന്‍ലാലിനെ നായകനാക്കി തരുണ്‍ മൂര്‍ത്തി സംവിധാനം ചെയ്യുന്ന പുതിയ ചിത്രം എല്‍ 360 യുടെ ചിത്രീകരണം പൂര്‍ത്തിയായി. ചിത്രത്തിന്റെ ടൈറ്റില്‍ പോസ്റ്റര്‍ നവംബര്‍ 1 ന് പുറത്തിറക്കാന്‍ തീരുമാനിച്ചിരുന്നെങ്കിലും എഡിറ്റര്‍ നിഷാദിന്റെ മരണത്തെ തുടര്‍ന്ന് നവംബര്‍ 8 ലേക്ക് ടൈറ്റില്‍ അനൗണ്‍സ്മെന്റ് മാറ്റുകയായിരുന്നു.
'99 ഡേയ്സ് ഓഫ് ഫാന്‍ബോയ് മൊമന്റ്സ്, അപ്ഡേറ്റ് ഓണ്‍ നവംബര്‍ 8' എന്നാണ് ചിത്രീകരണം പൂര്‍ത്തിയായ ചിത്രം പങ്കുവെച്ച് തരുണ്‍മൂര്‍ത്തി ഫേസ്ബുക്കില്‍ കുറിച്ചത്. ഒക്ടോബര്‍ 31 അര്‍ദ്ധരാത്രിയോടെയാണ് എല്‍ 360 യുടെ ചിത്രീകരണം പൂര്‍ത്തിയായത്. മോഹന്‍ലാല്‍ നായകനാവുന്ന എമ്പുരാന്റെ ലൊക്കേഷനില്‍ നിന്ന് എത്തിയാണ് എല്‍ 360യുടെ ചിത്രീകരണം മോഹന്‍ലാല്‍ പൂര്‍ത്തിയാക്കിയത്. രണ്ട് ചിത്രങ്ങളുടെയും ചിത്രീകരണം ഒരേ സമയം നടന്നിരുന്നു.
കഴിഞ്ഞ ദിവസങ്ങളില്‍ പകല്‍ എമ്പുരാനില്‍ അഭിനയിച്ച മോഹന്‍ലാല്‍ രാത്രിയില്‍ തേനിയില്‍ ചിത്രീകരണം നടന്നിരുന്ന എല്‍ 360 യുടെ ലൊക്കേഷനില്‍ എത്തുകയായിരുന്നു. എല്‍ 360 യുടെ ചിത്രീകരണം പൂര്‍ത്തിയായതോടെ മോഹന്‍ലാല്‍ വീണ്ടും എമ്പുരാനില്‍ ജോയിന്‍ ചെയ്യും.
രജപുത്ര ഫിലിംസ് നിര്‍മിക്കുന്ന എല്‍ 360യില്‍ ശോഭനയാണ് നായികയാവുന്നത്. പ്രശസ്ത ഫോട്ടോഗ്രാഫര്‍ കെ ആര്‍ സുനിലിന്റെ കഥയ്ക്ക് സുനിലും തരുണ്‍മൂര്‍ത്തിയും ചേര്‍ന്നാണ് തിരക്കഥ ഒരുക്കിയിരിക്കുന്നത്. നിരവധി അന്താരാഷ്ട്ര ആര്‍ട്ട് ഫെസ്റ്റിവലുകളില്‍ ഫോട്ടോഗ്രാഫിക് ഷോ അവതരിപ്പിച്ച കെ ആര്‍ സുനില്‍ എഴുത്തുകാരന്‍ കൂടിയാണ്.
