കണ്ണുർ: സിപിഎം കണ്ണൂർ ജില്ലാ സമ്മേളനം മാടായിയിൽ നടത്താൻ തീരുമാനമായതായി ജില്ലാ സെക്രട്ടറി എം.വി ജയരാജൻ വാർത്താ സമ്മേളനത്തിൽ അറിയിച്ചു.

സിപിഎം 23-ാം പാർട്ടി കോൺഗ്രസ്സ് 2022 ഏപ്രിൽ മാസം കണ്ണൂരിൽ വെച്ച് നടത്തുന്നതിന്റെ മുന്നോടിയായി കണ്ണൂർ ജില്ലാസമ്മേളനം ഡിസംബർ മധ്യത്തിൽ മാടായി ഏരിയയിലെ എരിപുരത്ത് വെച്ച് നടത്താനാണ് ജില്ലാകമ്മിറ്റി യോഗം തീരുമാനിച്ചത്. യോഗത്തിൽ പി ജയരാജൻ അധ്യക്ഷത വഹിച്ചു. കേന്ദ്ര-സംസ്ഥാന കമ്മിറ്റി തീരുമാനങ്ങൾ പി.ബി അംഗം കോടിയേരി ബാലകൃഷ്ണൻ വിശദീകരിച്ചു. ജില്ലയിലെ പ്രവർത്തനങ്ങളും, ഭാവി പരിപാടികളും ജില്ലാസെക്രട്ടറി എം വി ജയരാജൻ വിശദമാക്കി.

കേന്ദ്രകമ്മിറ്റിയംഗങ്ങളായ ഇ പി ജയരാജൻ, എം വി ഗോവിന്ദൻ മാസ്റ്റർ, പി കെ ശ്രീമതി ടീച്ചർ, കെ കെ ശൈലജ ടീച്ചർ എന്നിവരും യോഗത്തിൽ പങ്കെടുത്തു. ബ്രാഞ്ച് സമ്മേളനങ്ങൾ സപ്തംബർ 10 മുതൽ 30 വരെയുള്ള തീയ്യതികൾക്കുള്ളിലും, ലോക്കൽ സമ്മേളനങ്ങൾ ഒക്ടോബർ മാസവും, ഏരിയാസമ്മേളനങ്ങൾ നവംബർ മാസവും നടത്താൻ തീരുമാനമെടുത്തു. 3970 ബ്രാഞ്ച് സമ്മേളനങ്ങളോടനുബന്ധിച്ച് ചുരുങ്ങിയത് ഒരു കേന്ദ്രത്തിലെങ്കിലും ശുചീകരണ പ്രവർത്തനം നടത്തും.

കുടുംബയോഗങ്ങൾ ഓൺലൈനായിട്ടാണ് സംഘടിപ്പിക്കുക. ഉദ്ഘാടന സമ്മേളനത്തിൽ രക്തസാക്ഷി കുടുംബങ്ങളെയും, പഴയകാല പ്രവർത്തകരെയും ക്ഷണിക്കും. പ്രദേശങ്ങളെ അടിസ്ഥാമാക്കിയുള്ള 225 ലോക്കൽ സമ്മേളനങ്ങളോടനുബന്ധിച്ച് സ്വാതന്ത്ര്യസമരവും കമ്മ്യൂണിസ്റ്റുകാരും എന്ന വിഷയത്തെക്കുറിച്ചുള്ള പ്രഭാഷണവും, പൊതുയോഗവും ഓൺലൈനായി സംഘടിപ്പിക്കും. നവംബറിൽ നടത്തുന്ന 18 ഏരിയാസമ്മേളനങ്ങൾ രണ്ട് ദിവസങ്ങളിലായാണ് നടത്തുക.

കലാസാംസ്‌കാരിക പരിപാടികൾ, വെബിനാറുകൾ, ' പൊതുസമ്മേളനം എന്നിവ വെർച്വലായും, ചരിത്ര ചിത്രപ്രദർശനവും സംഘടിപ്പിക്കും. സമ്മേളനത്തോടനുബന്ധിച്ചുള്ള എല്ലാ പരിപാടികളും കോവിഡ് പ്രോട്ടോകോൾ പാലിച്ചുകൊണ്ടായിരിക്കും നടത്തുക. സമ്മേളന പ്രവർത്തനങ്ങൾ വിജയിപ്പിക്കണമെന്ന് എല്ലാ പാർട്ടി ഘടകങ്ങളോടും, പ്രവർത്തകരോടും സിപിഎം ജില്ലാകമ്മിറ്റി അഭ്യർത്ഥിക്കുന്നതായി എം.വി ജയരാജൻ പറഞ്ഞു '

സിപിഎം

അനീഷ് കുമാര്‍

    മറുനാടന്‍ മലയാളി ന്യൂസ് കോണ്‍ട്രിബ്യൂട്ടര്‍