വയോധികമാരെ ബൈക്കിൽ കയറ്റുന്നത് മകന്റെ സുഹൃത്ത് ചമഞ്ഞ്; പഴ്സും ബാഗുമൊക്കെ വാങ്ങി ബൈക്കിന്റെ ബാഗിൽ വയ്ക്കും; പോകേണ്ട സ്ഥലത്ത് ഇറക്കി വിട്ട ശേഷം ബാഗും പഴ്സുമായി പായും; മോഷണത്തിന് നൂതന തന്ത്രം പയറ്റിയ യുവാവ് പൊലീസ് പിടിയിൽ

അടൂർ: തനിയെ പോകുന്ന വയോധികന്മാരെ മക്കളുടെ കൂട്ടുകാരൻ ചമഞ്ഞ് പാട്ടിലാക്കി ബൈക്കിൽ കയറ്റിക്കൊണ്ടു പോയി മോഷണം നടത്തുകയും ചെയ്യുന്ന അത്യാന്താധുനിക മോഷ്ടാവ് പൊലീസ് പിടിയിൽ. കൊല്ലം പവിത്രേശ്വരം കരിമ്പിൻപുഴ പാങ്ങോട് പാലമുക്ക് ശ്രീ ഭവനം വി പി ശ്രീജു (30)വിനെയാണ് നൂറോളം സിസിടിവി കാമറകളുടെ സഹായത്തോടെ പൊലീസ് അറസ്റ്റ് ചെയ്തത്.

കഴിഞ്ഞ മാസം 27 ന് രാവിലെ ഒമ്പതരയോടെ പെരിങ്ങനാട് - ആസാദ് ജങ്ഷനിൽ പാറക്കൂട്ടം റോഡിലൂടെ നടന്നു വന്ന എൺപത്തിയൊന്നുകാരിയുടെ കഴുത്തിൽ കിടന്ന 40000 രൂപ വില വരുന്ന ഒരു പവനോളം തൂക്കമുള്ള സ്വർണമാല പെരിങ്ങനാട് ഓർത്തഡോക്സ് പള്ളി സെമിത്തേരിക്ക് സമീപം വെച്ച് ബൈക്കിലെത്തി പൊട്ടിച്ചെടുത്ത ശേഷം രക്ഷപ്പെട്ട കേസിലാണ് അറസ്റ്റ്. കൊല്ലം,പത്തനംതിട്ട ജില്ലകളിലായി നൂറോളം സ്ഥലങ്ങളിലെ സിസിടിവി ദൃശ്യങ്ങൾ പരിശോധിച്ചതിൽ നിന്നും സംഭവ സ്ഥലത്തുണ്ടായിരുന്ന നാട്ടുകാരിൽ നിന്നുമുള്ള സൂചനകളുടെ അടിസ്ഥാനത്തിലാണ് പ്രതിയെ പൊലീസ് തിരിച്ചറിഞ്ഞത്.

വയോധികകളെ മകന്റെ കൂട്ടുകാരൻ ആണെന്ന വ്യാജേനെ സമീപിച്ച് വാഹനത്തിൽ കയറ്റിക്കൊണ്ടു പോയി ആളൊഴിഞ്ഞ സ്ഥലത്തെത്തുമ്പോൾ കൈയിലുള്ള പേഴ്സും കഴുത്തിൽ കിടക്കുന്ന മാലയും തട്ടിയെടുത്ത് ഉപേക്ഷിച്ച് കടന്നു കളയുന്നതാണ് പ്രതിയുടെ രീതി. കുണ്ടറ, ഏനാത്ത്, അടൂർ സ്റ്റേഷൻ പരിധികളിൽ കഴിഞ്ഞ ഏതാനും മാസങ്ങളായി സമാന രീതിയിലുള്ള നിരവധി സംഭവങ്ങൾ ഉണ്ടായെങ്കിലും പൊലീസിന് പ്രതിയെ കണ്ടെത്താൻ സാധിച്ചിരുന്നില്ല.

കൊല്ലം, പത്തനംതിട്ട ജില്ലകൾ കേന്ദ്രീകരിച്ച് ഇയാൾ സമാന രീതിയിലുള്ള നിരവധി കുറ്റകൃത്യങ്ങൾ നടത്തിയിട്ടുള്ളതായി പൊലീസ് പറഞ്ഞു. വയോധികയുടെ മാല തട്ടിപ്പറിച്ചതുമായി ബന്ധപ്പെട്ട് ജില്ലാ പൊലീസ് മേധാവിയുടെ നിർദ്ദേശാനുസരണം പ്രത്യേക അന്വേഷണ സംഘം രൂപീകരിച്ചിരുന്നു. പ്രതിയിൽ നിന്നും അഞ്ച് പവനോളം സ്വർണാഭരണങ്ങളും ആറായിരത്തോളം രൂപയും പൊലീസ് കണ്ടെടുത്തു. കുണ്ടറ,ഏനാത്ത് പൊലീസ് സ്റ്റേഷൻ പരിധികളിലെ കുറ്റകൃത്യങ്ങൾ പ്രതി സമ്മതിച്ചിട്ടുണ്ട്. സമാന സ്വഭാവമുള്ള നിരവധി കുറ്റകൃത്യങ്ങൾ ചെയ്തതുമായി ബന്ധപ്പെട്ട സൂചന ലഭിച്ചതിനാൽ പ്രതിയെ കസ്റ്റഡിയിൽ വാങ്ങി കൂടുതൽ അന്വേഷണം നടത്തുമെന്ന് പൊലീസ് അറിയിച്ചു.

ജില്ലാ പൊലീസ് മേധാവി സ്വപ്നിൽ മധുകർ മഹാജന്റെ നിർദ്ദേശപ്രകാരം ഡിവൈ.എസ്‌പി ആർ.ബിനുവിന്റെ മേൽനോട്ടത്തിൽ രൂപീകരിച്ച അന്വേഷണ സംഘത്തിലെ ഉദ്യോഗസ്ഥരായ ഇൻസ്പെക്ടർ ടി ഡി പ്രജീഷ്, എസ്‌ഐ എം. മനീഷ്, സിവിൽ പൊലീസ് ഓഫീസർമാരായ സൂരജ്, പ്രവീൺ, രാജ്കുമാർ എന്നിവരടങ്ങുന്ന സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.