ഉമ്മുൽഖുവൈൻ: യുഎഇയിൽ അനധികൃതമായി കാർ റേസ് നടത്തിയ നിരവധി വാഹനങ്ങൾ പിടിച്ചെടുത്തു. ജനങ്ങൾക്ക് ശല്യം ഉണ്ടാക്കുന്ന രീതിയിൽ വാഹനവുമായി സ്റ്റണ്ടിങ്ങും ഡ്രിഫ്റ്റും നടത്തിയ വാഹനങ്ങളാണ് അധികൃതർ പിടിച്ചെടുത്തിരിക്കുന്നത്.

എമിറേറ്റിലെ റോഡുകളിൽ അശ്രദ്ധമായി വാഹനമോടിക്കുകയും അനുമതിയില്ലാതെ റേസിങ്ങും സ്റ്റണ്ടും നടത്തുകയും ചെയ്തതിന് നിരവധി വാഹനങ്ങൾ ഉമ്മുൽഖുവൈൻ പോലീസ് പിടിച്ചെടുത്തു. പൊതു സുരക്ഷയെ അപകടകരമായി ബാധിക്കുന്ന തരത്തിലുള്ള പെരുമാറ്റങ്ങൾ തടയുന്നതിന്റെ ഭാ​ഗമായാണ് ഇത്തരമൊരു നടപടിയെന്ന് അധികൃതർ വ്യക്തമാക്കി.

മറ്റു ഡ്രൈവർമാരെയും യാത്രക്കാരെയും ഇത്തരത്തിലുള്ള പ്രവൃത്തികൾ അപകടത്തിലാക്കുമെന്നതിനാൽ റോ‍‍ഡ് സുരക്ഷ ഉറപ്പാക്കുന്നതിനായി നിയമം ലംഘിക്കുന്നവർക്കെതിരെ നടപടികൾ ശക്തമാക്കുമെന്ന് ട്രാഫിക് ആൻഡ് പട്രോൾസ് വിഭാ​ഗം അധികൃതർ വ്യക്തമാക്കി. അപകടങ്ങളും നിയമപരമായ പ്രത്യാഘാതങ്ങളും തടയുന്നതിന് എല്ലാ വാഹനമോടിക്കുന്നവരും ഗതാഗത നിയമങ്ങളും ചട്ടങ്ങളും പാലിക്കണമെന്ന് അവർ ആവശ്യപ്പെടുകയും ചെയ്തു.

അനധികൃതമായി റോഡിലൂടെ മത്സരങ്ങളും സ്റ്റണ്ടുകളും നടത്തുന്നതിനെതിരെ കർശന നിയമ നടപടികൾ എടുക്കുമെന്നും വാഹനം കണ്ടുകെട്ടുന്നതിനോടൊപ്പം പിഴകൾ ചുമത്തുമെന്നും അധികൃതർ വ്യക്തമാക്കി. റോ‍ഡ് സുരക്ഷയെപ്പറ്റി ബോധവാന്മാരാക്കുന്നതിനായി പൊതുജനങ്ങൾക്ക് കാമ്പയിനുകൾ സംഘടിപ്പിക്കുകയും ചെയ്യുന്നുണ്ട്.

കാർസ്റ്റണ്ട്വാഹനങ്ങൾപിടിച്ചെടുത്തു

സ്വന്തം ലേഖകൻ