അവിശ്വാസവും അകലവും കൂടുന്നു; ബജറ്റിന് പിന്നാലെ എഫ്‌സിഐ അടച്ചുപൂട്ടാൻ ഗൂഢാലോചന ആരോപിച്ച് കർഷകർ; താങ്ങുവില നൽകി വിളകൾ സംഭരിക്കാൻ എഫ്‌സിഐക്ക് വിഹിതം പൂജ്യം; ഫെബ്രുവരി ആറിന് രാജ്യവ്യാപക ഉപരോധമെന്ന് കർഷക യൂണിയനുകൾ; ഉച്ചയ്ക്ക് 12 മുതൽ മൂന്നുവരെ ദേശീയ-സംസ്ഥാന പാതകളിൽ വാഹനങ്ങൾ തടയും; നിലപാട് കടുപ്പിച്ച് കേന്ദ്രസർക്കാരും
ന്യൂഡൽഹി: കേന്ദ്രസർക്കാർ നടപടികൾ കടുപ്പിച്ചതിന് പിന്നാലെ കർഷകരും പ്രതിഷേധത്തിന്റെ സ്വരം മാറ്റുന്നു. ബജറ്റ് അവതരണം കഴിഞ്ഞതോടെ രാജ്യവ്യാപകമായ പ്രക്ഷോഭത്തിനാണ് കർഷകർ ഒരുങ്ങുന്നത്. ബജറ്റിൽ കാര്യമില്ലെന്നും മൂന്നു കാർഷിക നിയമങ്ങൾ പിൻവലിക്കുന്നതിലാണ് തങ്ങളുടെ പ്രശ്‌നമെന്നും കർഷകർ പറയുന്നു. ഫെബ്രുവരി ആറിന് രാജ്യവ്യാപകമായി റോഡുകൾ തടയുമെന്ന് ഭാരതീയ കിസാൻ യൂണിയൻ നേതാവ് ബൽബീർ സിങ് രജേവാൾ അറിയിച്ചു.
ഉച്ചയ്ക്ക് 12 മുതൽ മൂന്നുവരെ ദേശീയ, സംസ്ഥാന പാതകൾ ഉപരോധിക്കുമെന്ന് കർഷക സമര നേതാവ് യോഗേന്ദ്ര യാദവ് വാർത്താ സമ്മേളനത്തിൽ പറഞ്ഞു. 'കഴിഞ്ഞ വർഷം എംഎസ്‌പിയിൽ സംഭരണത്തിനായി എഫ്‌സിഐക്ക് വായ്പ വഴി നീട്ടിയ ധനസഹായത്തിനുള്ള ബജറ്റ് വിഹിതം 1,36,600 കോടി രൂപയായിരുന്നു. ഈ വർഷം ഒരു തുകയും അനുവദിച്ചിട്ടില്ല. എഫ്‌സിഐ അടച്ചുപൂട്ടാനുള്ള ഗൂഢാലോചനയാണ് ഇതെന്ന് കർഷകർ സംശയിക്കുന്നു'-യോഗേന്ദ്ര യാദവ് വാർത്താ സമ്മേളനത്തിൽ പറഞ്ഞു.
കർഷക സമരം നടക്കുന്ന പ്രദേശങ്ങളിൽ ഇന്റർനെറ്റ് വിച്ഛേദിച്ചതിലും കേന്ദ്ര ബജറ്റിൽ കർഷകരെ അവഗണിച്ചതിനുമുള്ള മറുപടിയാണ് ഫെബ്രുവരി ആറിലെ പ്രതിഷേധമെന്നും സമരക്കാർ അറിയിച്ചു. വരുമാനം വർധിപ്പിക്കുന്നതിനെ കുറിച്ചോ തൊഴിൽ സൃഷ്ടിക്കുന്നതിനെ കുറിച്ചോ പരാമർശിക്കാത്ത ബജറ്റ്, തങ്ങളുടെ ആശങ്കകൾ പരിഗണിക്കുന്നതിൽ പരാജയപ്പെട്ടുവെന്ന് കർഷക സംഘടനാ പ്രതിനിധികൾ പറഞ്ഞു.
കാർഷിക നിയമങ്ങൾ പിൻവലിക്കില്ലെന്ന സൂചന ധനമന്ത്രി നിർമ്മലാ സീതാരാമൻ നൽകിയിരുന്നു. കേന്ദ്രം കൊണ്ടു വന്ന പുതിയ നിയമങ്ങൾ കർഷകർക്ക് ഗുണകരമാണെന്ന് പറയുകയും ചെയ്തു. ഇതോടെ നിയമങ്ങൾ പിൻവലിക്കില്ലെന്ന് പറയുകയാണ്. കാർഷിക മേഖലയ്ക്കായുള്ള പദ്ധതികൾ പ്രഖ്യാപിച്ചപ്പോൾ ലോക്സഭയിൽ പ്രതിപക്ഷ ബഹളവും ഉണ്ടായി. ഇത് ധനമന്ത്രി വകവച്ചില്ല.
കർഷകർക്ക് മിനിമം താങ്ങുവിലയിൽ ഉറപ്പു നൽകി എന്നതു മാത്രമാണ് ശ്രദ്ധേയം. 16.5 ലക്ഷം കോടി രൂപ കർഷകർക്ക് നൽകാൻ ലക്ഷ്യമിടുന്നുവെന്നും പറഞ്ഞു. കർഷകരുടെ ക്ഷേമം ഉറപ്പുവരുത്താൻ സർക്കാർ പ്രതിജ്ഞാബദ്ധമെന്ന് ധനമന്ത്രി കൂട്ടിച്ചേർത്തു. ഇതോടെയാണ് പ്രതിപക്ഷ ബഹളം തുടർന്നത്. കർഷക ഭാഗം വായിച്ചു തീരും വരെ പ്രതിഷേധം തുടർന്നു. നടപ്പ് സാമ്പത്തിക വർഷം കർഷകർക്ക് ഗോതമ്പിന് താങ്ങുവിലയായി 75000 കോടി രൂപ നൽകിയെന്നും പ്രഖ്യാപിച്ചു. സംഭരണത്തിന്റെ പ്രയോജനം 43 ലക്ഷം കർഷകർക്ക് പ്രയോജനപ്പെട്ടു. വിവിധ കാർഷിക ഉത്പന്നങ്ങളുടെ താങ്ങുവിലയായി 2021 ൽ 1.72 ലക്ഷം കോടി ചെലവഴിക്കും
2020-ൽ 75,020 കോടി കർഷകർക്ക് വിതരണം ചെയ്തുവെന്ന് ധനമന്ത്രി പറഞ്ഞു. കാർഷിക വായ്പകൾ വർധിപ്പിക്കും. വരുന്ന സാമ്പത്തിക വർഷം 16.50 ലക്ഷം കോടി രൂപയുടെ കാർഷിക വായ്പ ലക്ഷ്യമിടുന്നുവെന്നും കൂട്ടിച്ചേർത്തു. സൗരോർജ്ജ കോർപ്പറേഷന് 1,000 കോടി രൂപയും പുനരുപയോഗ ഊർജ്ജ വികസന ഏജൻസിക്ക് 1,500 കോടി രൂപയും വകയിരുത്തി. ഇതിനൊപ്പം തമിഴ്‌നാട്ടിൽ കടൽ പായൽ പാർക്കും മത്സ്യ കൃഷി പ്രോത്സാഹനത്തിനുണ്ട്. കർഷക നിയമങ്ങൾ ഗുണകരമായെന്ന് കണക്ക് നിരത്തി സമർത്ഥിക്കാനും ധനമന്ത്രി ശ്രമിച്ചു. ഈ സമയം പ്രതിപക്ഷം ബഹളമുണ്ടാക്കുകയും ചെയ്തു.
ഗ്യാസ് വിതരണ ശൃംഖലയിലേക്ക് നൂറ് നഗരങ്ങളെ കൂടി ഉൾപ്പെടുത്തും ഊർജ്ജമേഖലയ്ക്ക് 3.05 ലക്ഷം കോടി വകയിരുത്തി യൂറോപ്പിൽ നിന്നും ജപ്പാനിൽ നിന്നും കൂടുതൽ കപ്പലുകളെ ഇന്ത്യയിലേക്ക് കൊണ്ടുവരാൻ നടപടിയെടുക്കും. റെയിൽവേയ്ക്ക് 1.10 കോടി രൂപ വികസനപദ്ധതികൾക്കും.1.7 ലക്ഷം കോടി വികസനപ്രവർത്തനങ്ങൾക്കുമായി അനുവദിച്ചു ചെറുകിട കമ്പനികളുടെ നിർവചനം നിലവിലെ പരിധി 50 ലക്ഷത്തിൽ നിന്ന് മൂലധന അടിത്തറ 2 കോടി രൂപയായി ഉയർത്തിയെന്നും ധനമന്ത്രി പ്രഖ്യാപിച്ചു.
കേന്ദ്ര സർക്കാരിന്റെ ബജറ്റ് ആറ് മേഖലകളെ മുൻനിർത്തിയുള്ളതായിരിക്കുമെന്ന് ധനമന്ത്രി നിർമലാ സീതാരാമൻ പറഞ്ഞിരുന്നു. ആരോഗ്യം, അടിസ്ഥാനസൗകര്യം, സമഗ്രവികസനം, മാനവിക മൂലധന വികസനം, ഗവേഷണവും വികസനവും, മിനിമം ഗവൺമെന്റ് മാക്‌സിമം ഗവേർണൻസ് എന്നിവയായിരിക്കും ബജറ്റിന്റെ ആറ് തൂണുകൾ എന്ന് മന്ത്രി ബജറ്റ് അവതരണത്തിന് ആമുഖമായി മന്ത്രി പറഞ്ഞിരുന്നു. ഇതിൽ കൃഷി ഉൾപ്പെട്ടിരുന്നില്ല. ഇതും നിരാശയാണ്. പ്രതിഷേധിക്കുന്നവരെ പറ്റി പ്രതികരിക്കാനും മന്ത്രി തയ്യാറായില്ല. കണക്കുകളിലൂടെ സമരം അനാവശ്യമാണെന്ന് പറയാതെ പറയുകയും ചെയ്യും. കർഷക സമരത്തിനോടുള്ള നിലപാട് ബജറ്റിൽ പ്രതീക്ഷിച്ചതുമാണ്. ഇതിൽ കർഷകാനുകൂല മനസ്സില്ലെന്ന് തെളിയുകയാണ് ബജറ്റിൽ.
