ജിഎസ്ടി കുറയുമെന്ന് പ്രതീക്ഷിച്ചിരുന്നു; ഒന്നും നടന്നില്ല..ഉത്സവ സീസണും വെല്ലുവിളിയായി; ഓഗസ്റ്റ് മാസത്തിലെ കാർ വിൽപ്പനയിൽ വൻ ഇടിവ്; 7.5% ഇടിവ് രേഖപ്പെടുത്തി
2025 ഓഗസ്റ്റിൽ രാജ്യത്തെ കാർ വിൽപ്പനയിൽ 7.5 ശതമാനത്തിന്റെ ഗണ്യമായ ഇടിവ് രേഖപ്പെടുത്തി. വാഹന വ്യവസായത്തിന് ഇത് വലിയ തിരിച്ചടിയായിരിക്കുകയാണ്. കഴിഞ്ഞ വർഷത്തെ അപേക്ഷിച്ച് ഉപഭോക്താക്കൾ പുതിയ വാഹനങ്ങൾ വാങ്ങുന്നത് മാറ്റിവെച്ചതാണ് വിൽപ്പന കുറയാൻ പ്രധാന കാരണം. ജിഎസ്ടി നിരക്കിൽ ഇളവ് വരുമെന്ന സൂചനകളും വരാനിരിക്കുന്ന ഉത്സവ സീസണും ഉപഭോക്താക്കളെ കാത്തിരിപ്പ് വർദ്ധിപ്പിച്ചുവെന്ന് റിപ്പോർട്ടുകൾ സൂചിപ്പിക്കുന്നു.
മാരുതി സുസുക്കി, ഹ്യുണ്ടായി, ടാറ്റ, മഹീന്ദ്ര, കിയ, ഹോണ്ട, ഫോക്സ്‌വാഗൺ, നിസാൻ, സിട്രോൺ, ജീപ്പ് തുടങ്ങിയ പ്രമുഖ നിർമ്മാതാക്കളുടെയെല്ലാം വിൽപ്പനയിൽ കാര്യമായ കുറവ് സംഭവിച്ചു. റെനോയുടെ വിൽപ്പന സ്ഥിരത നിലനിർത്തിയപ്പോൾ ടൊയോട്ട നേരിയ വർദ്ധനവ് രേഖപ്പെടുത്തി. സ്കോഡയും എംജി മോട്ടോറും ഓഗസ്റ്റിൽ മികച്ച പ്രകടനം കാഴ്ചവെച്ചു.
പ്രതിമാസ കണക്കുകൾ പരിശോധിക്കുമ്പോൾ, ഹ്യുണ്ടായിയുടെയും ടൊയോട്ടയുടെയും വിൽപ്പന വലിയ മാറ്റമില്ലാതെ തുടർന്നു. ടാറ്റയും റെനോയും മുൻ മാസത്തേക്കാൾ മെച്ചപ്പെട്ട പ്രകടനം കാഴ്ചവെച്ചെങ്കിലും മറ്റ് കമ്പനികളുടെയെല്ലാം വിൽപ്പന ഇടിഞ്ഞു.
ജിഎസ്ടി നിരക്കുകൾ കുറയ്ക്കുമെന്ന വാർത്തകൾ, ഉപഭോക്താക്കൾ തങ്ങളുടെ വാങ്ങലുകൾ വൈകിപ്പിക്കുന്നത്, വരാനിരിക്കുന്ന ഉത്സവ സീസണിനായി കാത്തിരിക്കുന്നത് എന്നിവയാണ് ഈ പ്രതിസന്ധിക്ക് പിന്നിലെ പ്രധാന കാരണങ്ങളായി വിലയിരുത്തപ്പെടുന്നത്.
