സെവൻ സീറ്റർ എസ്യുവികൾ സ്വന്തമാക്കാൻ ആണോ നിങ്ങൾ ആഗ്രഹിക്കുന്നത്; ഇന്ത്യൻ വിപണിയിൽ ഉടൻ പുറത്തിറങ്ങാൻ പോകുന്ന ഹൈബ്രിഡ് എസ്യുവികളെ കുറിച്ച് അറിയാം...
ഇന്ത്യൻ വാഹന വിപണിയിൽ ഹൈബ്രിഡ് എസ്യുവികൾക്ക്, പ്രത്യേകിച്ച് ഏഴ് സീറ്റർ വിഭാഗത്തിൽ, വൻ മുന്നേറ്റം പ്രതീക്ഷിക്കുന്നു. ഡീസൽ എസ്യുവികളെ ആശ്രയിക്കാതെ, ശക്തമായ ഹൈബ്രിഡ് എഞ്ചിനുകളുമായി ജെഎസ്ഡബ്ല്യു മോട്ടോഴ്സ്, ടൊയോട്ട, റെനോ തുടങ്ങിയ പ്രമുഖ നിർമ്മാതാക്കളിൽ നിന്നുള്ള പുതിയ മോഡലുകൾ ഈ വർഷം അവസാനത്തോടെ നിരത്തിലിറങ്ങാൻ ഒരുങ്ങുകയാണ്. ജെറ്റോർ ടി2 പ്ലഗ്-ഇൻ ഹൈബ്രിഡ്, ടൊയോട്ട അർബൻ ക്രൂയിസർ ഹൈറൈഡർ 7-സീറ്റർ, റെനോ ബോറൈൽ എന്നിവയാണ് ഈ പട്ടികയിൽ പ്രധാനമായും ഇടംപിടിച്ചിരിക്കുന്നത്.
*ജെറ്റോർ ടി2 പ്ലഗ്-ഇൻ ഹൈബ്രിഡ്
ജെഎസ്ഡബ്ല്യു ഗ്രൂപ്പിന്റെ ഓട്ടോമോട്ടീവ് വിഭാഗമായ ജെഎസ്ഡബ്ല്യു മോട്ടോഴ്സ്, ജെറ്റോർ ടി2 പ്ലഗ്-ഇൻ ഹൈബ്രിഡ് എസ്യുവി ദീപാവലി ഉത്സവ സീസണിൽ പുറത്തിറക്കും. സികെഡി (കംപ്ലീറ്റ്ലി നോക്ക്ഡ് ഡൗൺ) കിറ്റ് റൂട്ട് വഴി ഇറക്കുമതി ചെയ്ത് ഇന്ത്യയിൽ അസംബിൾ ചെയ്യുന്ന ഈ വാഹനം, അന്താരാഷ്ട്ര തലത്തിൽ 7-സീറ്റർ ആയി വിൽക്കപ്പെടുന്നുണ്ടെങ്കിലും, ഇന്ത്യയിൽ തുടക്കത്തിൽ 5-സീറ്റർ വേരിയന്റാണ് എത്തുക. പിന്നീട് 7-സീറ്റർ പതിപ്പും പുറത്തിറക്കും. 1.5 ലിറ്റർ പെട്രോൾ എഞ്ചിനും രണ്ട് ഇലക്ട്രിക് മോട്ടോറുകളും 26.7 kWh ബാറ്ററിയും ചേർന്ന പവർട്രെയിൻ 375 bhp കരുത്തും 610 Nm ടോർക്കും ഉത്പാദിപ്പിക്കും. ഇലക്ട്രിക് മോഡിൽ 139 കിലോമീറ്റർ റേഞ്ച് വാഗ്ദാനം ചെയ്യുന്ന ഈ എസ്യുവിയുടെ വില ഏകദേശം 20-30 ലക്ഷം രൂപയായിരിക്കുമെന്നാണ് പ്രതീക്ഷിക്കുന്നത്.
*ടൊയോട്ട അർബൻ ക്രൂയിസർ ഹൈറൈഡർ 7-സീറ്റർ
ടൊയോട്ടയുടെ അർബൻ ക്രൂയിസർ ഹൈറൈഡറിന്റെ 7-സീറ്റർ പതിപ്പ് ഈ വർഷം അവസാനത്തോടെ വിപണിയിലെത്തും. അടുത്തിടെ ഇതിന്റെ ഒരു പുതിയ പരീക്ഷണ മോഡൽ കണ്ടെത്തിയതായും, നീളമുള്ള ഓവർഹാംഗുകളും വീതിയേറിയ സൈഡ് പ്രൊഫൈലും ഈ ടെസ്റ്റ് മോഡലിൽ ദൃശ്യമായതായും റിപ്പോർട്ടുകളുണ്ട്. 116 ബിഎച്ച്പി ഉത്പാദിപ്പിക്കുന്ന നിലവിലുള്ള 1.5 ലിറ്റർ പെട്രോൾ എഞ്ചിനും ഇലക്ട്രിക് മോട്ടോറും തന്നെയാണ് ഈ മോഡലിലും പ്രതീക്ഷിക്കുന്നത്. ഓൾ-വീൽ ഡ്രൈവ് സിസ്റ്റവും ഇതിൽ ഉൾപ്പെടുത്താൻ സാധ്യതയുണ്ടെന്നാണ് വിലയിരുത്തൽ. ഏകദേശം 18-22 ലക്ഷം രൂപയാണ് ടൊയോട്ട അർബൻ ക്രൂയിസർ ഹൈറൈഡർ 7-സീറ്ററിന് പ്രതീക്ഷിക്കുന്ന വില.
*റെനോ ബോറൈൽ
റെനോ ബോറൈൽ എന്ന പുതിയ മോഡൽ ഈ വർഷം അവസാനത്തോടെ പുറത്തിറങ്ങുമെന്നാണ് പ്രതീക്ഷിക്കുന്നത്. ഇത് അടുത്തിടെ പുറത്തിറക്കിയ പുതുതലമുറ ഡസ്റ്ററിന്റെ 7-സീറ്റർ പതിപ്പായിരിക്കും. 1.8 ലിറ്റർ പെട്രോൾ എഞ്ചിൻ, രണ്ട് ഇലക്ട്രിക് മോട്ടോറുകൾ, 1.4-kWh ബാറ്ററി പായ്ക്ക് എന്നിവയുമായി ചേർന്നുള്ള പവർട്രെയിനാണ് റെനോ ബോറൈലിൽ ഉണ്ടാകുക. ഈ എഞ്ചിൻ ഏകദേശം 160 bhp കരുത്ത് ഉത്പാദിപ്പിക്കുമെന്നാണ് റിപ്പോർട്ട്.
ഈ പുതിയ ഹൈബ്രിഡ് 7-സീറ്റർ എസ്യുവികളുടെ വരവ് ഇന്ത്യൻ വാഹന വിപണിയിൽ ഡീസൽ ഇതര വലിയ വാഹനങ്ങൾക്കുള്ള ആവശ്യം വർദ്ധിപ്പിക്കുമെന്നും, ഉപഭോക്താക്കൾക്ക് കൂടുതൽ പരിസ്ഥിതി സൗഹൃദവും കാര്യക്ഷമവുമായ യാത്രാമാർഗ്ഗങ്ങൾ നൽകുമെന്നും പ്രതീക്ഷിക്കുന്നു.
