ബീജിങ്: അമിത വ്യായാമം കാരണം 23 വയസ്സുകാരിക്ക് ഗുരുതര ആരോഗ്യ പ്രശ്നങ്ങൾ നേരിട്ടതായി റിപ്പോർട്ട്. ചൈനയിലെ ഷെജിയാങ് പ്രവിശ്യയിൽ നിന്നുള്ള യുവതിക്ക് അമിതമായ വ്യായാമം മൂലം ആർത്തവം നിലക്കുകയും, ശരീരത്തിലെ ഹോർമോൺ നില 50 വയസ്സുകാരിയുടേതിന് സമാനമായി മാറുകയും ചെയ്തതായി ഡോക്ടർമാർ കണ്ടെത്തി. വൃക്കരോഗത്തിന്റെ പ്രാഥമിക ലക്ഷണങ്ങളും യുവതിയിൽ പ്രകടമായിട്ടുണ്ട്.

സൗത്ത് ചൈന മോർണിംഗ് പോസ്റ്റ് റിപ്പോർട്ട് ചെയ്തതനുസരിച്ച്, യുവതി കഴിഞ്ഞ ഏതാനും മാസങ്ങളായി ആഴ്ചയിൽ ആറ് തവണ, ഓരോ തവണയും ഏകദേശം 70 മിനിറ്റോളം കഠിനമായി വ്യായാമം ചെയ്തിരുന്നു. ഇതിനെത്തുടർന്ന് ആർത്തവ ക്രമം തെറ്റുകയും പിന്നീട് പൂർണ്ണമായും നിലയ്ക്കുകയുമായിരുന്നു.

പരിശോധനയിൽ യുവതിക്ക് 'വ്യായാമ സംബന്ധിയായ അമെനോറിയ' (Exercise-related Amenorrhea) ആണെന്ന് ഡോക്ടർമാർ നിർണ്ണയിച്ചു. ആവശ്യത്തിന് ഊർജ്ജം ലഭിക്കാതെയും എന്നാൽ ഉയർന്ന ഊർജ്ജം ശരീരം ഉപയോഗിക്കുകയും ചെയ്യുമ്പോൾ അതിജീവനത്തിനായി ശരീരം പ്രത്യുത്പാദന പ്രവർത്തനങ്ങൾ താൽക്കാലികമായി നിർത്തുന്നതാണ് ഈ അവസ്ഥയ്ക്ക് കാരണം.

കൂടാതെ, യുവതിയുടെ മസ്തിഷ്കത്തിലെ ഗൊണാഡോട്രോഫിന്റെ സ്രവണം കുറഞ്ഞതായും, ഇത് സ്ത്രീ ഹോർമോൺ നില കുറയുന്നതിന് കാരണമായതായും കണ്ടെത്തി. നിലവിലെ സാഹചര്യത്തിൽ വ്യായാമങ്ങൾ താൽക്കാലികമായി നിർത്താനും, പരമ്പരാഗത ചൈനീസ് മരുന്നുകൾ കഴിക്കാനും ഡോക്ടർമാർ യുവതിക്ക് നിർദ്ദേശം നൽകിയിട്ടുണ്ട്.

ആരോഗ്യകരമായ ജീവിതശൈലിക്ക് വ്യായാമം അത്യാവശ്യമാണെങ്കിലും, അമിതമായ വ്യായാമം ശരീരത്തിന് ദോഷകരമാകുമെന്നും ഗുരുതരമായ ആരോഗ്യ പ്രശ്നങ്ങളിലേക്ക് നയിക്കുമെന്നും ഈ സംഭവം ഓർമ്മിപ്പിക്കുന്നു.

യുവതിവ്യായാമംഡോക്ടർമാർകണ്ടെത്തൽ

മറുനാടൻ മലയാളി ബ്യൂറോ