ആകാശം ആകെ മൂടിക്കെട്ടിയ അവസ്ഥ; കുവൈറ്റ് എയർവേയ്സ് വിമാനങ്ങൾ വഴിതിരിച്ചുവിടാൻ തീരുമാനം; സമയക്രമത്തിൽ മാറ്റം വരുത്തുമെന്നും അധികൃതർ
കുവൈറ്റ്: കുവൈറ്റിൽ നിലനിൽക്കുന്ന പ്രതികൂല കാലാവസ്ഥയെത്തുടർന്ന് കുവൈത്ത് അന്താരാഷ്ട്ര വിമാനത്താവളത്തിൽ ലാൻഡ് ചെയ്യേണ്ടിയിരുന്ന കുവൈത്ത് എയർവേയ്സിന്റെ ചില വിമാനങ്ങൾ താൽക്കാലികമായി വഴിതിരിച്ചുവിടുമെന്ന് എയർലൈൻ അറിയിച്ചു. യാത്രക്കാരുടെ സുരക്ഷ ഉറപ്പാക്കുന്നതിനായി എത്തിച്ചേരുന്നതും പുറപ്പെടുന്നതുമായ വിമാനങ്ങളുടെ സമയക്രമത്തിലും മാറ്റങ്ങൾ വരുത്തുമെന്നും കുവൈത്ത് എയർവേയ്സ് സ്ഥിരീകരിച്ചു.
എക്സ് (മുൻപ് ട്വിറ്റർ) പ്ലാറ്റ്ഫോമിലെ തങ്ങളുടെ ഔദ്യോഗിക അക്കൗണ്ടിൽ പ്രസിദ്ധീകരിച്ച പ്രസ്താവനയിൽ, ടിക്കറ്റ് ബുക്കിംഗ് സമയത്ത് നൽകിയിട്ടുള്ള കോൺടാക്റ്റ് വിവരങ്ങൾ ഉപയോഗിച്ച് എല്ലാ അപ്ഡേറ്റുകളും യാത്രക്കാരെ നേരിട്ട് അറിയിക്കുമെന്ന് എയർലൈൻ വ്യക്തമാക്കി. എയർലൈനിന്റെ നിയന്ത്രണത്തിന് അതീതമായ സാഹചര്യങ്ങളാണ് ഈ തടസ്സങ്ങൾക്ക് കാരണമെന്ന് ചൂണ്ടിക്കാട്ടിയ കുവൈത്ത് എയർവേയ്സ്, യാത്രക്കാരുടെ സഹകരണത്തിനും മനസ്സിലാക്കലിനും നന്ദി രേഖപ്പെടുത്തി.
കൂടുതൽ സഹായം ആവശ്യമുള്ള യാത്രക്കാർക്ക് കസ്റ്റമർ സർവീസ് സെന്ററുമായി ബന്ധപ്പെടാവുന്നതാണ്. കുവൈത്തിനുള്ളിൽ നിന്ന് 171 എന്ന നമ്പറിലും, രാജ്യത്തിന് പുറത്തുനിന്ന് +965 24345555 എന്ന നമ്പറിലും (എക്സ്റ്റൻഷൻ 171) വിളിച്ച് വിവരങ്ങൾ തേടാം.
