യു.പിയില്‍ ഏഴ് വയസ്സുകാരനെ അയല്‍വാസി കത്രിക കൊണ്ട് കുത്തി കൊലപ്പെടുത്തി

ലഖ്‌നോ: ഉത്തര്‍പ്രദേശില്‍ ഏഴ് വയസ്സുകാരനെ അയല്‍വാസി കത്രിക കൊണ്ട് കുത്തി കൊലപ്പെടുത്തി. വ്യാഴാഴ്ച രാവിലെയാണ് കൊല്ലപ്പെട്ട അഫ്സലിനെ കാണാതായത്. അയല്‍ക്കാരനായ ഷാവേസിനെ (19) അറസ്റ്റ് ചെയ്തതിന് ശേഷം ആദംപൂര്‍ ഗ്രാമത്തിലെ വനത്തോട് ചേര്‍ന്നുള്ള കരിമ്പ് തോട്ടത്തില്‍ നിന്നാണ് കുട്ടിയുടെ മൃതദേഹം കണ്ടെടുത്തത്.

വ്യാഴാഴ്ച രാവിലെ 10 മണിയോടെ പ്രതിക്കൊപ്പമാണ് അഫ്സലിനെ അവസാനമായി കണ്ടത്. കുട്ടി വീട്ടില്‍ തിരിച്ചെത്താത്തതിനെ തുടര്‍ന്ന് അമ്മ തിരച്ചില്‍ നടത്തിയെങ്കിലും കണ്ടെത്താനായില്ല. തുടര്‍ന്ന് കുടുംബം പൊലീസില്‍ പരാതി നല്‍കുകയായിരുന്നു. ഷാവേസ് കുട്ടിയെ തട്ടിക്കൊണ്ടുപോയെന്നായാണ് കുടുംബം പരാതി നല്‍കിയത്. പ്രതിയെ ചോദ്യം ചെയ്തപ്പോള്‍ കുട്ടിയെ കൊലപ്പെടുത്തിയതായി സമ്മതിക്കുകയായിരുന്നു.

കൊലപാതകത്തിന് ഉപയോഗിച്ച കത്രികയും കണ്ടെടുത്തിട്ടുണ്ട്. പ്രതി മയക്കുമരുന്നിന് അടിമയാണെന്നാണ് പൊലീസ് പറയുന്നത്. കൊലപാതകത്തിന്റെ പ്രേരണയെക്കുറിച്ച് ചോദിച്ചപ്പോള്‍, കത്രിക കൊണ്ട് കുത്തിയാണ് താന്‍ കുട്ടിയെ കൊലപ്പെടുത്തിയതെന്നാണ് പ്രതി പറഞ്ഞത്. മൃതദേഹം പോസ്റ്റ്മോര്‍ട്ടത്തിനായി അയച്ചിട്ടുണ്ടെന്നും കൂടുതല്‍ അന്വേഷണം നടക്കുകയാണെന്നും പൊലീസ് അറിയിച്ചു.