ഓട്ടോയിലിടിച്ച് ബൈക്ക് മറിഞ്ഞു, എതിരേവന്ന ലോറി ശരീരത്തിലൂടെ കയറിയിറങ്ങി; അധ്യാപകന് ദാരുണാന്ത്യം
കട്ടപ്പന: ബൈക്ക് ഓട്ടോറിക്ഷയിലിടിച്ച് റോഡിലേക്ക് മറിഞ്ഞുവീണ അധ്യാപകന്റെ ശരീരത്തില്‍ ലോറി കയറിയിറങ്ങി കോളേജ് അധ്യാപകന് മരിച്ചു. കുമളി മുരിക്കടി സ്വദേശിയും പുളിയന്‍മല ക്രൈസ്റ്റ് കോളജ് അധ്യാപകനുമായ ജോയ്സ് പി. ഷിബു (25) ആണ് മരിച്ചത്.
വ്യാഴാഴ്ച രാവിലെ 8.15 ഓടെ പുളിയന്‍മല-തൊടുപുഴ റോഡില്‍ പുളിയന്‍മല കമ്പനിപ്പടിയിലാണ് അപകടമുണ്ടായത്. പുളിയന്‍മല ഭാഗത്തുനിന്ന് കട്ടപ്പന ഭാഗത്തേയ്ക്ക് വരികയായിരുന്ന ജോയ്‌സിന്റെ ബൈക്ക് മുന്നില്‍ പോകുകയായിരുന്ന ഓട്ടോറിക്ഷയില്‍ ഇടിച്ചശേഷം റോഡിലേയ്ക്ക് മറിയുകയായിരുന്നു. ഈസമയം എതിരേവന്ന ലോറി ദേഹത്തുകൂടി കയറിയിറങ്ങി.
ഇതുവഴിയെത്തിയ യാത്രക്കാരും മറ്റും ചേര്‍ന്ന് ഉടന്‍തന്നെ ആശുപത്രിയിലെത്തിച്ചെങ്കിലും ഗുരുതരമായി പരിക്കേറ്റ ജോയ്സ് തല്‍ക്ഷണം മരിച്ചു. ക്രൈസ്റ്റ് കോളേജിലെ പൂര്‍വ വിദ്യാര്‍ഥി കൂടിയായ ജോയ്സ് ബി.ബി.എ അധ്യാപകനായി ജോലിചെയ്തുവരികയായിരുന്നു. മൃതദേഹം ഇരുപതേക്കര്‍ താലൂക്ക് ആശുപത്രിയിലാണുളളത്. വണ്ടന്‍മേട് പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.
