ദില്ലി: ദീപാവലി ആഘോഷങ്ങളുടെ ഭാഗമായി പുതിയ ഉപഭോക്താക്കൾക്കായി ഒരു രൂപയുടെ പ്രത്യേക പ്രൊമോഷണൽ പ്ലാൻ പ്രഖ്യാപിച്ച് പൊതുമേഖലാ ടെലികോം ഓപ്പറേറ്ററായ ഭാരത് സഞ്ചാർ നിഗം ലിമിറ്റഡ് (ബിഎസ്എൻഎൽ). ഒരു രൂപ മാത്രം വിലയുള്ള ഈ പ്രമോഷണൽ പ്ലാൻ പുതിയ വരിക്കാർക്ക് 30 ദിവസത്തേക്ക് സാധുതയുള്ള സമഗ്ര മൊബൈൽ സേവന പാക്കേജ് നൽകുന്നു. ഓഫറിലൂടെ ഉപഭോക്താക്കൾക്ക് 30 ദിവസത്തേക്ക് പരിധിയില്ലാത്ത വോയ്‌സ് കോളുകൾ, പ്രതിദിനം 2 ജിബി അതിവേഗ ഡാറ്റ, പ്രതിദിനം 100 എസ്എംഎസ് എന്നിവ ലഭിക്കും.

ബിഎസ്എൻഎൽ ജനറൽ മാനേജർ പി. ലോഗനാഥൻ പറയുന്നതനുസരിച്ച്, ഈ ഓഫർ പുതിയ ഉപഭോക്താക്കളെ ആകർഷിക്കുന്നതിനും 4ജി നെറ്റ്‌വർക്കിൽ മികച്ച സേവനം നൽകുന്നതിനും വേണ്ടിയാണ് രൂപകൽപ്പന ചെയ്തിരിക്കുന്നത്. മൊബൈൽ നമ്പർ പോർട്ടബിലിറ്റി (എംഎൻപി) വഴി ബിഎസ്എൻഎൽ നെറ്റ്‌വർക്കിലേക്ക് മാറുന്നവർ ഉൾപ്പെടെയുള്ള പുതിയ വരിക്കാർക്ക് ഈ പ്ലാൻ പ്രയോജനപ്പെടുത്താം. നവംബർ 15 വരെയാണ് ഈ ദീപാവലി ഓഫർ ലഭ്യമാകുക.

അടുത്തിടെ കേന്ദ്ര ടെലികോം മന്ത്രി ജ്യോതിരാദിത്യ സിന്ധ്യയുടെ പ്രസ്താവന പ്രകാരം, അടുത്ത ആറ് മുതൽ എട്ട് മാസത്തിനുള്ളിൽ ബിഎസ്എൻഎൽ തങ്ങളുടെ 4ജി ടവറുകൾ 5ജിയായി അപ്‌ഗ്രേഡ് ചെയ്യും. തദ്ദേശീയമായി വികസിപ്പിച്ചെടുത്ത 5ജി സാങ്കേതികവിദ്യ ഉപയോഗിച്ചാണ് ബിഎസ്എൻഎൽ രാജ്യത്ത് അഞ്ചാം തലമുറ നെറ്റ് വർക്ക് സജ്ജീകരിക്കുന്നത്. ഇത് ബിഎസ്എൻഎല്ലിന് ഉപഭോക്തൃ അടിത്തറ വർദ്ധിപ്പിക്കാനും മെച്ചപ്പെട്ട സേവനം നൽകാനും സഹായിക്കുമെന്ന് പ്രതീക്ഷിക്കുന്നു. കഴിഞ്ഞ സെപ്റ്റംബർ 27ന് പ്രധാനമന്ത്രി നരേന്ദ്ര മോദി 92,564 'മെയ്ഡ് ഇൻ ഇന്ത്യ' 4ജി ടവറുകൾ ഉദ്ഘാടനം ചെയ്തിരുന്നു.

ദീപാവലിപ്രൊമോഷണൽ പ്ലാൻബിഎസ്എൻഎൽ

സ്വന്തം ലേഖകൻ