സൂറിച്ച്: ലോകത്ത് ദയവധത്തെ കുറിച്ച് വ്യത്യസ്ത നിയമങ്ങളാണ് നിലനില്‍ക്കുന്നത്. വിവിധ രാജ്യങ്ങളില്‍ പലതരത്തിലാണ് നിയമങ്ങള്‍. ലോകം ചര്‍ച്ച ചെയ്ത നിയമ പോരാട്ടങ്ങള്‍ക്കൊടുവില്‍, സ്വിറ്റ്‌സര്‍ലന്‍ഡിലെ 'മരിക്കാനുള്ള അവകാശം' എന്ന തത്വത്തിന് വേണ്ടി വാദിച്ച സംഘടനയുടെ സ്ഥാപകന്‍ സ്വന്തം സ്ഥാപനത്തില്‍ വെച്ച് മരണത്തിന് കീഴടങ്ങി. ദയാവധത്തിനായി വാദിക്കുന്ന ഡിഗ്‌നിറ്റാസ് എന്ന ലോകപ്രശസ്തമായ സംഘടനയുടെ സ്ഥാപനകായ ലുഡ്വിഗ് എ. മിനെല്ലിയാണ് സ്വയം മരണം തിരഞ്ഞെടുത്തത്. തന്റെ 93-ാം ജന്മദിനത്തിന് ദിവസങ്ങള്‍ മാത്രം ബാക്കിനില്‍ക്കെയാണ് അദ്ദേഹം തന്റെ ജീവിതം അവസാനിപ്പിച്ചത്.

ഒരാള്‍ക്ക് സ്വന്തം അന്ത്യം തിരഞ്ഞെടുക്കാനുള്ള അവകാശത്തിന് വേണ്ടി നിയമപ്പോരാട്ടം നടത്തിയ വ്യക്തിയാണ് മിനെല്ലി.

1998-ലാണ് ഡിഗ്‌നിറ്റാസ് എന്ന പേരില്‍ സംഘടന തുടങ്ങിയത്. വ്യക്തിയുടെ സ്വയം നിര്‍ണ്ണയ അവകാശത്തിനായി അദ്ദേഹം നടത്തിയ പോരാട്ടം ചില്ലറയായിരുന്നില്ല. കേസ് സ്വിസ് സുപ്രീം കോടതിയും യൂറോപ്യന്‍ മനുഷ്യാവകാശ കോടതിയുംവരെ കയറി ഇറങ്ങി. ഒടുവില്‍ അദ്ദേഹത്തിന്റെ കഠിന പ്രയത്ന്നത്തിന്റെ ഫലമായി 2011-ല്‍ യൂറോപ്യന്‍ കോര്‍ട്ട് ഓഫ് ഹ്യൂമണ്‍ റൈറ്റ്‌സ് വിധി പുറപ്പെടുവിച്ചു. ഒരാള്‍ക്ക് സ്വന്തം ജീവിതത്തിന്റെ അന്ത്യം എപ്പോഴായിരിക്കണം, എങ്ങനെയായിരിക്കണം എന്ന് തീരുമാനിക്കാനുള്ള അവകാശത്തെ കോടതി അംഗീകിരച്ചു.

ഇങ്ങനെ മരിക്കാനുള്ള അവകാശത്തിനായി പോരാടിയ ആളുകളെ മരിക്കാന്‍ സഹായിക്കുന്ന ക്ലിനിക്കിന് തുടക്കമിട്ടയാള്‍, അവസാനം അതേ രീതിയിലൂടെ തന്നെ യാത്രയായി എന്നത് ശ്രദ്ധേയമാണ്. സ്വിറ്റ്സര്‍ലന്‍ഡ് നിയമപ്രകാരം, ഡോക്ടര്‍മാര്‍ മാരകമായ കുത്തിവെപ്പ് നല്‍കുന്ന ദയാവധം നിയമവിരുദ്ധമാണ്. എന്നാല്‍, മരിക്കാന്‍ ആഗ്രഹിക്കുന്ന വ്യക്തിക്ക് മരണത്തിന് സഹായിക്കുന്ന ഡ്രഗുകള്‍ ഉപയോഗിച്ച ്മരണം തിഞ്ഞെടുക്കുന്നത് പതിറ്റാണ്ടുകളായി അവിടെ നിയമപരമാണ്.

10,000-ത്തിലധികം അംഗങ്ങളുള്ള ഡിഗ്‌നിറ്റാസ് ഇന്ന് ലോകം അറിയപ്പെടുന്ന സംഘടനയാണ്. സ്ഥാപകന്‍ വിട പറഞ്ഞെങ്കിലും, അദ്ദേഹത്തിന്റെ ലക്ഷ്യത്തില്‍ നിന്ന് പിന്നോട്ട് പോകില്ലെന്ന് ഡിഗ്‌നിറ്റാസ് വ്യക്തമാക്കിയിട്ടുണ്ട്. ജീവിതത്തിന്റെ അന്ത്യത്തില്‍ സ്വന്തം ഇഷ്ടം നടപ്പാക്കാനുള്ള അവകാശത്തിനായി സംഘടന ശക്തമായി മുന്നോട്ട് പോകുമെന്നും അവര്‍ കൂട്ടിച്ചേര്‍ത്തു.

ഡിഗ്‌നിറ്റാസ്മരണംലുഡ്വിഗ് മിനെല്ലി

മറുനാടൻ മലയാളി ഡെസ്ക്