ബെംഗളൂരു: കന്നഡ സിനിമാലോകത്തെ പ്രമുഖ നടനും ‘കെജിഎഫ്’ ചിത്രങ്ങളിൽ കാസിം ചാച്ച എന്ന കഥാപാത്രത്തിലൂടെ ശ്രദ്ധേയനായ ഹരീഷ് റായ് (55) അന്തരിച്ചു. ഒരു വർഷത്തിലേറെയായി തൈറോയ്ഡ് അർബുദത്തെ തുടർന്ന് ചികിത്സയിലായിരുന്നു അദ്ദേഹം. ബുധനാഴ്ചയാണ് അദ്ദേഹം വിടവാങ്ങിയത്.

നിരവധി കന്നഡ, തമിഴ്, തെലുങ്ക് ചിത്രങ്ങളിൽ അഭിനയിച്ചിട്ടുള്ള ഹരീഷ് റായ്, ‘ഓം’, ‘സമര’, ‘ബാംഗ്ലൂർ അണ്ടർവേൾഡ്’, ‘ജോഡിഹക്കി’, ‘രാജ് ബഹാദൂർ’, ‘സഞ്ജു വെഡ്‌സ് ഗീത’, ‘സ്വയംവര’, ‘നല്ല’, എന്നീ ചിത്രങ്ങളിലും ശ്രദ്ധേയമായ വേഷങ്ങൾ ചെയ്തു. എന്നാൽ, 2018-ൽ പുറത്തിറങ്ങിയ ‘കെജിഎഫ്: ചാപ്റ്റർ 1’ലും തുടർന്ന് 2022-ൽ പുറത്തിറങ്ങിയ ‘കെജിഎഫ്: ചാപ്റ്റർ 2’വിലും അദ്ദേഹം അവതരിപ്പിച്ച കാസിം ചാച്ച എന്ന കഥാപാത്രം ഏറെ പ്രേക്ഷകശ്രദ്ധ നേടിയിരുന്നു.

കാൻസർ രോഗം ശരീരത്തിന്റെ മറ്റു ഭാഗങ്ങളിലേക്കും പടർന്നതായി അദ്ദേഹത്തിന്റെ മെഡിക്കൽ റിപ്പോർട്ടുകൾ സൂചിപ്പിച്ചിരുന്നു. രോഗത്തെക്കുറിച്ചും ചികിത്സയുടെ സാമ്പത്തിക ബാധ്യതയെക്കുറിച്ചും ഹരീഷ് റായ് മുൻപ് മാധ്യമങ്ങളോട് തുറന്നുപറഞ്ഞിരുന്നു. തന്റെ ചികിത്സയ്ക്കായി വലിയ തുക ആവശ്യമായി വരുന്നുണ്ടെന്നും, ഒരു പ്രത്യേക കുത്തിവയ്പ്പിന് 3.55 ലക്ഷം രൂപ ചിലവുണ്ടെന്നും അദ്ദേഹം വെളിപ്പെടുത്തിയിരുന്നു.

63 ദിവസത്തെ ഒരു ചികിത്സാ ചക്രത്തിൽ മൂന്ന് കുത്തിവയ്പ്പുകൾ ആവശ്യമാണെന്നും, ഒരു ചക്രത്തിന് ഏകദേശം 10.5 ലക്ഷം രൂപയോളം ചിലവു വരുമെന്നും അദ്ദേഹം പറഞ്ഞിരുന്നു. സമാന രോഗികൾക്ക് 20 കുത്തിവയ്പ്പുകൾ വരെ വേണ്ടിവരുമെന്നും, മൊത്തം ചികിത്സാ ചെലവ് 70 ലക്ഷം രൂപയോളം എത്താമെന്നും അദ്ദേഹം കൂട്ടിച്ചേർത്തിരുന്നു.

‘കെജിഎഫ്’ നായകൻ യാഷ് താനുമായി അടുത്ത ബന്ധം പുലർത്തുന്നുണ്ടെന്നും, മുൻപ് പലതവണ സഹായിച്ചിട്ടുണ്ടെന്നും എന്നാൽ തനിക്ക് എപ്പോഴും അദ്ദേഹത്തെ ബുദ്ധിമുട്ടിക്കാൻ കഴിയില്ലെന്നും ഹരീഷ് റായ് മുൻപ് പറഞ്ഞിരുന്നു. "യാഷ് എന്നെ മുൻപ് സഹായിച്ചിട്ടുണ്ട്. എനിക്ക് എപ്പോഴും അദ്ദേഹത്തോട് ചോദിച്ചുകൊണ്ടേയിരിക്കാൻ കഴിയില്ല. ഒരാൾക്ക് എന്തുമാത്രം സഹായം ചെയ്യാൻ കഴിയും? അദ്ദേഹമിതറിഞ്ഞാൽ തീർച്ചയായും എന്റെ കൂടെ നിൽക്കുമെന്ന് എനിക്കറിയാം. ഒരു കോൾ മാത്രം അകലെയാണ് അദ്ദേഹം," എന്ന് ഹരീഷ് റായ് മാധ്യമങ്ങളോട് പറഞ്ഞിരുന്നു.

തന്റെ ആരോഗ്യപരമായ ബുദ്ധിമുട്ടുകളെക്കുറിച്ചും ചികിത്സാ ചെലവുകളെക്കുറിച്ചും തുറന്നുപറഞ്ഞ നടൻ, സഹായം അഭ്യർത്ഥിച്ചിരുന്നെങ്കിലും അദ്ദേഹത്തിന്റെ അപ്രതീക്ഷിത വിയോഗം കന്നഡ സിനിമാ ലോകത്തിന് വലിയ നഷ്ടമാണ്. നാടകങ്ങളിൽ നിന്ന് അഭിനയ രംഗത്തേക്ക് കടന്നുവന്ന ഹരീഷ് റായ്, കാലങ്ങളായി നിരവധി കഥാപാത്രങ്ങളിലൂടെ പ്രേക്ഷകരുടെ മനസ്സിൽ ഇടം നേടിയിരുന്നു.

കെജിഎഫ്ഹരീഷ് റായ്അന്തരിച്ചു

സ്വന്തം ലേഖകൻ