സൂര്യന്റെ രശ്മികളെ പോലും യുഡിഎഫുകാർ വെറുതെ വിട്ടില്ല; സ്വർണക്കട്ടിക്ക് വേണ്ടി കേരളത്തെ എൽഡിഎഫുകാർ ഒറ്റുകൊടുത്തു; എൽഡിഎഫ്- യുഡിഎഫ് ഫിക്സ്ഡ് മത്സരം ഇത്തവണ കേരളം തള്ളും; മെട്രോമാൻ കേരളത്തിന്റെ പുരോഗതിക്ക് വേണ്ടി ശ്രീധരൻ സ്വയം സമർപ്പിച്ചു; ഇരു മുന്നണികളെയും കടന്നാക്രമിച്ചു മോദി കേരളത്തിൽ
പാലക്കാട്: കേരളത്തിലെ ഇടതു - വലതു മുന്നണികളെ ശക്തമായി വിമർശിച്ചു പ്രധാനമന്ത്രി നരേന്ദ്ര മോദിയുടെ തെരഞ്ഞെടുപ്പു പ്രചരണം തുടങ്ങി. മെട്രോമാൻ ഇ ശ്രീധരൻ മത്സരിക്കുന്ന പാലക്കാട്ടാണ് മോദിയുടെ ആദ്യത്തെ പ്രചരണ പരിപാടി. ഇവിടെ യുഡിഎഫിനെയും എൽഡിഎഫിനെയും രൂക്ഷമായി വിമർശിച്ചു കൊണ്ടാണ് പ്രധാനമന്ത്രി പ്രസംഗിച്ചത്.
എൽ ഡി എഫ്- യു ഡി എഫ് ഫിക്സ്ഡ് മത്സരം ഇത്തവണ കേരളം തള്ളുമെന്ന് മോദി പറഞ്ഞു. കേരളത്തിലെ യുവവോട്ടർമാർ എൽ ഡി എഫിലും യു ഡി എഫിലും നിരാശരാണ്. പുതിയ വോട്ടർമാർ ഇരുമുന്നണികളുടെയും മാച്ച് ഫിക്സിങ് മത്സരത്തെ എതിർക്കുന്നു. അഞ്ച് വർഷം കൂടുന്തോറും ഇരുമുന്നണികളും കേരളത്തെ കൊള്ളയടിക്കുകയാണ്. ബംഗാളിൽ കമ്മ്യൂണിസ്റ്റ് പാർട്ടികളും കോൺഗ്രസും ഒറ്റക്കെട്ടാണ്. അണിയറയിലെ നാടകങ്ങളെല്ലാം തുറന്നുകാട്ടപ്പെട്ടിരിക്കുകയാണ്.
സൂര്യന്റെ രശ്മികളെ പോലും യു ഡി എഫുകാർ വെറുതെ വിട്ടില്ല. സ്വർണക്കട്ടിക്ക് വേണ്ടി ബൈബിളിലെ യൂദാസിനെ പോലെ കേരളത്തെ എൽ ഡി എഫുകാർ ഒറ്റുകൊടുത്തെന്നും പ്രധാനമന്ത്രി ആരോപിച്ചു.അഴിമതി, ജാതീയത, വർഗീയത, സ്വജനപക്ഷപാതം, ക്രിമിനൽവത്ക്കരണം ഈ രോഗങ്ങളുടെയെല്ലാം അടിസ്ഥാനകാരണം വോട്ട് ബാങ്ക് രാഷ്ട്രീയമാണ്. ഈ വോട്ടുബാങ്ക് രാഷ്ട്രീയത്തിന്റെ രാജാക്കന്മാരാണ് എൽ ഡി എഫും യു ഡി എഫും. വോട്ട് ബാങ്ക് രാഷ്ട്രീയത്തെ കൂടുതൽ ശക്തിപ്പെടുത്തി കീശ വീർപ്പിക്കുകയാണ് ഇവരുടെ ലക്ഷ്യമെന്നും പ്രധാനമന്ത്രി പറഞ്ഞു.
ബിജെപി കേരളത്തെ കുറിച്ച് വിഭാവനം ചെയ്യുന്നത് പുരോഗമനപരമായ ആശയമാണ്. വ്യത്യസ്ത തുറകളിൽപ്പെടുന്ന പ്രൊഫഷണലുകളായി ആളുകൾ ബിജെപിയിലേക്ക് ആകൃഷ്ടരാവുന്നത് അതുകൊണ്ടാണ്. മെട്രോമാൻ ശ്രീധരൻ ജീവിതത്തിൽ എല്ലാം നേടിയ മനുഷ്യനാണ്. ഇന്ത്യയെ ആധുനികവത്കരിക്കുന്നതിൽ നേട്ടം കൈവരിച്ച വ്യക്തിയാണ് അദ്ദേഹം. കേരളത്തിന്റെ പുരോഗതിക്ക് വേണ്ടി ശ്രീധരൻ സ്വയം സമർപ്പിച്ചിരിക്കുകയാണ്. കേരളത്തിന്റെ അഭിമാനിയായ മകനാണ് ശ്രീധരനെന്നും മോദി പറഞ്ഞു. അധികാരം ആയിരുന്നു ആഗ്രഹമെങ്കിൽ ശ്രീധരന് അത് ഇരുപത് വർഷം മുമ്പ് ആകാമായിരുന്നു.
ഉത്സാഹവും ആവേശവും നൽകുന്ന വ്യക്തിത്വമാണ് ശ്രീധരന്റേതെന്നും മോദി പറഞ്ഞു.വിമാന മാർഗം കോയമ്പത്തൂരിലെത്തിയ പ്രധാനമന്ത്രി അവിടെനിന്നും ഹെലികോപ്റ്ററിൽ പാലക്കാട് മുൻസിപ്പൽ സ്റ്റേഡിയത്തിൽ വന്നിറങ്ങുകയായിരുന്നു. നഗരസഭാദ്ധ്യക്ഷ പ്രിയ അജയന്റെ നേതൃത്വത്തിൽ പാർട്ടി നേതാക്കളാണ് അദ്ദേഹത്തെ സ്വീകരിച്ചത്. തുടർന്ന് റോഡ് മാർഗം സമ്മേളന വേദിയായ കോട്ടമൈതാനത്തെത്തുകയായിരുന്നു. പാലക്കാട് ജില്ലയിലെ 12 നിയോജകമണ്ഡലങ്ങളിൽ നിന്നുള്ള എൻ ഡി എ സ്ഥാനാർത്ഥികൾ സമ്മേളനത്തിൽ പങ്കെടുക്കുന്നുണ്ട്.
