ചങ്ങനാശ്ശേരി: ക്ഷേത്രത്തിൽ നിന്നും പൂജാരിയെ തട്ടിക്കൊണ്ടുപോയി മർദ്ദിച്ചവശനാക്കിയ ശേഷം റോഡിൽ തള്ളിയ മൂന്നംഗ സംഘത്തെ പൊലീസ് അറസ്റ്റ് ചെയ്തു. പാലമറ്റം ശ്രീകൃഷ്ണസ്വാമിക്ഷേത്രത്തിലെ പൂജാരിയെ ആണ് ക്ഷേത്രത്തിൽ നിന്നും തട്ടിക്കൊണ്ടുപോയത്. കേസുമായി ബന്ധപ്പെട്ട് മൂന്നംഗ സംഘത്തെ തൃക്കൊടിത്താനം പൊലീസ് അറസ്റ്റുചെയ്തു. കാറും പിടിച്ചെടുത്തു.

ഞായറാഴ്ച രാത്രി ഒൻപത് മണിയോടെയാണ് സംഭവം. പൂജാരി തിരുവല്ല സ്വദേശി വിഷ്ണുനമ്പൂതിരി (32)യെയാണ് തട്ടിക്കൊണ്ടു പോയത്. സെക്യൂരിറ്റി ജീവനക്കാരനായ രവീന്ദ്രനെ മർദിച്ചതിനുശേഷം പാലമറ്റം ക്ഷേത്രത്തിൽനിന്നാണ് തട്ടിക്കൊണ്ടുപോയത. പിന്നീട് വിഷ്ണുനമ്പൂതിരിയെ മർദിച്ചവശനാക്കി റോഡിൽ തള്ളി. തൃക്കൊടിത്താനം പൊലീസ് രാത്രി കണ്ടെത്തി ആശുപത്രിയിൽ പ്രവേശിപ്പിച്ചു.

ചങ്ങനാശ്ശേരി പെരുന്ന കൃഷ്ണപ്രിയ വീട്ടിൽ പ്രവീൺ (34), തൃക്കൊടിത്താനം ശ്രീകല ഭവൻ ഗോകുൽ (27), തൃക്കൊടിത്താനം പുലിക്കോട്ടുപടി രാജീവ് ഭവനിൽ ഹരീഷ് (39) എന്നിവരെയാണ് അറസ്റ്റുചെയ്തത്. പ്രവീണിന് പൂജാരിയുമായുള്ള മുൻവൈരമാണ് സംഭവത്തിനുപിന്നിലെന്ന് പൊലീസ് പറഞ്ഞു. തൃക്കൊടിത്താനം എസ്.എച്ച്.ഒ. ഇ.അജീബ്, എസ്‌ഐ.മാരായ പ്രദീപ്, മോഹനൻ, എഎസ്ഐ. രഞ്ജീവ്, എസ്‌ഐ. ട്രെയിനി ജയകൃഷ്ണൻ നായർ എന്നിവരാണ് അറസ്റ്റിന് നേതൃത്വം നൽകിയത്. പ്രതികളെ കോടതിയിൽ ഹാജരാക്കി.

 

തട്ടിക്കൊണ്ടുപോയിപൂജാരി